Ezequiel 46
46
Kabamint kayang muihni dawak tawan muihni balna yamninna dini kidika alasna mani balna yakat
1“Yang Papangyang adika lawik yultayang: ma kilwa niningkauh watak paskau dūr sakkidika putni sakatninki wark mani balna ma tiaskauas yakat, dawak apahna karangki yakurupdinin mani yakat dawak waiku wisamni mani yakat bik. 2Kabamint kayang muihni kidika laih ū kiwi kawakau watak pakkidika yakat kana karang ahni niningkauh watak pakkidika kaupak, dawak dūr panani rahni balna kidika yaihnit yakat kiwi yaklauwarang. Kaput laih sumalyang balna yaklau didauh balna kidika sakripais bubuswarang dawak kabamint kayang muihni sakripais buswi watwi wanaihni karak yamni kalahna atnin dini balna duaina kidika bik bubusna karang, dawak witing laih dūr panani rahni yaihnit yakat abukwi muhnikau sau kat sukwi kalahna karang. Dūr kidika laih watwi putwas karang masan kat. 3Yakurupdinin mani balna dawak waiku wisamni mani balna yakat bik, tawan muihni balna kidika laih Dawan muhnityakat witing ayangni tanit nuhni yayamwarang, sihm kidika dūrni muhnityakat. 4Kabamint kayang muihni yaklau yakurupdinin mani yakat didauh balna duaiwarang kidika Dawan yakat minitdis kalanin dini buswi kalana atnin, kidika laih sīp kurih as lalaihna balna manah tiaskauas dawak sīp almuk as ki, bitik laih sakakahwa awaski. 5Sīp almuk as yakat plawar satni minik manah batal 20 kalana karang, dawak sīp kurih as lalaihna balna yakat laih ampus kalanin kulwakat kaput kalana karang. Plawar satni balna minik batal 20 yakat laih, disala batal bas minitkau papusbah kalana karang. 6Waiku wisamni mani yakat laih turuh almuk wahma as, sīp kurih as lalaihna balna kidika tiaskauas dawak sīp almuk as kalana karang, as bik sakahwa awaskat. 7Turuh almuk as yakat plawar satni balna minik 20 kalana karang, dawak sīp kurih as lalaihna balna kidika laih ampus kalanin kulwa kidika kaput kalawarang. Dawak plawar satni balna minik batal 20 yakat laih, disala batal bas minitkau papusbah kalawarang.
8“Kabamint kayang muihni kidika kawarang kat, ū kiwikawa kau watak pakkidika munah kana karang, dawak bik kidika yakut kalahna karang. 9Dawak tawan muihni balna kidika alasna mani balna yakat kawi Dawan yakat ayangni tanit nuhni yayamwarang kat, kaput yamninna karangki: tingpal niningkauh dūrni munah kakawarang kat, wadah niningkauh dūrni munah kalalahna karang, dawak wadah niningkauh dūrni munah kakawarang kidika laih tingpal niningkauh dūrni munah kalalahna karang. Watwi kakana dūrni munah kalalahwas karang, kaunah muhnitkau dūr sakkidika munah kalalahwarang. 10Kabamint kayang muihni kidika laih tawan muihni balna karak kalpakwi kawarang dawak bik sihm witingna karak kalpakwi kalahna karang. 11Alasna satni balna yakat turuh almuk wahma as kidika yakat plawar satni balna minik batal 20 diayana karang, dawak sīp almuk as yakat bik sihm kaput diayana karang; sīp kurih as lalaihna balna yakat laih ampus dianin kukulwarang kidika kaput diayana karang. Plawar satni balna minik batal 20 kidika minityakat baisa disala batal bas minitkau papusbah diayana karang.
12“Kabamint kayang muihni kidika witing kulnin lani minitdis kalanin dini Dawan yakat kalawarang kat, didauh as sakripais karauni kauna yamwi kidik awaskat sakripais yamwi watwi wanaihni karak yamni kalahna atnin yulni yamwi kalawarang kat, ma kilwa niningkauh dūrni kidika apahna karang dawak kidika yakat sakripais kidika yamna karang sihm yakurupdinin mani balna yakat yamwa kaput. Kidika kaupak kalahwarang mani kat, dūr kidika laih putna karangki.
Ma bitik yakat minitdis kalana atnin dini
13“Ma bitik yakat mapiris niningkauh kidika sīp kurih as laihna sakahwa awas kat kalana karang, Dawan yakat sakripais buswi kalana atnin yulni. 14Mapiris balna bitik yakat bik Dawan yakat minitdis kalanin dini plawar satni balna minik batal tiaskaubu dawak disala bik batal as, kidika laih plawar minityakat utuhna karang. Adika Papang dini yaknin kidika laih ban kaput karang. 15Sīp kurih as laihna kat sakripais busnin kidika, dawak minitdis kalanin dini plawar satni balna minik dawak disala kidika balna laih mapiris niningkauh yakat duaininna karangki.#Ex 29:38-42.
Sau lani kabamint kayang muihni yamnin dini kidika
16“Yang Dawanyang adika lawik yultayang: kabamint kayang muihni kidika walanibis ahal balna yapak as yakat witing sauni kidika kaupak apis kalawarang kat, kidika laih witing sulani balna dinina kalwarangki. 17Kaunah kabamint kayang muihni kidika yaklau witing sauni kidika kaupak apis dini yamyang balna kaupak as yakat kalawarang kat, kidika laih witing dini kalwarangki pri#Lv 25:10. dapamwakat kalahkiwarang mani kat, dini yamyang kidika kalahwi kiwarang mani kat, dawak kidika laih witing walanibis balna dininapahni kalwarangki. 18Kabamint kayang muihni kidika laih witing rahmni diski muihni balna yakat dinina dakyakna atnin. Walanibis balna yakat dipahni diawarang kidika laih, witing dini balna kaupak diawarang; kaput laih muih as bik di dis awas karang dawak tawanki muihni balna kidika bik kalrarawas karang.”
Makat yulni ūni kubusni balna
19Usnit kat muih al kidika yaklau dūr niningkauh ta kawadai kidika yakat yaduwi kiunadai, tingpal niningkauh ū pas daklana balna Papang dini yakwi sumalyang balna yakat diayana bangdai kau. Ma kawa niningkauh yakat pa as nikingkana, dawak dangnit niningkauh yakat, 20yayulna: “Adika pāni akat sumalyang balna yaklau muih dutnina yulni didauh balna sakripais yayamna muihni kidika lalahwarang, kidik awasbik minitdis kalanin dini plawar satni balna minik kidika lalahwarang. Kaput laih kidika dini balna kidika ahni watak yakat yayakwas karang, dawak tawan muihni balna bik Papang dini yakna balna yakat lalaihwas karang.”
21-22Usnit kat ahni watak yakat yaduwi kiuna dawak yāpakwakat sipintang balna arungkapak lapaknayang. Ahnikau watak sipintang balna kidika watak dibindauh#46.21-22 Dibindauh: grik kau kaput ki. Hibru kau laih amangladaski. as duduwakat talnayang dai. Bitik kau sihm kapapat dai naini niningkauh kidika metro 20 dawak pirihta niningkauh kidika laih metro 15 duwadai; 23kidika balna yaihnit yakat kipala kau daklana as tusdai, dawak kidika daklana naini kidika saryakat kuh mahni mumukna kat dahlwabangdai. 24Bahang yayulna: “Adika ki kubus balna makat yulnin ūni yakat wark yamyang balna kidika, tawan muihni balna yaklau didauh balna sakripais yamnin duahaiwakat lalahwarang kidika.”
Currently Selected:
Ezequiel 46: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
