Oseas 4
4
Papang Israel balna karak kalbilwi
1Israel balna, manna dakanauh Papang yulwa kidika.
Witing adika sauni muihni balna karak kalbilwi,#Mi 6:2.
kat muih pasyakat di rahm kidika diski,
barangni lani,
dawak Papang tanka bik amanglalawas ki.
2Kauna nawatni kauh laih,
alas yulnin laih banghna palni ki,
muih inin, malnin, yal karak dawak al karak dutni yamnin,
kaput bik laih muih kidika dauwi kaiwasak ki.
3Kidika bahang adika sauni kulnin bukna manah ki;
kidika yakat baisa sangka bangkidika uman parasnina dis dana ki;
asangpas dini, dawak di lawani balna kidika dadauna ki,
kaput bik waspadini balna bik.
Dawan yaklauwi sumalyang balna yulnina yakwi
4Papang yulwi:
“¡Muih as bik yulnin-awas ki, ūk dutni yamwa kidika,
dawakat bilnin bik awaski!
Yang yultayang kidika laih man namang yakat manah ki, sumalyang.#4.4 Yang yultayang...sumalyang: kaput ulna kidika yamni kapat ki. Hibru kau laih yulwi Man tawanma laih, sumalyang niningkauh kalbibilwa kapat ki.
5Man madah palni bukma,
dawak pukta yakat laih bukna karang man karak prapit kidika,
dawak man laih madaukalpamki ki.#4.5 Dawak man laih madaukalpamki ki: kaput ulna kidika yamni kapat ki. Hibru kau laih yulwi namangna yakat iki ki.
6Yang tawanki kidika di amanglawas ki,
kidika bahang kaldaukalpamna ki.
Dawak man sumalyang nuhni man kidika di amanglanin kidika dukih awasman dai,
kaput bahang yang bik man yakat sumalkiyang warkni kaupak mayaktayang.
7“Sumalyang nunuhni ampus mahni kalalahna kidika,
kaput bik laih yang nikingkauh baisa mahni dutni yayamna dai,
kaput bahang witingna risninapik kidika ninignakauh wirlaki.
8Yang tawanki dutni yamwa kidika kau sangka ki,
kidika bahang, dukih diawi,
yang tawanki kidika baisa dutni yamwak talna atnin.
9Sumalyang balna bik tawan yamwa kapat yayamwi,
witingna yayamwa yulni kidika wah diaki ki.
10Papang dini yamnin dai kidika dadana bahang,
di kakaswarang, kauna dibanghwas karang;
yal dawak al karak dutni yayakwarang kauna walaninabis yayakwas karang.
Israel dawan dauh yakat kulwi
11“Yal karak payahnin dawak wain karak libitwak,
la kat yamnin dai kidika dispapamwi.
12Yang tawanki kidika,
pan kau dawan dauh wayani yayamna yakat di kalyulwi dakakawi,
pan bin naini as duwi di balna kaikalahwas kidika tanka wawalwi.
Yal karak payahnin kidika uba minitna bayakna,
yang tawanki kidika ta dutni yakat kiwi:
Papangni kaupak naikau kalahwi di dutni yamwi.
13Asang tuna kau balna yakat,
walapni bubuswi, sakripais bubuswi,
dawak pan nunuhni dinit kau sanni yakat yayamwi.
Kidika bahang manna walamanabis yayal balna kidika bik ahal karak kalalangna dawak walamanabis yalnina balna bik.
14Kauna, yang walamanabis yayal balna yakat wah diatas awaki,
dutni yayamna kidika yulni,
kaput bik walamanabis yalnina balna yakat bik,
kat manna palni dutni yamtamana bahang,
sakripais busnin kat yayal dutni balna karak yawamana kalpakta,
kidika yalni dudutni balna laih al karak dutni yamnin prinias yayamwi.
¡Kaput laih tawan as kidika kawi kiwi,
sinsni sirihni awas kidika yulni!#Jr 2:23-27; 3:1-2; Os 2:5.
15“Israel yal karak payahyang man kat,
kauna Judá laih dutni yamnin awaski.
¡Manna Gilgal yakat uiwinih,
dawak Bet-avén#4.15 Hibru kau Bet-avén tanka laih dutni yamnin uni. Oseas yaklauwi dutni talnin karak libitwi Betel yakat, tanka laih Papang uni. yakat bik kilwi uiwinih,
dawak Papang ayangni kau bik yakta yuyulwinih!#Am 4:4; 5:5.
16Israel laih muih dutni ki, turuh yal sirau minikratni kapat,
kaput kidika, ¿Papang witing maintalwarang yah sihrsihr yamni yakat sihm sīp bin as kapat?
17-18Efraín#4.17-18 Oseas yaklauwi adika ayangni pakwi Israel yakat, yuldarang kat tingpal niningkau kingni yakat. kidika dawan dauh yakat bukna.
¡Bitik laih wasak diyang muihni balna kapat uiwi bubukna!
Wat wat dutni yayamwi,
witingna rispik lani, dawak, asalni lani kauh wawalwi.#4.17-18 ¡Bitik laih...wawalwi: kaput ulna kidika yamni ki. Hibru kau laih amangladaski.
19¡Wing kaiwi didulauwi aiwarang,
dawak dawan dauh yakat kukulwa dai kidika asalnina kalahwarang!
Currently Selected:
Oseas 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
