Ezequiel 45
45
Sau pis as Dawan dini yakna kidika
(Ez 48:9-20)
1“Manna sau kidika suerte kau ruhmta talnama mani kat sulanina balna kat kat diana atnin yulni, sau dakni as laihwattanama, naini niningkauh kidika kilómetro 12 minitkau papusbah dawak pirihta niningkauh laih kilómetro salap,#45.1 Salap: grik kau kaput ulna. Hibru kau laih singka. kidika laih Dawan dini yakna karangki. 2Kidika kaupak makat yulnin ūni dini kidika yakwi dana karangki, sau rabutni as pirini arungka balna kidika laih metro 250 duduwa karang, dawak yaihnit awaihwa balna kau sihrsihr manah kidika pirihta niningkauh laih metro 25 duwa karang. 3Dawan dini yakwi dana kidika laih sau as naini niningkauh kidika kilómetro 12 minitkau papusbah duwa karang dawak pirihta niningkauh laih kilómetro singka duwa karang, kidika laih Papang dini yakna palni karang: kidika pāni yakat makat yulnin ūni kidika sakkarang. 4Kidika sauni kidika laih sumalyang balna yakat diana karang Dawan ūni yakat wark yayamna kidika dawak bik witing yaihnit yakat uiwi dini yayamwa kidika. Kidika sauni yakat witingna ūnina papakna karang. Kidika laih sau as Papang dini yakwi dana karang, makat yulnin ūni dini. 5Baisa kidika minityakat, sau uk pakkarang naini niningkauh kilómetro 12 minitkau papusbah dawak pirihta niningkauh kidika laih kilómetro singka, kidika laih libait muihni balna makat yulnin ūni yakat wark yayamwa balna kidika dinina, kaput laih witingna tawannina nunuhni balna duwi yalahna atninna.#45.5 Witingna tawannina nunuhni balna duwi yalahna atninna: grik kau kaput ulna. Hibru kau laih payahnin pāni daklana 20. 6Witni kat, tawan nuhni kidika sau as yakwi duna atninki naini niningkauh laih kilómetro 12 minitkau papusbah dawak pirihta niningkauh laih kilómetro bu minitkau papusbah, sau dakni as Papang dini yakna kidika yaihnit yakat. Adika sauni laih Israel muihni balna dinina karang.
Kabamint kayang muihni yakat sauni yakwi kalna kidika
(Ez 48:21-22)
7“Kabamint kayang muihni kidika sauni bik as yakwi dana pakkarang. Sau dakni as kidika laih ma kilwa niningyakauh pakkarang dawak dakni uk kidika laih ma kawa niningyakauh pakkarang, yuldarangkat, Papang dini yakna kidika dawak tawan nuhni yamnin sauni kidika pirini balna yakat. Ma kilwa kaupak ma kawa kat, naini niningkauh kidika, sulani balna paskaupak as kalana atnin sauni naini kidika kaput karang. 8Adika sauni laih Israel kabamintni kayang kidika dini karang; kaput laih kabamint kayang balna kidika watwi yang tawanki yakat tataihwas karang, kaunah saunina kidika laih Israel sulani balna ampus kat kidika balna yakat diayawarang.
Kabamint kayang lani balna kidika
9“Yang Dawanyang adika lawik yultayang: ¡Kamahn aitaniki Israel kabamintni kayang balna! ¡Baisa dutni yayamwinih dawak bik dakyayakwinih! ¡Lā balna kat barangni yamtanauh! ¡Yang tawanki sauni maltamana kidika datanauh! Yang Dawanyang adika lawik yamnin yultayang.
10“Paun ānin dini balna kidika yayamnikat yusyamtanauh.#Lv 19:36. 11Di minik balna paun -ānin dini kidika laih sihm kapat atninki di wasni balna paun -ānin dini kidika karak. Homer 220 batal kidika laih tatuna karang. Di wasni manah bato as kidika laih homer sahyakna salap kaupak as duwa atninki, dawak di minik manah efa as kidika bik sihm homer sahyakna salap kaupak as duwa atninki.
12“Di tikini balna paun -ānin kidika bik sihm kapatki: Geras 20 kidika laih siclo as kalwi, dawak tikini niningkauh laih gramos 11 duwi; siclo 60 kidika mina as duwi.
13“Adika minitdis kalanin dini balna kidika yamtanama: plamanawar balna dawak cebada balna minik kidika sahyakna 60 yaktanama sihm kapapat, dawak kidika balna kaupak as, minitdis kalanin dini yakat ātanama. 14Disala dutanama kidika bik sahyakna 100 sahyaktanama sihm kapapat, dawak kidika balna kaupak as, minitdis kalanin yakat ātanama.#45.14 S.d. 13-14 yakat wirlana kidika laih baisa lāih yakna amanglana atnin. Hibru kau laih, sara mani kukulwa dini dai yakat bikisni bitik lakwi kulna. 15Sīp balna niningkauh kidika laih, 200 balna paskaupak as as duma, Israel sihrni sihr yayamni balna kidika paskaupak. Adika balna laih minitdis kalanin dini plawar satni balna minik, sakripais karauni kauna balna kidika dawak sakripais yamwi wanaihni karak watwi yamni kalahnin dini balna karang, dutnina dawak disnin yulni bubuswa kidika. Yang Papangyang adika lawik yamnin yultayang.
16“Adika sauni bitik yakat muih balna kidika laih adika minitdis kalanin dini kidika Israel kabamintni yakat kalaninna ki, 17witing yaklau didauh balna sakripais karauni kauna yamnin kidika diawa karang, dawak waiku wisam balna yakat, yakurupdinin mani#45.17 Yakurupdinin mani: kidika laih satadi mani. balna yakat dawak Israel alasnina mani balna yakat bik minitdis kalanin dini plawar satni balna minik dawak wain kauna bik diawa karang. Dutnina yulni sakripais yamnin kidika, minitdis kalanin dini plawar satni balna minik, sakripais karauni balna kauna dawak sakripais yamwi watwi wanaihni karak yamni kalahna atnin balna kidika bik duaina karang, Israel dutni dawak dinin yulni.
Innisal kaiwi bayakna mani alasnina
18“Yang Dawanyang adika lawik yultayang: waiku tatuna kalahwak ma tatuna yakat manna lawa sakripais yamtanama turuh almuk wahma as sakahwa awaskat, makat yulnin ūni kidika dutni kaupak maisihnidis yamna atnin. 19Sumalyang yaklau dutnina yulni didauh sakripais yamna āni kidika duwi makat yulnin ūni dūrni rahni balna yakat, sakripais busnin pāni sipintang arungka balna yakat dawak watak paskau dūrni balna rahni yakat bik kahwarang. 20Kidika wainiku ma tiaskaubu yakat sihm kaput yamwarang wais kat isning aiwas dutni as yamna kidika yulni. Kaput laih makat yulni ūni kidika maisihnidis yamna karang. 21Waiku tatuna kawak ma tatuna yakat manna insal kaiwi bayakna mani alasnina kidika yamtanama, dawak ma tiaskaubu pasyakat plawar pupuhnin dini dis busna kidika kastanama.#Ex 12:1-20; Nm 28:16-25. 22Kidika mani kabamint kayang muihni kidika turuh almuk wahma as sakripais yamwarang witingna silp dawak tawan muihni balna bik dutnina yulni, 23dawak ma tiaskaubu alasna manah karang kidika turuh ahalmuk wawahma tiaskaubu dawak sīp ahalmuk tiaskaubu sakakahwa awaskat duahaiwarang, Dawan yakat sakripais karauni kauna buswi kalana atnin. Baisa kidika minityakat, ma as yakat kuts almuk as sakripais yamwa karang dutnina yulni. 24Turuh almuk as dawak sīp almuk as kidika yakat minitdis kalanin dini plawar satni balna minik batal 20 dawak disala batal bu minitkau papusbah minitlakna karang.
Panting kau ū labanni yayamna dai kidika alasnina
25“Pan ting kau ū labanni yayamna dai#Lv 23:33-36; Nm 29:12-38. kidika alasnina yakat bik, waiku tiaskaubu kawak ma 15 yakat alasnina yamna kidika, kabamint kayang muihni kidika laih ma tiaskaubu pasyakat sakripais yamnin ki, ma yapak kat kaput sakripais yamwarang dutnina yulni, didauh bik kaput buswarang dawak sihm minitdis kalanin dini plawar minik satni balna dawak disala kauna duaiwarang.
Currently Selected:
Ezequiel 45: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
