Ezequiel 6
6
Ezequiel yaklauwi dawan dauh balna yulnina yakwi
1Papang yang akat kaiwi yayulna: 2“Israel asangni yakat talah, dawak yang ayangki kau duta diyultah 3aput ki: ‘Dakanauh, Israel asangni balna, Papang yaklauwi yulwa kidika asang balna yakat, asang ububulni balna yakat, was balna yakat dawak langni panunuhni balna yakat: Manna mamatna yakat kalatingkat wār kaiwarangki, dawak dawan dauh kau mamatna yultamana panina dutamana balna kidika balna bitik daukalmukna karang. 4Dawak manna sakripais bustamana pāni balna dawak walapni bustamana pāni balna bitik laih bahtikdis yamki, dawak bik yamting kat muih ahal kidika damanawan dauh muhni tani yakat dauwi bubukwarang. 5Israel balna dadauna balna muihnina kidika, damanawan dauh balna muhnina yakat ruhmlakki, dawak wakalni balna kidika yaihnit yakat uhtik awaihki. 6Kaput laih manna pamana balna bitik kau, dawak tawan nunuhni balna kidika laih bahwi disyamna karang, dawak dawan dauh balna kau sakripais bustaman pāni balna bitik laih daukalna karang. Sakripais busnin pāni balna dawak dawan dauh balna kidika bitik laih daukalpamna karang bitik kau; walapni busnin pāni bik tuklakna karang; manna di yamna mana balna bitik laih disna karang.#Lv 26:30-31. 7Manna pasyakaupak muih mahni aiwi bubukwak kat dawak, amangkilatanama yang adika Papangyang. 8Kaunah yang lawik yamting manna kaupak, as as yaklalana karang daunin kaupak sangninaka duduna karang, dawak nisan balna pasyakat rawi kiuna karang. 9Dauwas yaklalana balna kidika witingna kidika nisan balna yakat, yang akat isningnakatna karang dawak isningna ahaiwarang, amput diyamting kat dutni wawauhna dai kidika#6.9 Diyamting kat dutni wawauhna dai kidika: sāra mani kau ulna yakat kaput yulwi. Hibru kau laih yulwi di bahna dai. yang niking kauh barangni-awas dai kidika yulni, dawak yang kaupak yadawi naikau kalahwi dawan dauh balna yakat minitna yuyulna yulni. Witingna alas dutni yayamna kidika yulni tiningna dulihwarang, di tanit dutni yayamna kidik yulni. 10Kaput laih yang akat amangkilalawarang, yang adika Papangyang, dawak yang lawik dutni balna sihnik yulnayang dai kidika, dauh manah bilninalautasyang dai.’ ”
11Papang yaklauwi yayulna: “Kulnam yakat dalani duta, tingma kau dawak kalma kau bik bauta; dalawa kidika yulni parasni sarahta, Israel tawanni di dutni palni yamna kidika yulni, bahang war kau dautanama, yuh kau, siknis kau bik. 12Pa naikau balna bang kidika laih siknis kau dadauwarang, dawak yaihnitkau bangkidika laih war kau dadauwarang, dauwas dawi yaklalawarang kidika laih yuh kau dadauwarang. Kaput laih kulnik daukalna kidika witingna minitna yakat lakki. 13Kidika muihni balna dadauna kidika, dawan dauh balna pasyakat tatalwarang kat, dawak sakripais bubuswa pāni yaihnit awaih yakat, asang ububulni balna yakat, asang nunuhni balna tuna yakat, pan nunuhni balna dinit yakat, kidika pāni balna yakat witingna daninawan dauh balna yakat walapni buswi kalalana dai, kaput laih yang adika amangkilalawarang Papang yang. 14Tingki dulauting witingna yakat wah diaki, wadah niningkauh kauhmak wanilang kaupak Ribla#6.14 Ribla: kaput ulna yakauh yamni kapatki. Hibru kau laih yulwi Dibla. kat tingpal niningkauh, witingna saunina kidika, bitik laih kauhmak wanilang manah yamki. Kaput laih amangkilalawang yang adika Papang yang.”
Currently Selected:
Ezequiel 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
