Ezequiel 48
48
Sulani balna pasyakat sau sahyakwi duduna kidika
1-7“Adika balna kuduh sulani balna ayangnina kidika.
“Tingpal niningkauh sau kiwi watwa kaupak, Mediterráneo kaupak kiwi Hetlón munah bayakwa kidika, Hamat dawi Hazar-enán karak uiwawatwa kau, Damasco dawi Hamat sauni kaupak wadah niningkauh, sulani balna kat kat kidika sau dakna as as duduwarang ma kilwa niningkauh sau kiwi watwa kidika kaupak ma kawa niningkauh sau kiwi watwa kat, akat bang aput:
Dan
Aser
Neftalí
Manasés
Efraín
Rubén
Judá
8“Usnit kat sau as kaiwarang kidika laih apaktanama, dawak kidika bik sihm naini ma kilwa kaupak ma kawa kat kidika. Pirihta niningkauh laih kilómetro 12 minitkau papusbah duwarang, dawak naini niningkauh laih ma kilwa niningkauh dawak ma kawa niningkauh ampus duwa kat sihm kaput duwarang. Kidika papusyakat makat yulni ūni kidika sakkarang.
Sau Dawan dini yakna kidika
(Ez 45:1-6)
9“Adika sauni pas-akat sau dakni as Dawan dini yakna kidika laih naini niningkauh kidika kilómetro 12 minitkau papusbah duwarang dawak pirihta niningkauh laih kilómetro salap#48.9 Salap: kaput ulna kidika yamni kapat ki. Hibru kau, singka. duwarang. 10Adika sauni dakna pas-akat sau ūk Papang dini yakna pakkarang sumalyang balna manah dinina; tingpal niningkauh dawak wadah niningkauh laih kilómetro 12 minitkau papusbah duduwa karang, dawak ma kilwa niningkauh dawak ma kawa niningkauh laih kilómetro singka duduwa karang. Makat yulnin ūni Dawan dini kidika laih papusyakat sakkarang. 11Adika sauni laih apakna sakkarang sumalyang balna Dawan dini yakna balna kidika dinina, Sadoc sulani balna, yang warkki balna yayamna kidika Israel balna yang taki balna kaupak kalalahwak usnitna uiwas dawi, sihm libait balna yayamna kapat. 12Kidika bahang, sau dakna as Dawan dini yakna kidika pasyakat, libait balna saunina yaihnit kau, sumalyang balna laih sau as dakna as duduwa karangki, sau Papang dini yakna kidika. 13Libait muihni balna laih Sumalyang balna saunina yaihnit yakat, sau duduwa karang, kidika naini niningkauh laih kilómetro 12 minitkau papusbah duwa karang dawak pirihta niningkauh laih kilómetro singka duwa karang. Sau Dawan dini yakna kidika bitik kat, naini niningkauh kidika kilómetro 12 minitkau papusbah dawak pirihta#48.13 Talah S.d. 9 yakat. niningkauh kidika laih kilómetro salap duwa karang. 14Adika karang sau dakna as yamni kidika adika sauni akat. Kidika kaupak apis bik muih uk kau kalbakannin kidika awaskat di wirihnin kidika awaskat muih uk kau kalana atnin sip-awas karang, kat Dawan dini yakna bahang.
15“Baisa sau sutni naini niningkauh kilómetro 12 minitkau papusbah dawak pirihta niningkauh laih kilómetro bu minitkau papusbah watwa kidika laih, Papang dini yakna awas karang. Kidika pāni yakat muih balna kidika yalalahna karang dawak kidika yakat bik turuh kasnin sihrsihr balna kidika manas karang. Kidika papusyakat tawan nuhni kidika pakkarang, 16kidika sauni laih rabutni karang pirini balna arungka kidika laih metro 2,250 duwa karang. 17Tawan nuhni kidika yaihnit yakat sihrsihr kidika pakkarang, kidika pirihta niningkauh pirini arungka balna kidika laih metro 125 duwa karang. 18Tawan nuhni kidika pirini balna yakat sau as pakki sau dakni as Dawan dini yakna kidika yaihnit yakat, kidika laih ma kilwa niningyak naini niningkauh kidika kilómetro singka duwi dawak ma kawa niningkauh bik sihm kaput duwi. Adika sauni laih di dahwi di minik yakna karang, dawak di minik balna kalahwarang kidika laih tawan nuhni pasyakat muih balna wark kalalahwa kidika kakaswarang. 19Israel sulani balna kidika kaupak pini, tawan nuhni yakat wark kalalahwarang kidika laih, kidika sauni yakat di dadahwarang. 20Sau nuhni kaput laihwatna sakkidika, Dawan dini yakwi dana kidika dawak baisa kidika minityakat tawan nuhni sauni kidika bitik banawakat sau rabutni as kalwarang, kidika pirini balna arungka kidika laih kilómetro 12 minitkau papusbah duduwa karang.
Kabamint kayang sauni kidika
(Ez 45:7-8)
21-22“Kabamint kayang muihni kidika laih Judá sauni dawak Benjamín sauni karak walsahkau sau watwa kidika duna karang; yuldarangkat, Dawan sauni yakwi kalana kidika dawak tawan nuhni sauni kidika pirini balna kau sau bangkidika. Kidika pirihta niningkauh laih kilómetro 12 minitkau papusbah duwa karang, dawak panuhni kidika laih ma kilwa kaupak ma kilwa niningkauh sau kiwi watwa kat karang, dawak ma kawa niningkauh laih kuma kat karang. Kidika papusyakat Dawan sauni yakna kidika dawak makat yulnin ūni kidika, baisa kidika minityakat libait balna saunina dawak tawan nuhni sauni kidika bik pakdai.
Sulani balna ūk saunina kidika
23-27“Sulani balna ūk saunina kidika laih wadah niningyakauh pakki. Sulani as kidika sau dakna as duwarang ma kilwa niningkauh sau kiwi watwa kaupak ma kawa niningkauh sau kiwi watwa kat, akat bang-aput:
Benjamín
Simeón
Isacar
Zabulón
Gad
28“Gad sauni kaupak wadah niningkauh yakat, sau kiwi watwa kidika laih Tamar kaupak kiwarang, Meriba-cades asangnipas munah dawak Egipto wasni munah bayakwi kiwarang, Mediterráneo kumani kat.
29“Adika sauni kuduh Israel sulani balna dininapahni duduwarang kidika, dawak aput laih manna sahyakta dunamana karang. Yang Dawanyang adika lawik yamnin yultayang.
Jerusalén dūrni balna
30-34“Tawan nuhni yaihnit kidika laih daklawi awaihdana karang, pirini arungka balna kidika laih metro 2,250 duduwa karang. Daklana pirini as yakat dūr bas duwa karang, dūr balna kidika Israel sulani balna as as dinina karang, akat bang-aput: Tingpal niningkauh dūrni balna: Rubén, Judá dawak Leví yakat; ma kilwa niningkauh dūrni balna: José, Benjamín dawak Dan yakat; wadah niningkauh dūrni balna: Simeón, Isacar dawak Zabulón yakat; ma kawa niningkauh dūrni balna: Gad, Aser dawak Neftalí yakat. 35Daklana awaihna naini niningkauh kidika bitik kat metro 9000 duwa karang, dawak tawan nuhni ayangni kidika laih muhnityakat ulna karang: ‘Dawan laih akat sakki’.”#Rib 21:12-13.
Currently Selected:
Ezequiel 48: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
