Ezequiel 5
5
1Papang yaklauwi yayulna: “Waralaih, kuhbil baini as duta basma kahrta, dawak kungmabas bik kahrta.#5.1 Israel pasyakat, tunanina karhnin, dawak kungninabas karhnin kidika laih dalani wauhwa tanka as dai. Usnitkat, paun as duta basma kidika bās sahyakta paun atah. 2Tawan nuhni niningyakat kalbauwi bayakwa kat, tawan papus yakat basma bās sahyakna man kidika as busma, dawak sahyakna bas ūk kidika laih kuhbil duta tawan nuhni yaihnit awaih yakat dakta awaihma, dawak sutni balna watna kidika laih wing yakat ruhmma. Yang tawan muihni balna usnitna yakat yawaki, tingki yakat isparah as dutik. 3Basni balna dai kidika buas duta prakma sutni yakat sihma. 4Dawak baisa buas duta kuh yakat ruhm'āma, busna atnin. Kidika yakaupak kuhpau kalahna karang, Israel tawanni bitik niningna yakat.
5“Yang, Papangyang kat yultayang: Jerusalén yakat sakki. Yang lawik tawan balna dawak nisan balna papus yakat anayang. 6Kaunah witing, yang lāki balna niningkauh yaklauna, bahang kaput laih yaihnitkau tawan dawak nisan balna ūk yakat, witingkauh tanit dutni kalna, kat yang yulki yakat dakawas ki, dawak bik kidika yakat usnit uiwi kiwas ki.
7“Kidika bahang, yang Papangyang kat yultayang: Manna laih tanit muih dutni kalnamana#5.7 Manna laih tanit muih dutni kalnamana: kaput ulna kidika kauh yamni kapat ki. Hibru kau laih aput ulna ki manna bitik kalpakta alahwa sarahna mana. adika yaihnitkau tawan balna kidika karak dawak, yang lāki yakat yawas mana, kaput bik adika yaihnit kau tawan balna lanina kat bik manna sip yamtas mana. 8Kidika bahang yang Papangyang kat yultayang: Yang bik man namangkauh lawaki, Jerusalén man namang yakat lā yamki, nisan ūk balna bitik muhnina yakat, 9yang watas bik yamtasyang dai kaput, dawak bik wattik yamtas awaki ki. Man yamtaman balna bitik kidika laih dutni manah ki. 10Manna pasmangna yakat, Papang as as witingna walaninabis yakat kakasna karang,#Dt 28:53-57; Jr 19:9; Lm 4:10. dawak walaninabis ahal kidika bik Papangnina yakat kakasna karang. Man namang yakat lā yamna awaki, kidika yakat dauwas yaklalawarang balna kidika laih wing sutni arungka yakat sihki ki. 11Yang, Papangyang kat sangkika kau yaktik yultayang: manna lawa prikias uni salaini dai kidika holi yamnamana, damanawan dauh kidika kau, dutni balna yamwa kidika karak, dawak kidika yaka bik minikun talnin lani dis laihtik bahki ki; manna yakat mamaknakun manatalas awaki ki. 12Muih balna kidika sahyakna bās kidika as praisni laih siknis kau dadauna karang, dawak yuhkau bik, ūk sahyakna bās kidika laih waihnila yaklauwi isparah kauh ina karang, dawak sahyakna bās as kidika laih wing sutni arungka kidika yakat sihna awaki ki. Witingna dangnitna yakat isparah as dutik yawaki ki. 13Kaput laih kulnik daukalna kidika kalating kaiwarang, dawak kulnik daukalna kidika isninglakwarang witingna niningna yakat, dawak isinglakwarang. Kulnik daukalna kidika witingna niningna yakat kalating kiwarang usnit yakat amanglalawarang, yang kidika Papangyang, kaput laih yang kuduh yulnayang dai kidika minit antik. 14Yang lawik daukaltik uduh sakki, Jerusalén kidika man kulnam bahbukna karang, tawan balna yaihmatna kau awaihdak kidika pasyakat, bahang kaput laih bayayakwa balna kidika bitik matatalna karang. 15Yang kulnik daukalwak man namangkauh lā yamna yang kidika, dawak wah parasni manayang kidika; bitik laih mauhusna karang, namangkauh bik yuyulna karang, dawak dalani wauhna as karang bahang yaihmatkau tawan balna kidika tatalna karang. Yang, Papang yang kat yultayang. 16Yang yamtingkat mamatna yakat yuh kidika kaina karang, sibang dalani as kapat. Dawak bik yamting kat manna mamatna yakat daukalnin kidika kaina karang, yuh dawak kasnin dini bik witna karang. 17Agha, yamtingkat man mamat yakat yuh kaina karang, siknis dawak daunin karak, kaput bik di anyang balna dudutni balna bik aiwi walamanabis balna dis yamna karang, dawak bik yamtingkat manna kidika manas palni kalbauta dautanama.#Ez 14:21; Rib 6:8. Yang Papangyang kat yultayang.”
Currently Selected:
Ezequiel 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
