Ezequiel 9
9
Jerusalén yakat wah kalawarang kidika niningkana
1Usnit kat muih dinitsuru nuhni parasni as yulwak dakanayang, tapaki yakat sarahwi yayulna: “¡Tawan nuhni yakat wah kalalawarang kidika aiwi, witingna kidika tingnina yakat kalbaunin dini kidika duwi aiwi!”
2Talnayang dai ahal tiaskauas uiwi kakawak dūr nuhni munah, bahang kidika laih tingpal niningkauh ki, witingna bitik tingnina yakat amar nunuhni as as duwi uina. Witingna pasyakat muih al as parakni yamni kana likdai, bahang banimak yakat di as duwi kiwalikdai ulnin dini. Uiwi kawi sakripais busnin pāni bras kau yamna dai kidika yakat uiwi wawatna. 3Kaput laih Papang alasnina yaksihni kidika mayakat kilwi kiwi sangnika duduwa balna minitna yakat watna, witingna bangdai yakat, bahang Papang uni kiwi kawa yakat uiwi kakana. Papang yaklauwi al prakni yamni kana likdai yakat kalyulwak kiuna, witing banimak kau ulnin dini duwalikdai kidika, 4dawak kalyulna: “Jerusalén tawanni nuhni kidika awaihta talah, sain as atah kulninna bukna balna sapanina#Rib 7:2-3; 9:4; 14:1. yakat, dawak kidika yakat di dutni balna yayamwa kidika bitik paun awi talnin.”
5-6Usnitkat dakanayang dai ahal ūk balna yakat diyulwak: “Witing usnit yakat yawa tawan nuhni kidika awaihta talnauh, minikun talnin lani dis itanauh, muihbararak, wawahma, sirarau, muih binina dawak yayal bararakni balna bik. Kauna sain duduwa balna kidika laih asbik uhuswinih.” Kaput laih witingna mahka muihbararak balna kidika tatuna ihina Papang ūni muhnit tani kau bangdai kidika.
7Usnit dawak diyulna: “Makatyulnin uni yakat yawa dutni kalyamtanauh, dawak watakni yakat muih ita ruhmta awaih datanauh.”
Witingna mahka tawan nuhni yakat uiwi muih yakat ihina. 8Dawak witingna kidika yayamwak, yang laih alas alahwanayang dai. Kaput laih yang limbabahtik muhki saukat laknayang dai, dawak dalani manah uba dutik parasni sarahnayang dai: “Papang, ¿Jerusalén minit yakat man kulnam daukalna kidika kalatang kiwi bukwarang yah, bitik daukalpammayah bulah watna kidika Israel?”
9Kaput laih nangkitlana: “Israel tawanni dawak Judá bik witingna dutni yayamna kidika uba nuhni ki. Adika pāni laih inin lani kidika banghna, adika tawanni nuhni laih lā dutni manah buhngki. Witingna kukulwa laih adika sauni dapamnayang kukulwi, dawak talasyang dutni yayamwa kidika. 10Bahang witingna yakat minikun talnin kidika disyang, nawatkauh laih witingna kulninna lani kidika minit diyulki sakyang.”
11Kaput laih muih al prakni yamni kānalikdai kidika, dawak banimak yakat ulnin dini as duwalikdai kidika nawatwi kaiwi yulna: “Man yayulnaman yakat uman yamnayang.”
Currently Selected:
Ezequiel 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
