Oseas 11
11
Papang tawanni kulnin dutni yakat dalani talwi
1“Israel tawanni kidika muih bin dai mani balna yakat,
yang dalani talayang dai witing kidika yang walakibis bahang
Egipto kaupak kalyulnayang kaina atnin.#Ex 4:22; Mt 2:15.
2Witing kainin kidika wat wat kalyulting kat
nawatkauh yang kaupak naikau kalahkiwa dai.
Yang tawanki kidika dawan dauh balna yakat sakripais buswa dai,
dawak busnin walapni bik buswa dai dawan dauh balna yakat.
3Kidika balna bitik kau, Efraín tawanni kidika yang lawik tatuna dunayang,
dawak niningkanayang lapakna atnin;
kauna witingna amanglalawas dai yang lawik mainditalayang dai kidika.#11.3 Mainditalayang dai kidika: barangni yulnin kat yang lawik sikninanis kaupak yamni diyaktayang dai.
4Kulnin yudutni kau, dawak dalani lani kau,
yang akat duainayang;
yang muhki yakat libitnik manah
sihm muih bin batahnbin tasuwa kapat;#11.4 Yang muhki...tasuwa kapat: kaput ulna kidika yamni ki. Hibru kau laih amangladaski.
niningna yakat abuktik di bayahnayang,
5kauna witingna yang akat ainin kukulwas dadana.
Kidika bahang watwi Egipto yakat uinin ki,
dawak Asiria kidika witingna minitna yakat king kana karang.
6Isparah kidika witingna tawannina nuhni yakat kiwi bukna karang
dawak ūnina pararasni balna papakna dai kidika daukalna karang,
bahwi dis yamna karang, witingna warknina yamnin duduwa kidika yulni.
7Yang tawanki kidika ban yang kaupak naikau atnin kidika kukulwi,
ma yakat kilwi sararahwi kauna muih as bik tingninasut lalaihwas ki.
8“¿Amput madapamkiyah Efraín?
¿Amput marumhtik daki yah Israel?
¿Madaukalpamnik sip awaki yah, Adma tawanni kau daukalnayang kapat,
kidika awaskat, man kidika mayamna atnik Zeboim#Dt 29:23. kau kalyamna yang kapat?
¡Yang ising kidika bitik laih kalitikna ki minikun talnin manah buhngki man namang yakat!
9Yang kulnik daukalna kidika kaput laih yamtas awaki:
wattik Efraín kidika daukaltas awaki,
kat yang laih Papang yang, muih awas yang bahang.
Yang laih holi yang, manna pasmangna yakat yang,
manadaukalnik aiwasyang.”#11.9 Manadaukalnik aiwasyang: kaput ulna kidika yamni ki. Hibru kau laih yulwi tawan nuhni yakat aiwinik awaski.
10Witingna papang yakat usnit uhuiwarang,
dawak witing kidika ihna karang layan kapat.
Ihna karang dawak witing dini balna kidika,
ma kawa kaupak diyukwin aiwarang.
11“Uhbinina kapat diyukwīnah aiwarang Egipto kaupak,
Asiria kaupak aiwarang buhtuku kapat,
dawak wattik diyamtingkat ūnina yakat yalalahna karang.
Yang Papangyang kat yultayang.
Papang tawanni dutni yamna kidika
12 # S.b. 11:12—12:14 kidika laih libitna ki S.b. 12:1-15 karak hibru kau ulna yakat.“Efraín laih alas manah yayulna,
Israel tawanni bik alas manah yayulna.
Judá kidika Papang kaupak naikau kalahwi kiuna,
dawak waralaih, dawan dauh balna yakat rahm kulwi.#11.12 Efraín laih...ramh kulwi: kaput ulna kidika yamni ki. Hibru kau laih amangladaski.
Currently Selected:
Oseas 11: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
