Hibru 10
10
1Kat Moses lāni kidika laih wayani as manah dai di yamni balna kaiwarang dai kidika, rahm kidika palni laih awaski. Kidika bahang lā kidika sip barangni awaski, kidika balna kurih kaiwa bitik yakat Papang yaihnit yakat uiwadai kidika sihm sakripaisni kidika kalanin. 2Bahang lā kidika yaklau rahm muih dutni balna kidika maisihnidis yamnin sip kat laih, uman dutni yayamna kaldakakawas karang, dawak sakripais kidika bik yayamwas karang. 3Kaunah adika sakripais laih dauhmanah kurih kaiwa bitik yakat isningnakatwadai witingna dutnina kidika. 4Kat turuh balna, sīp balna ānina kidika muih dutni yamna kidika sip yakpamwaski.
5Kidika bahang Krais kidika sau akat kaiwi kanin kat, Papang yakat kalyulna:
“Sakripais dawak minitdis kalanin kidika bik dukih mawaski,
kaunah muihki nuhni as yanaman.
6Sakripais karauni kauna buswa kidika
dawak minitdis kalanin kidika bik
dukih mawaski muih dutni yamna kidikadispamnam.
7Kaput dawak yulnayang:
‘Akat sakyang, yang yulkiwauhtaya yakat ulna kaput,
Papang, man kulnam lani yamnin.’ ”#Sal 40:6-8.
8Tatuna kidika, yulwi Papang laih sakripais dawak minitdis kalanin tinglau balna kidika dukih kalawaski, dawak muih dutni yamna kidika dawak disnin sakripais karauni kauna buswa kidika bik, kidika dini balna kidik lā yaklauwi yamnin pakwa karang bik. 9Dawak minityakat lakwi yulwi: “Akat aiwayang man ismang lani yamnin.” Yuldarangkat kidika sakripais umani kidik yakpamta, dawak pāni yakat wisam as atah. 10Papang witing dini maiyakna kat Jisaskrais yaklauwi Papang kulnin lani yamna bahang, witing silp muihni kidika kalana sakripais yamna atnin wat aslah, dawak ban kaput atnin.
11Ju sumalyang balna kidika laih ma bitik yakat sihm sakripaisni kidika duwi kiwi, muih dutni yamna kidika sip dawak diswas karang bik.#Ex 29:38. 12Kaunah Jisaskrais laih wat aslah ban kaput atnin sakripais yamna, kidika usnit kat Papang tingnipal yakat yalahna. 13Kidika yakat tahawasakki Papang yaklauwi witing waihnila balna kidika bitik kalni dinityakat āwarang kat,#Sal 110:1. 14kat minitdis kalanin dini wat aslah karak barangni ban kaput atnin diyamna, Papang dini yayakna balna kidika. 15Dawak Spirit Holi bik kaput maiyulwi, yulwi:
16“Witingna karak aslah kalahninyamki kidika
dawak kidika mani balna usnit kat,
adika karang, Papang yulwi:
Lāki balna kidika kulninna yakat āki
dawak sinsnina yakat ulki.#Jr 31:33.
17Dawak dutni yayamna balna kidikawattik isingkattas awaki.”#Jr 31:34.
18Kaput bahang, dutni balna kidika dāwak disna usnit kat, nid awaski baisa minitdis kalanin dini kidika duainin dutni yamna kidika yulni.
Papang yaihnit yakat kiunin ki
19Wirah balna, waralaih holi pāni yakat kanin kidika laih pri mayang, tingkih Jisas āni munah, 20sangka atnin tani wisam munah kiunin, witing apahwi mayana kidika asna baini kidika kaupak, yuldarangkat, witing palni muihni nuhni kaupak. 21Sumalyang nuhni palni as dudi Papang ūni muhnit yakat. 22Kidika bahang Papang yaihnit yakat mawanang maising alas dis, dawak kasak kulnin lani karak, maising klin kulnin dutni kidika kaupak dawak mayang mamuihki kidika was yamni kau suhna karang.#Lv 8:30; Ez 36:25. 23Parasni atnin, makulnik sat sat kulnin awas, kasak kulnin yakat tahada kidika, kat Papang pramis maiyamna kidika laih kaput yamwarang ki. 24Waldang biri biri ilp kidika, dalani talnin kidika baisa dunin dawak di yamni balna kidika yamnin. 25Kaluduhda kidika yakat dadas mawang, muih as as yayamwa kapat laih awaski, biri biri makulnik dulaudanang; dawak baisa yamdanang Dawan mani kidika kaiwi uliswabahang.
26Kat ban ting dutni kidika yamdarang kat, di rahm kidika dakanamayang usnit kat, baisa sakripais ūk diski dutni yamna kidika yulni; 27la yamwarang yamadahngni kidika manah maitahawi dawak kuhpau daihni kidika, Papang waihnila balna dismukwarang kidika.#Is 26:11. 28Muih as Moses lāni kidika dakawi yamwas karang kat, witnis bu kidika awaskat bās kalalahwarang kat witing niningkauh, daunin yakat kalwirlana karang minikun talnin dis palni.#Dt 17:6; 19:15. 29Bahang, ¿manna kultasmana witingna wah kau parasni kidika duninna karang, kat Papang Walanibis al yakat atatakwa kidika dawak āni bik dauh kukulwa kidika, dawak Papang Spiritni dalani ditalwa yakat uhuswa kidika? Kidika āni kuduh pramis yamna#Ex 24:8; Hib 13:20. kidik yulwasak kidika, kidika kau witingna Papang dini diyakna. 30Amangladi Papang yulna kidika: “Muih lani yamnik kidika laih yang tingki yakat ki; yang lautik diaki.”#Dt 32:35. Dawak aput bik yulna: “Dawan witing tawanni kidika lani yamwarang.”#Dt 32:36. 31¡Papang sangka kidika tingni yakat buknin laih yamadahngni palni!
32Kaunah manna ismangnakattanauh, ma bayakna balna yakat, awas yaringni kidika dutanang minitni yakat parasni wauhnamana kalbaunin nuhni kidika. 33Manna pasyakat as as muih muhnina yakat dutni manayayamna dai, dawak ūk balna kidika laih dalani wawauhwa balna yakarak aslah kalahwi wawauhna. 34Manna miniknakun ditalnamana silak kau bangdai yakat, dawak alasna karuk dutamana kidika datanang dakyayakna, amanglatamana makau kisang yakat dutanama kidika laih tanit yamni bahang, dawak daukalwas ban kaput bahang. 35Kulnamna āta dutamana kidika didiswinih, kat kidika yaklauwi minit nuhni manana karang bahang. 36Manna nidmana wauhnin yakat parasni atnamna kidika, Papang kulnin lani yamnin, dawak kaput laih witing pramis yamna kidika dunin. 37Ulna yakat yulwi:
“Bainah, bainah,
kaiwarang ki kainin muihni kidika.
Nai watwas karang.
38Barangni muihni kidika
kasak kulnin karak sangka karang;
kaunah dangsawarang kat,
isinglak awaskarang witing niningyakat.”#Hab 2:3-4.
39Mayang laih dangsasawa balna kidika awasmayang, daunin yakat uiwa kidika, kaunah laihwi yaknin duduwa kidika kat kasak kukulwa bahang.
Currently Selected:
Hibru 10: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
