Ezequiel 47
47
Makat yulnin ūni kaupak was buhrwi kalahwa kidika
1Usnit kat muih al kidika yaklau makat yulnin ūni kiwikawa yakat yaduaina dai. Bahang dūr kidika dinit kaupak was#Is 44:3; Jl 3:18; Zac 13:1; 14:8; Jn 7:38; Rib 22:1. buhrwi kalahwakat talnayang dai, dawak ma kilwa niningkauh makat yulnin ūni sakdai yakat murwi kiwadai. Was kidika laih makat yulnin ūni kaupak tingpal niningkauh dawak sakripais busnin pāni kaupak wadah niningkaupak murwi yaklakwadai. 2Usnit kat makat yulnin ūni sauni kaupak yaduwi kalahna dai tingpal niningkauh dūr as sakdai munah dawak ahni yakat yaduwi awaihna dai ahni ma kilwa niningkauh dūr sakdai kat. Kiwikawa kaupak wadah niningkauh yakat wastuna as utuhwa sakdai. 3Muih al kidika laih tingni yakat was as duwa kalahwi kiunadai ma kilwa niningkauh yakat, metro 500 kulwi talna dawak was murwa munah yaduwi dakyaklana; was kidika laih burikimak kat dai. 4Usnit kat metro 500 uk kulwi talna dawak was murwa munah yaduwi dakna; bahang was kidika laih kalaskimak kat dai. Metro 500 uk kulwi talna dawak was murwa munah yaduwi dakna; was kidika laih uman bakimak kat dai. 5Metro uk kulwi talna dawak was murwa kidika laih uman was nuhni dai muih as bik dakyaklanin sip-awasdai; wasnuh tuhni kalna waihwi manah dakyaklanin sipdai. 6Bahang yayulna: “Yamni talah ais talaman dai kidika.”
Usnit kat waskung munah yaduaina, 7dawak waskung bupak yakat pan mahni bangkat talnayang dai. 8Bahang yayulna: “Adika wasni laih ma kilwa niningkauh sauni yakat murwi kiwi dawak Jordán wasni yakat kiwi kawi, kidika kaupak laih kuma dauna yakat kalahwi kiwarang ki. Kidika yakat kiwi kawarang mani kat, kuma wasni kidika laih damni kalwarang ki. 9Adika wasni pa angkat kiwarang bik, di wail satni balna bitik dawak waspa dini balna mahni bik sangka karangki. Kat adika wasni laih was tapahlni yakat damni yamna karangki, dawak di sangnika duwa mahni bik bangkarang ki. 10Engadi kaupak En-galim kat kidika waspa dini pamyang balna bangkarang, dawak kidika yakat waspa dini laihnin dini duduwa kidika bubuhna karang. Dawak kidika yakat waspa dini satni mahni minitbayak karang, sihm Mediterráneo kau kapat. 11Kaunah lakun balna dawak wasmak utni balna yakat laih was damni dis karang; kidika laih was wilamni manah karang, kidika kaupak kuma yakna atnin yulni. 12Waskung balna bu kidika yakat laih panmak satni balna kidika bararakwarang. Basnina balna kidika laih sip bubukwas karang, dawak mininikwa kidika bik ban kaput karang. Waiku balna bitik yakat mininikwarang, kat makat yulnin ūni kaupak was kalahwa yakau utuhwa karang bahang. Minik balna kidika laih kasnin dini karang dawak basni balna kidika laih sika karang.#Rib 22:2.
Sau kiwi watwa balna kidika
13“Yang Dawan yang adika lawik yultayang: Adika balna kuduh sau kiwi watwa balna#Nm 34:1-12. Israel sulani balna 12 dipahni duduwarang kidika (José laih sau dakna bu duwarang ki). 14Yang lawik manna muihmana bararak balna yakat pramis diyamnayang dai adika sauni diana atnik. Kapapat sahyakta dutanauh. Adika sauni laih manna dimanapahni karangki.
15“Tingpal niningkauh sau kiwi watwa balna kidika, Mediterráneo kumani kaupak, Hetlón tawanni nuhni munah dawak zedad tawanni nunuhni balna, 16Berota dawak Sibraim munah bayayakwarang (kidika balna laih Damasco sauni dawak Hamat sauni karak walsah yakat bangki), dawak Hazar-haticón laih (Haurán sauni yakat kiwi watwa kidika). 17Kaput bahang, tingpal niningkauh sau kiwi watwa kidika laih Mediterráneo kaupak Hazar-enán kat kiwarang, Damasco dawi Hamat sauni balna kaupak tingpal niningkauh yakat.
18“Ma kilwa niningkauh sau uiwi wawatwa balna kidika laih Haurán sauni dawak Damasco sauni karak walsah yakaupak uiwarang Tamar#47.18 Tamar: sara kau ulna yakat kaput yulwi. Hibru kau laih lakwi kulwi tatalwarang. tawanni nuhni kat, kuma dauna yaihnitkau, Jordán wasni kaupak naikau kidika, kidika laih sau kiwi watwa pāni karang Galaad sauni dawak Israel sauni karak walsah yakat.
19“Wadah niningkauh sau uiwi wawatwa balna kidika laih Tamar kaupak uiwarang, Meriba-cades dawak Egipto wasni munah bayayakwarang Mediterráneo kiwi kawa kat.
20“Ma kawa niningkauh sau kiwi watwa kidika laih Mediterráneo karang, Egipto sauni kiwi watwa kaupak kuma kung kat, Hamat kiwi kawa muhnitkau pakkidika.
21“Adika sauni balna ki, Israel sulani balna 12 sahyakwi duninna kidika. 22Manna yakat dawak sau ūk muihni balna walaninabis karuk manna pasyakat yalalahwa balna kidika bik dininapahni karang. Israel sauni yakat batatahnna kapat dikultanama. Israel sulani balna pasyakat sau sahyaktanama mani kat, witingna yakat bik diatanama. 23Sau ūk muihni balna kidika laih saunina duduna karang sulani as sauni yakat yalalahwa sauni kidika. Yang Dawanyang adika lawik yamnin yultayang.
Currently Selected:
Ezequiel 47: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
