Ezequiel 8
8
Jerusalén yakat di dutni yayamna dai kidika niningnakana
1Waiku tiaskauas laihna kaupak ma singka dai yakat, bahang kidika laih kurih tiaskauas laihna yakat dai, yang īki yakat yalahna sakyang dai Judá muihni bararak balna karak kalpaktik. Kidika yakat Papang tingni yang mikit yakat yuna, 2talnayang dai muih al as kapat dai.#8.2 Muih al as kapat dai: grik kau laih kaput ulna. Hibru kau laih ulna kuhpau. Talnayang dai banimak kaupak sau kauh kidika laih kuhpau kapat dai, dawak kidika kaupak mayakauh laih yaringni duwa dai.#Ez 1:27. 3Muih al sakkikidika, tingni kapat kidik yuwi baski yakat yalaihna. Kaput laih Papang parasni kidika yāwakat mayakat yadulauna, bahang kidika laih Papang yaklauwi nikingkana dai, Jerusalén yakat yaduwi kiuna, dawak tawan nuhni daklana dūrni pastawa kauh yakat yadukiwi yadana dai, bahang kidika laih tingpal niningkauh ki, bahang kidika yakat kuduh sakkidika dawan dauh as, bahang kidika palni yaklauwi yamwak Papang kulnin daukalwa dai. 4Yakat kidika Israel Papangni alasnina yaksihni kidika sakdai, bahang yang walang kau amana as talnayang kaput.#Ez 1:28. 5Kaput laih yayulna: “Tingpal nining yakauh muhta talah”
Dawak tingpal niningyakauh muhtik talnayang, dūr kiwi kawa yakat, bahang yaihnit palni yakat, dawan dauh kidika sakdai, bahang kidika palni kuduh Papang kulnin daukalwa dai kidika.
6Usnit kat yayulna: “¿Talaman Israel balna didutni yayamwa kidika, bahang kidika yulni laih ūki holi kaupak naikau kalalahwa kidika? Bahang baisa kau dutni kidika talma.”
7Usnit kat prias ūni watakni daklana dūrni kiwi kawa yakat yadu'kiuna, bahang daklana kidika yakat sulihni as sakdai. 8Kaput laih yayulna: “Daklana minit kau sulihni sakkidika baisa nuhni yamtah.”
Dawak sulihni kidika yang lawik baisa nuhni yamnayang, dawak kawi yaklanin dūrni as yaknayang. 9Usnit dawak yayulna: “Pasyakat awa lawa talah di dutni yayamwa kidika.” 10Awiklawanayang dawak, daklana naini kidika yakat talnayang di wayani dudutni, bil balna kapat, di anyang dutni kulna balna kapat, dawak dawan dauh balna wayanina satni bitik kau duduwa dai kidika Israel pasyakat. 11Kidika pasyakat bangdai Israel muihni bararak balna 70, dawak kidika pasyakat Safán walanibis Jaazanías bik dai, witingna kidika daniwan dauh balna yakat minitna yuyulwa dai. Witingna bitik kau tingnina yakat walapni busnin dini duduwa dai, kidika balna kaupak mukus kalahwa dai walapni as.
12Dawak yayulna: “¿Talaman, Israel muihni bararak balna kidika malni kau ais yayamwa kidika, witingna bitik laih daninawan dauh pāni sulihni kidika yakat kidika? Witingna kukulwi, yang ditalasyang, adika sauni kaupak datik yawanayang.” 13Baisa minit yakat lakwi yayulna: “Baisa di kau dutni kidika yayamwak talma.”
14Yaduwi kiuna dai Papang uni dūrni kawa yakat, bahang kidika laih tingpal niningkauh sakki. Kidika yakat yayal buas yalahna bangdai, dawan dauh Tamuz yulni kaidabangdai. 15Kaput laih yayulna: “¿Kidika talamanh? Baisa di dutni talma ki.”
16Kaput laih Papang uni watak pastawa yakauh yaduwi kiuna, maisihni dis pāni kiwi kawa yakat, dūrni kiwi kawa dawak sakripais busnin pāni yakat muih ahal muihasluih minit kau singka laih dangbahni bangdai maisihni dis pāni yakat; ma kilwa tani yakauh abuk bangdai dawak muhnina kidika sau kat lalakna dai, ma#Dt 4:19. yakat witingna minitna yuyulwa dai. 17Kaput laih Papang yayulna: “¿Talamanh? ¡Judá tawanni kidika kamanah aitani kaldakawas dai, akat kidika di dutni balna yamwa kidika, kidika minit yakat adika sauni akat kalbaunin lani manah banghna! Wat, wat yang kulnik daukakalwi, dawak yayamwi di wayani dutni kidika nangkitak kat kilwi kawi.#8.17 Yayamwi di wayani dutni kidika nangkitak kat kilwi kawi: kaput ulna kidika aitani kapat ki. Hibru kau laih ulna panting as nanangnitak yakat rurumhwi. Umani mani balna yakat, ma yakat witingna minitna yuyulwa muihni balna kidika pan tingna as duduwa dai, initna yuyulwa yakat. 18Kauna yang kulnik daukalna kau yamna awaki ki. Witingna yakat miniknakun talnin lani kidika apis bik dutas awaki. Witingna parasni sarahwi yayuyulwarang bik dakas awaki.”
Currently Selected:
Ezequiel 8: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
