Ezequiel 7
7
Mani witni kidika ulis dana
1Papang yang yakat kiwi yang yayulna: 2“Yang Papangyang, kaput kalyultayang Israel sauni yakat: Mani witni kaiwi, mani witni kaiwi sau bitik yakat. 3Mama witni kidika kaiwi kawi Israel. Kulnik daukalna kidika man mamat yakat dating kaiwi bukwarang; man amputman dai kidika minit mayulki ki, dawak di dutni balna yamnaman kidika bitik yulni wah maki ki. 4Mamakun madakas mayamki ki: wah makiki amputman dai kidika yulni, dawak di dutni yamna man balna kidika minit lauma ki. Dawak manna amangkilatanama yang adika Papangyang.
5-6“Yang, Papangyang kat yultayang: Talah, mani witni kidika uliswi, dawak dutni kidika usnit, usnit kaiwarang ki; man namang yakat mani witni kidika ulis dana. 7Kaiwi kawi, daukalwa kidika#7.7 Kaiwi kawi, daukalwa kidika: kaput ulna kidika kau yamni kapat ki. Hibru kau laih ulna ki kraunni. sau muihni balna. Kidika man kaiwi kawi; tanka walwi amanglawas danin mani kidika kaiwi kawi. Asangpas kau alasna kidika bik dis dawarang ki. 8Warminitni, tihndawak, kulnik daukalna kidika man mamatyakat ruhmlakting kat isinglak dawarang, man amputman dai kidika minit mayulki ki, dawak wah maki ki di dutni balna yamnaman bitik yulni. 9Minikun talnin dis mayamki ki; amputman dai kidika yulni wah maki ki, dawak mayamting di dutni balna yamnaman minit kidika lauma. Dawak amanglatanama yang adika Papangyang, yang lawik wah maki ki.
10“¡Akat sakki mani kidika! ¡Uman kaikana! ¡Bahwi dis yamwa kidika kaina!#7.10 Sahyakna bin 7 yakat talah. Dutni kidika yaklauwi minit bayakwi pa bitik yakat dawak kalbilnin lani kidika manas ki. 11Kalbilnin lani kidika kaiwi kalahwi dawak dutni lani kidika sahwi mahwi. Kauna witingna ritsnina kaupak di as bik duduwas karang, dawak sararahwa kidika bik. Witingna kidika di minit nuhni bik awaski. 12Mani balna kaiwi kana. Di wauhwi bakanyang kidika bik alasna danin dini diski, dawak bakanwi duwa muihni kidika aisyamwi kulnin bukwarangyah. Kulnik daukalna kidika kau wah kalaki ki, Israel witing manah kapat kaldakawa kidika. 13Waiskat dini as wauhwi bakanpamna karang kat, sangnika bitik yakat watwi dini kidika duwas karang, witing dini yamna kidika kaupak sip dakwi kalahwas karang.#7.13 Hibru kau laih baisa minit yakat tangpakwi yulni as amangladas ki. Muih dudutni balna kidika witingna sip sangninaka ban duduna karang.
14“Puhnin dini kidika puhwi mahka yulwi kalbaunin yakat; muih bitik laih ridi kakalwi, kauna muih as bik kalahwi kalbauwas ki. Israel witingmanah kaldakawa kidika yulni wah kalaki ki. 15Ahni yakat wār sakki, pasyakat laih siknis, dawak yuh karak. Asangpas kau bang kidika laih wār kau dadauwarang, dawak tawan nuhni paskau bangkidika laih yuhkau dadauwarang, dawak siknis karak. 16Dawak muih as as bik kiri yaklalawarang asangpas yakat sihm buhtuku muihsakdauna kapat, kauna dadauna karang,#7.16 Dadauna karang: kidika kaput ulna kidik yamni kapat ki. Hibru kau laih ulna sararahwi. witingna dutnina yulni. 17Witingna bitik tingnina dadawak bukwarang, dawak muihsak dadauwak diyukwarang kalasninamak. 18Krukas asnina kau kakawarang dalani wawauhwa kidika sainni; muihnina bitik diyukwarang, dawak uina karang muhnina pauni yakasasaldak basnina bik kakahrna karang. 19Ruruhmna karang lalahni balna kidika tapas yakat; ruruhmna karang golni balna kidika bubuh kapat. Witing golni dawak lalahni balna kidika yaklauwi sip laihwi yayakwas karang Papang kulnin daukalwarang mani yakat witingna yuh dadauwa kidika sip diswas karang, banina bik dibahngwas karang, kat gol kidika yaklauwi kalyamwak dutni yakat bukna bahang. 20Witing gol alahni balna dawak sinni balna kidika bitik yaklauwi kalyamwak, bayak'kiunin dini manah kalbangna dai, dawak kidika kau daniwan dauh di dutni kidika yamna dai. Kidika bahang witing gol dini balna duwa kidika bubuh yammukki. 21Diating kat pa ūk muihni balna kidika aiwarang dawak mamalwarang, kaput bik aiwarang muih baisa dudutni balna kidika sau akat, didakyayakwarang, dawak di dutni balna kapat diyayamna karang. 22Adika sauni kaupak datik naikau alahwaki, dawak prikias uni bik dutni kalyayamna karang, yang diki minit nuhni dai kidika. Di malyang balna aiwi dutni yayamna karang.
23“Ayan wahni as ridi yamwi, kat kidika sauni yakat laih muih manas yakat pāt ruruhmna ki, muih ihiwa kidika yulni, dawak tawan nuhni pasyakat kalbilnin lani laih bahngna. 24Yang yamtingkat muih dudutni balna aiwarang, kaput laih tawan nuhni pasyakau ū balna bangkidika duduwarang. Parasni nuhni duduwa balna witingna manah kapat kaldakakawa kidika yakat laih dahn kalna karang; yamting kat panina salaini balna kidika yakat dutni yayamna karang. 25Muihsak kidika witingna yakat dilaihna karang; kulnin aslah kidika wawalwarang kauna sip yayakwas karang. 26Dutni kidika kaiwak usnit yakat ūk kaina karang; yul dutni kidika kaiwak usnit yakat ūk kaina karang. Witingna dauh palni prapit as wawalwarang tanka balna kidika laih yakwi diyulna atnin; sumalyang balna bik dis karang disumalna atnin, dawak muih bararak balna bik diskarang yul disumalna atnin. 27King kidika kulnin bukna karang, dawak kabamint bik kulnin bukna karang, dawak tawan kidika laih kalyuyukna karang. Lanina yamki witingna amput kukulwa dai kaput, dawak witingna amput la yayamwa dai kaput lanina yamki. Kaput laih amangkilalawarang, yang adika Papangyang.”
Currently Selected:
Ezequiel 7: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
