Hibru 9
9
Holi pāni sau kat dawak makaukisang yakat
1Waralaih tatuna aslah kalahna dai kidika laih prias yamnin lani balna duwadai, kaunah holi pāni as sau akat. 2Kalpaknin ūni labanni#Ex 26:1-30. kidika dulauna, tatuna dai kaupak, ayangni laih Holi Pāni, awas pāni sakdai,#Ex 25:31-40. dawak plawar busna Papang kau kalawa kidika ilnin pāni bik.#Ex 25:23-30. 3Asna baini rina witkidika dangnit yakat Holi Palni Pāni kidika pakdai;#Ex 26:31-33. 4kidika yakat walapni busnin pāni gol kau yamna kidika pakdai,#Ex 30:1-6. dawak pramis baksni kidika gol kau manah yamna dai.#Ex 25:10-16. Dawak kidika baksni pasyakat di punin dini gol kau yamna kidika yakat maná#Ex 16:33. puna bangdai, dawak Aarón tulninah sulawi kalahna#Nm 17:8-10. dai kidika bik āna dai, dawak aslah kalahna tatni balna bik.#Ex 25:16; Dt 10:3-5. 5Pramis lani baksni minityakat lawani duyang balna kidika bangdai, kidika laih Papang sakkidika tanka, witingna lawanina kau aslah kalahna baksni kidika mumukwādai.#Ex 25:18-22. Kaunah waradika laih sip kidika bikisni balna bitik yultasyang.
6Di balna kidika kaput ridi yamna, bahang sumalyang balna kidika kalpaknin ūni labanni yakat uiwi kawi prias yayamwādai.#Nm 18:2-6. 7Kaunah kidika kaupak pāni bu yakat laih, sumalyang nuhni kidika manah kāwadai, kurih as pasyakat wat as; kidika yakat kawakat, tinglau āni kidika duwi kiwādai witing silp yulni sakripais yamnin dawak tawan isning aiwas dutni balna yamwa kidika yulni bik.#Lv 16:2-34. 8Adika karak Spirit Holi manikingkawi, kalpaknin ūni labanni kiwi kāwa palni kau ahni pakkidika laih ban pakdai, dawak holi pāni yakat kiunin tani kidika baisa disdai. 9Adika bitik laih sainni as ki warmani dini; kat kidika yakat minitdis kalanin duwi uiwadai, sakripais yayamwādai Papang yakat bahang kidika barangni awasdai kidika muihni kulninna kidika. 10Kidika laih kasnin dini manah yulwi, dinin dini dawak amput maisihnidis kalahnin kidika bik, kidika laih muihni nuhni minit manah, dawak kidika tanka laih Papang di balna kidika satuk yamwarang kat.
11Kaunah Krais laih uman kaina, bahang waralaih witing kidika sumalyang nuhni ki, di yamni balna ban kaput karang kidika.#9.11 Di yamni balna ban kaput karang kidika: tingkau ulna yakat yulwi: tanit yakat di yamni balna kaiwarang kidika. Holi pāni yakat witing wark balna yamwa kidika laih tanit yamni ki dawak barangni ki, dawak muih al yaklauwi yamwas ki; yuldarang kat di balna yamna adika kaupak awaski. 12Krais laih holi pāni yakat kana, kaunah kuts ahalmuk balna dawak turuh ahalmuk balna ānina kidika sakripais yamnin awas, kaunah witing silp āni kidika kau; dawak wat aslah kamanah kana, dawak mayang madiki laihwi yaknin lani ban kaput atnin kidika duna. 13Rahm kidika laih turuh dawak kuts balna ānina#Lv 16:15-16. kidika dawak turuh yal wanani sakripais pāni yakat busna kidika#Nm 19:9,17-19. kau maisihni balna minitna yakat rasna ki, bahang kidika laih minittang manah maisihnidis yamwi. 14Kaunah adika laih kaput ki, ¡Krais āni kidika parasni ampus duwih! Spirit ban kidika munah, Krais witing silp muihni kidika kalana Papang yakat sakripais sani as bik dis kidika, dawak witing āni kidika makulnik klin yamwi, wark balna daunin yakat maidukiwa kidika, kaput laih Papang sangka ban kidika dini yamnin.
15Kidika bahang, Jisas Krais witing daunin kidika karak kaina, Papang yakat aslah yamna atnin yulni, dawak muih balna kidika laih pramis dawak ulna wisamni as karak aslah yamna atnin yulni, pramis tatuna yakat dutni yayamna kidika dawak disna atnin yulni, dawak Papang yaklau diyulna balna kidika laih duna atninna sip karang di pahni ban kaput atnin dianin pramis kalahna kidika. 16Ulna as#9.16 Ulna as: Adika yulni grik kau laih sipki tanka dunin, pramis as kapat kidika awaskat wauhtaya ulna as. kidika parasni dunin kat, talna atnin ki, yamna muihni kidika dauna pa. 17Kat ulna as kidika parasni diski, ulna muihni kidika baisa dauwas kat, kaunah dauna karang laih. 18Kaput bahang, tatuna aslah kalahna dai kidika yamna dai ā utuhna karak. 19Moses yaklauwi lā balna kidika bitik yulna dai, tawan muihni bitik yakat; kidika usnit kat sīp butuni pauni dawak pan basni walapni kidika duwi turuh āni yakat suihna was karak banawi, dawak lā wauhnitaya yakat rasna, dawak tawan muihni balna kidika bitik. 20Dawak diyulna: “Adika āni kuduh aslah kalahna parasni kalawa kidika, Papang yaklauwi aslah kalahnin kidika yamnin yulna kidik manna yakat.”#Ex 24:6-8; Zac 9:11; Mt 26:28. 21Moses witing holi pāni kidika bik ā rasna dai, dawak prias kau di yusyayamwa balna kidika bitik.#Lv 8:15. 22Lā yakat yulwa kaput, bitik palni laih ā kau maisihnidis kalahnin ki; dawak dutni dawak disnin kidika laih diski ā utuhwas kat.#Lv 17:11.
Krais sakripais yamna yulnidutni kidika yakpamwi
23Kaput bahang, sakripais kidika laih nid dai yamna atnin maisihnidis yamnin yulni kidika di balna makau kisang kaupak wayani balna talwi yamna dai bahang; kaunah makau kisang dini balna laih sakripais tanit yamni kidika wantki. 24Kaunah Krais laih kidika holi pāni muih yaklauwi yamna kidika yakat kawasdai, kidika laih rahm holi pāni kidika wayani as dai, kaunah witing laih kiwi kana makau kisang yakat, bahang waradika laih witing mayang mailpki yulwi Papang yakat. 25Dawak kiwikawas ki, wat wat sakripais yamnin, sumalyang nuhni kurih kaiwa balna bitik yakat yamwadai kapat, holi pāni yakat kawi muih ūk āni kidika duwi kiwadai kidika. 26Kaput dai kat laih, Krais kidika wat wat daunin dai, sau yamna kidika kaupak. Kaunah waradika laih, mani witni balna yakat, Krais kidika wat aslah ban kaput atnin kaina, witing muihni kidika sakripais yamna muih dutni yamna kidika dawak disnin yulni. 27Kaput bik laih muih kidika wat aslah dauwarang ki, bahang usnit yakat la yamnin kidika kaiwarang ki, 28kaput bik Krais laih witing muihni kidika wat aslah ban kaput atnin sakripais yamna, muih mahni dutnina kidika yaknin yulni.#Is 53:12. Kidika kaupak watwi kaiwi kalahwarang ki, kaunah dutni kidika yulni kaiwas karang ki, kaunah tahahawa balna kidika laihwi yaknin yulni kaiwarang ki.
Currently Selected:
Hibru 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
