Hibru 11
11
Kasak kulnin
1Rahm kulnin lani kidik dunin laih, dunin tahada kidika rahm palni tahanin ki; di taldas kidika rahm kulnin talnamayang kapat. 2Mamuihkibararak balna dai kidika yamni dikulna dai kat kasak kulnin kidika duduwadai bahang.
3Rahm kulnin lani karak Papang sau adika yamna witing yulni karak,#Gn 1:1; Sal 33:6,9; Jn 1:3. kaput laih waradika mayang talda balna kidika di disdai, adika kaupak yamna.#11.3 Waradika mayang talda balna kidika di disdai, adika kaupak yamna: satuk wirlanin sipki: waradika talda kidika laih talnin sip awas dai kidik kau yamna.
4Rahm kulnin lani karak Abel, Papang yakat sakripais as tanit yamni yamna, Caín karak dawakat, kidika bahang Papang yaklauwi barangni alni as kalkulna, dawak minitdis dini duwi kiuna kidika duna dai.#Gn 4:3-10. Abel kidika dauna kaunah, ban yulbauwi kasak kulna kidika munah.
5Rahm kulnin lani karak, Enoc sangnika karuk duwi kiuna daunin kidika talwas atnin yulni, sip walwi yakwasdadana, kat Papang duwi kiuna bahang. Dawak Ulna yakat yulwi, dukiwas tanit kauh, Enoc yakat Papang yaklauwi yamni kaltalna dai.#Gn 5:21-24. 6Kaunah sip awaski kasak kulnin kidika dismayang kat Papang yamni maitalnin, kat Papang yaihnit yakat kiunin laih, mayang kulnin ki witing kidika sakki dawak witing yakat wawalwa kidika di diawi.
7Rahm kulnin lani munah Noé, di balna baisa taldas dini kalahwarang kidika kalyulna dai, dawak yulni dakawi kuma kuring as yamna walanibis balna laihwi yaknin yulni.#Gn 6:13-22. Sihm kidika kasak kulnin kau, Noé sau muihni balna yakat ladituhna dai, dawak lakat yamnin kidika kalana dai kasak kulnin munah duduwa kidika.
8Rahm kulnin lani karak, Abraham Papang yaklauwi kalyulwak, yulni dakawi kalahwi kiuna pa as kalawarang dai kidika witing dini. Witing sauni kaupak kalahwi kiuna kaunah amanglawasdai angkat kiwapa,#Gn 12:1-5. 9dawak rahm kulnin lani karak pa ūk muihni kapat yalahna, Papang yaklauwi pa as kalaki atna pāni yakat. Dawak ū labanni kau yalahna, Isaac dawak Jacob bik sihm, dawak kidika pranimis bik witingna duduna.#Gn 35:27. 10Kat Abraham laih tahawadai kidika tawanni rahni balna pamni duwa kidika, dawak kidika tawanni laih Papang yamna.#Hib 13:14.
11Rahm kulnin lani karak, Sara witing walabis yaknin sip-awas dai dawak abraham laih muihbarak kalna dai, kaunah witing parasni duna dai papang kalnin kidika, kat kasak kulna bahang Papang laih pranimis kat yamwarang kidika.#Gn 17:19; 18:11-14; 21:2; Rom 4:17-22. 12Kaput bahang Abraham, witing mani witni ulis yakat, sulani mahni duna dai sihm makau kisang kau yala balna kapat dawak kumakung kau kauhmak kapat, sip kuldi yakdas kidika.#Gn 15:5; 22:17; 32:12.
13Adika muihni balna bitik dadauna, Papang pramis diyamna dai kidika duduwas; kaunah kasak kukulwadai bahang, naikaupak tatalna dai, dawak dipararasna kaput bik kalamanglalana witingna kidika pa ūk kaupak muihni balna kapat, adika sauni munah aiwi bayayakna kidika.#Gn 23:4; 1 Cr 29:15; Sal 39:12. 14Di ais ais yuyulwa muihni balna kidika, lāih amanglanin yayakwi witingna sau as wawalwa kidika, baisa. 15Witingna baisa kukulna dai katlaih sauni kalalahna kidika, sipdai yamni palni nawatwi uinin kidika yakat; 16kaunah witing saunina as tanit yamni kidika dukih diawi, yuldarang kar, makau kisang kidika sauni. Kidika bahang, Papang laih yakasaldaski witingna Papangnina atnin kidika, kat tawan nuhni as ridi yamna duwi witingna dinina.
17Rahm kulnin lani karak, Papang yaklauwi Abraham yakat laihwi kaltalna, dawak Isaac kidika duna sakripais yamna atnin.#Gn 22:1-14. Witing walanibis al aslah kidika sakripais yamnin kulna, Papang pramis kalyamna dai kaunah: 18“Isaac munah sulama mahni duma.”#Gn 21:12. 19Kat Abraham witing amanglana Papang laih parasni nuhni duwi, bahang dauna kaupak bik dulaunin sip kidika; kidika bahang Abraham kidika walanibis watwi duna,#Gn 22:13. dawak kaput laih sainni as kalna.
20Rahm kulnin lani karak Isaac yaklauwi Jacob yakat blisin kalanin yulna ma balna kaiwarang yakat, dawak Esaú yakat bik.#Gn 27:27-29,39-40.
21Rahm kulnin lani karak Jacob, daunin manah dawak, blisin dianin pramis yamna José walanibis balna yakat, dawak tulninah yakat taih dawi Papang kau minityulna.#Gn 47:31—48:20.
22Rahm kulnin lani karak José yulna, Israel balna kidika Egipto sauni kaupak kalalahwarang ki, dawak witing muihni nuhni kidika amput yamnin kidika bik diyulna dai.#Gn 50:24-25; Ex 13:19.
23Rahm kulnin lani karak, Moses batahndawak, papangni balna yaklauwi malwi duduna waiku bās;#Ex 2:2. kat muihnibin kidika nuhnibin yamni tatalna dai bahang, dawak yamaduduwasdai king yaklauwi lā āna dai kidika muihbinina inin.#Ex 1:22.
24Rahm kulnin lani karak Moses witing muihbarak kalna kat, yulwasdai witing laih Fero walanibis yal kidika walanibis;#Ex 2:10-12. 25witing kau yamni talna Papang tawanni karak libitwi wiwiswarang kat, dawak ma parahni dutni alasnina kidika dakanin. 26Tanit minit nuhni kulna Mesías balna kidika yulni wauhnin, dawak Egipto ritsni balna dunin karak dawakat; kat Papang di kalawarang kidika yakat minikpa talna dai bahang.
27Rahm kulnin lani karak, Moses Egipto sauni kaupak kiuna,#Ex 2:15. yamaduwasdai king kulnin daukalna kidika, dawak ais yamnin kulna kidika yakat barangni dai, Papang taldas kidika witing laih talwa kapat dai. 28Rahm kulnin lani karak, Moses insal kaiwi bayakna alasnina kidika yamna, dawak sihwak dūr balna kidika ā kau rasna dai, kaput laih iyang innisal kidika Israel balna walaninabis tatuna yakat inin awas yulni.#Ex 12:21-30.
29Rahm kulnin lani karak Israel balna Kuma Pauni bayayakna, sau buhni kapat; kidika usnit kat Egipto muihni balna bik kaput yamnin kukulna, kaunah yakat was dadauna.#Ex 14:21-31.
30Rahm kulnin lani karak Jericó daklana kidika bahwi bubukna, kidika yaihnit yakat Israel balna ma tiaskaubu awawaihna usnit kat.#Jos 6:12-21. 31Dawak rahm kulnin lani karak, Rahab, yal as ahal manas karak kalangwa yalni kidika, yulni dakawi yayamwas balna kidika karak kalpakwi dauwasdai,#Jos 6:22-25. kat witing yaklauwi ūni yakat yamni āwi duna dai bahang, Israel muihni yakpakwi talwa bangdai kidika balna.#Jos 2:1—2 1.
32¿Ais baisa ūk yulki yah? Ma aitani dis awaki Gedeón yulni balna kidika yulnik,#Jue 6:11—8:32. Barac,#Jue 4:6—5:31. Sansón,#Jue 13:2—16:31. Jefté,#Jue 11:1—12:7. Devid,#1 Sam 16:1—1 Re 2:11. Samuel,#1 Sam 1:1—25:1. dawak prapit balna. 33Rahm kulnin lani karak kalbauwi sau dakyakwi duduna, la kat yayamna, Papang pramis yamna kidika duduna, layan tinpas bik puputna,#Dn 6. 34kuh parasni dahlwa kidika bik pipina,#Dn 3. isparah kau daunin bik kiri yaklalana, parasnina dahnkalna kapat bik watwi parasnina duduna, kaput laih war yakat pararasni dai, dawak waihla balna yakat minitna bayayakna. 35Yayal bik bang bangki, wanaihnina dadauna dai kaunah watwi sangninaka duwi yaklalauwak kalpapakna.#5 1 Re 17:17-24; 2 Re 4:25-37.
Ūk balna laih dalani nuhni wauhwi dadauna, kidika kaupak dilaihwi yayakwarang kidika dukih diawasdai, witni kat, sangninaka tanit yamni kidika dunin yulni. 36Ūk balna yakat laih sarahni diyuyulna, wah bik wiwisna,#Jr 20:2; 37:15. sīn kau sisitna dawak silak bik ahana.#1 Re 22:26-27; 2 Cr 18:25-26; Jr 20:2; 37:15; 38:6. 37Dawak ūk balna laih kipala kau bahrwi ihina,#2 Cr 24:21. sa kau buhwi dadakna, dawak isparah baini kau bik dadauna;#Jr 26:23. dawak ūk balna laih pini uina praknina kidika di unitak kau kakana, sīp, kuts unitak kau, miniknakunni di dis, dawak kaput laih dutni bik diyayamna. 38Adika ahalni balna, witingna adika sauni akat atnin sip-awas dai, kaunah pini kauhmak wanilang yakat uina, dawak asangpas balna yakat, pa sulihni balna yakat bik.
39Kaput kaunah witingna as bik Papang pranimis kidika duduwasdai, witingna rahm kulnin lani duduwa dai kidika ditalna dai bik; 40kat Papang mayang akat maikulna, dawak di tanit yamni as mayanin yulna, dawak mayang karak aslah kalalahwarang kat witingna kidika barangni kakalna karang.
Currently Selected:
Hibru 11: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
