Ezequiel 10
10
Papang alasnina yaksihni ūni kidika kaupak dawi kalahwi
1Usnit kat talnayang, sangninaka duduwa balna tunanina minitkau kudungni kapat duwa dai kidika yakat king yalahnin sinini as kapat kalahna, kauna kipala dahlwa sangni kapatnah dai.#Ez 1:26; Rib 4:2. 2Papang yaklauwi, muih al prakni yamni kanalikyakat kalyulna: “Kār wīlni pasyakat awah, sangnika duwa balna dinitna yakat, dawak kuh tuturni dahlwa kidika tingkurus as dutah, sangnika duwa balna walsahkau bangkidika kaupak, dawak tawan nuhni minityakat wauhta.”#Rib 8:5.
Dawak talnayang dai kidika alni amput kawi kiuna kidika. 3Kidika minitni yakat di sangnika duwa balna kidika Papang uni wadah nining yakauh bangdai, dawak Papang uni watakni yakat mukus manah bukna dai pastawa nining yakauh. 4Kaput laih Papang alasnina yaksihni kidika dulauwi duwi kiuna dai, di sangnika duwa balna minitna yakaupak, bahang duwi kiuna dai Papang ūni dūrni kawa yakat, kaput laih yaringni kalana dai Papang alasnina yaksihni kidika yaklauwi.#Ex 16:10; 24:16; Nm 10:34. 5Di sangnika duwa balna lawanina babahlwa kidika watak pining ahni yakaupak lāih dakawa dai parasni yulwa kidika. Papang parasni bitik duwa kidika yulbauwasak kapat dai. 6Kaput laih Papang yaklauwi pakna dai muih al parakni yamni kanalik alni yakat, kār wīlni yakaupak kuhpau duna atnin, di sangnika duwa balna pasyakaupak. Muih al dai kidika kiuna dai wīlni balna kidika as yaihnit yakat. 7-8Sangnika duwa balna lawanina dinit yakat muih tingni as kapat talna dai. Kidika balna kaupak as kalahwi tingni yuna dai witingna pasningna kau kuhpau pakyakat, dawak buas duwi, muih al parakni yamni kana sakyakat kalana tingni yakat, kaput laih duwi kiuna. 9Di sangnika duduwa balna yaihnitna yakat talnayang dai wīlni arungka, bahang witingna yaihnitna yakat as as duduwa dai. Wīlni balna kidika kipala dahlwa lalahni yaringni duwa kapat dai. 10Wīlni balna kidika arungkapak kapapat dai, bahang wīlni as kidika wīlni ūk yaka pasyak āna kapat dai. 11Di lawani duyang balna kidika mahka uiwakat, pirini arungka kidika kaupak as duwi, witingna nawatwi aiwas dai, kauna tatuna kau kiwalik kidika yakat uiwadai. 12Witingna muihnina, dangnina, tingnina, lawanina, yaringni#10.12 Yaringni: barangni yulnin laih minikpa. manah duwa dai, pirini#Ez 1:18; Rib 4:8. balna bitik kau, dawak wīlni arungka balna kidika bik sihm kapat dai. 13Yang silp tapaki kau dakanayang, wīlni balna kidika ayangni ūk laih “kār”#Ez 1:15-21. āwadai. 14Lawani duyang balna kidika muhnina arungka duwa dai: muhni tatuna kidika laih turuh almuk#10.14 Turuh almuk: Hibru kau laih ulna ki querubin. muhni kapat dai, dawak bu yakat laih muih al muhni kapat dai, bas yakat laih layan kapat dai, arungka yakat laih yakalnuh#Ez 1:10; Rib 4:7. kapat dai. 15Adika dini lawani duyang balna kidika sihm talnayang dai Quebar wasnikung yakat.#Ez 1:1-3.
Lawani duwa balna kidika yaklalauna, 16witingna uiwakat, wīlni balna kidika uiwadai; witingna lawanina dulauwi bahlwi mahka sau kaupak yaklalauwa kat, wīlni balna kidika yaihnitna kaupak kalalahwas dai; 17witingna wawatwa kat, wīlni balna kidika bik wawatwa dai; witingna yaklalauwak wīlni balna bik yaklalauwa dai, kat wīlni balna kidika witingna sangninaka as dai bahang.
18Kaput laih Papang alasnina yaksihni kidika witing ūni kaupak dulauna dai, dawak lawani duwa balna minitna yakat ilna dai. 19Adika balna lawanina bahlwi mahka yaklalauna dai sau akaupak. Yang talnayang dai yaklalauwak, amput wīlni balna kidika witingna yaihnitna yakat ban dai kidika, dawak amput uiwi wawatna dai kidika, Papang ūni dūrni ma kawa nining yakauh yakat. Israel Papangni alasnina yaksihni kidika witingna minitna dai. 20Sihm kidika balna dai, lawani duyang balna as talnayang dai kidika, Israel Papangni dinit yakat, bahang kidika laih Quebar wasnikung yakat talnayang dai. Bahang yang amanglana yang dai ais dini dai kidika. 21Witingna kidika muhnina arungka duduwa bitik kau, lawanina bik arungka, dawak lawanina dinit yakat duduwa dai muih al tingni kapat. 22Dawak muhnina balna kidika laih sihm Quebar wasnikung kau talnayang dai kidika kapapat dai. Witingna kidika muhnitna tani manah lapapakwadai.
Currently Selected:
Ezequiel 10: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
