Ezequiel 39
39
Gog sip awas kalahna
1“Dawak, man muih al, yang ayangki kau duta yulta Gog niningyakat, dawak aput kalyulta: ‘Adika Papang yulwi: Gog, Mesec dawak Tubal tanituna nuhni, yang man waihmala alahwayang. 2Mayamting nawatma, tingpal niningkauh naikaupak mayakki, dawak maduaiki Israel asangni balna yakat. 3Usnit kat, man tingma wadahma kau las dutalikman kidika bahpamki, dawak bik yamtingkat tingmapal kau sibang dutalikman kidika bubukwarang. 4Man dawak kalbauyang muihni balna dutaman kidika, dawak tawan balna man karak bangkidika, dauta buktanama Israel asangni balna yakat. Kidika yakat uhu balna satnina yakat manadaki, kaput bik laih nawah balna bik manakakasna karang. 5Asangpas ahni manah yakat buktanama. Yang, Papangyang kat yulnayang. Yang yulki kidika manatayang. 6Kuhpau sihna awaki Magog minit yakat, dawak kuma paskau muih balna kulwi kalbabauwas balna minitna yakat bik. Kaput laih amanglalawarang yang adika Papangyang. 7Yang yamtingkat ayangki maisihnidis kidika tawanki Israel kidika amanglawarang, dawakat datingkat watwi laih dutni yuyulna-awas karang ayangki kidika. Dawak nisan ūk balna kidika amanglalawarang, yang Papang holi yang kat Israel yakat niningkatayang kidika. 8Yultayang mani kidika kaiwi kawarang, rahm palni. Yang, Papangyang kat yultayang.’
9“Israel muihni balna kidika tawan nunuhni yakat yalalahwa kidika witingna kalahwi kalbaunin dini duduwa balna kidika bitik bubuswarang, nanitna daknin, las, sibang, langsa, dawak witingna kidika kaupak kuh manas duduna karang bina kurih tiaskauas kat. 10Witingna asangpas yakat uiwi kuh wawalwas karang, dawak pan balna bik dadakwas karang, kat kalbaunin dini balna dai kidika kaupak kuh manas duduna karang bahang. Kaput laih witingna yaklauwi dinina duduna muihni balna dai yakat biriwi dinina dakyayakna karang. Yang Papangyang kat yultayang.
Gog nununa
11“Kidika mani balna yakat Gog yakat pa as kalaki Israel sauni yakat, wawatwa balna langni pakkidika kuma muhnitkau, kidika yakat nuna atnin. Kidika pāni yakut bayaknin-awas karang, kat kidika pāni laih Gog dawak witing kalbauyang balna duwa kidika karak dinununa karang bahang, dawak kidika sauni langni laih ayangni papakna karang; Gog ahalni kalbauyang balna saunina langni. 12Israel balna, witingna waiku tiaskaubu laihwak kat nuwi dadana karang, dawak kaput laih witingna saunina bitik klin dadana karang. 13Muih balna bitik laih muih dadauna kidika nuna manah bangkarang, dawak witingna niningna yakat ayangni nuhni yamnin as karang. Kidika mani yang alaskina nuhni kidika lāih yakna awaki. Yang, Papangyang kat yultayang. 14Kidika minityakat, waiku tiaskaubu bayakwakat, muih buas witingna saunina bangkidika bitik awaihwi tatalwarang, dawak buas sau yakat bubukna balna nunuwas dadana kidika nununa karang#39.14 Nununa karang: sarakau ulna kidika kaput ki. Hibru kau laih minityakat lakwi: kidika yakūt bayayakwa kidika. kaput laih klin dana atnin. 15Awaihwi tatalwa muihni balna kidika uiwakat muih wakal as tuskat tatalwarang kat, kidika yakat sain as yamsasakwarang, muih amanglatayang muihni balna uiwi nuna atnin, Gog ahalni kalbauyang balna saunina langni yakat. 16(Kaput bik tawan nuhni as pakki ayangni laih Kalbauyang ahalni balna.) Kaput laih witingna saunina kidika klin dadana karang.”
17Papang yaklauwi yayulna: “Di yulta uhu balna dawak di anyang balna bitik witingna kaluduhwi aiwang Israel asangni akat, kidika yakat witingna dinina sakripais yamki bahang. witingna sipkarang di muihni kasna atnin dawak ā bik dina atnin; 18witingna kakaswarang kalbauyang balna muihnina kidika dawak sau akat kabamintni balna ānina bik didina karang, sihm Basán sīpni, kutsni āni kapat. 19Kidika sakripais witingna dinina yamki kidika, salani kaswi siknis kalalahwarang, dawak āni diwi wasak dadauwarang. 20Di kasnin dini as ridi yamtik diaki aras muihni kau, dawak aras kilyang balna muihni kau bik, dawak kaput bik, kalbauyang satni balna muihnina kau bik, kaput laih kakaswak dibahngwarang. Yang, Papangyang kat yultayang.#Rib 19:17-18.
Israel kidika watwi laihwi dulauna
21“Aput yang alaskina yaksihni kidika nisan balna yakat niningna kaki ki. Kaput bik laih nisan balna bitik tatalwarang amput la barangni yamnayang kidika dawak wah bik dianayang kidika. 22Kidika mani kaupak tanit yakat ma balna kaiwarang kidika Israel amanglana karang yang laih witing Papangniyang. 23Dawakat nisan ūk balna kidika amanglalawarang, Israel kidika pa ūk yakat laihwi duwi kiuna dai witingna dutni yayamna kidika yulni, kat yang akat barangni-awasdai bahang; kaput dawak yang bik dangbuh danayang bahang datingkat waihninala balna kidika yaklauwi witingna yakat minitna bayayakna ihina bitik war pasyakat. 24Yang diyamnayang witingna minitna dunin praisni kat dutni yayamna kidika dawak kulninna dutni kidika yulni bik, yang dangbahnayang.
25“Kidika bahang yang Papangyang kat yultayang: Waradika laih minikun talnin kidika diaki, Israel tawanni balna bitik yakat, Jacob sulani balna kidika. Yamtingkat witingna suerninati kidika satuk wirlana karang, dawak witingna yakat paktingkat ayangki holi kidika nuhni yayamna karang. 26-27Yang lawik wattik uduhna awaki nisan ūk balna paskaupak yaktik duaiki, waihla balna paskaupak, kaput laih witingna isningnalak yalalahwarang witingna silp saunina kat, muih as bik bilninalauwas karang. Kaput yamtik holi yang kidika nisan balna manas talnin sipkarang. Israel balna risninapik dis lani kidika wawauhna karang yang akat barangni awasdai bahang. 28Yang lawik sihnayang dai kauhmak wanilang kau nisan balna bangkidika pasyakat, dawak yang lawik wattik uduhki witingna saunina yakat. As bik dating kat muih ūk balna panina yakat lik-awas karang. Kaput laih witingna amanglalawarang, yang adika witingna Papangnina yang. 29Yang wattik dangbahtas awaki witingna yakat, kat yang paraski kidika Israel tawanni minit yakat utuhnayang bahang. Yang, Papangyang kat yultayang.”
Currently Selected:
Ezequiel 39: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
