Ezequiel 38
38
Gog kidika Papang yaklauwi yusyamna
1Papang, yang akat kaiwi yayulna: 2“Man, muih al, Magog sauni yakat nawatta yawah, dawak kalyulta yang ayangki kau yakta Gog niningyakat,#Rib 20:8. Mesec dawak Tubal tanituna nuhni kidika yakat. 3Kalyulta: ‘Adika Papang yulwi: Gog, Mesec dawak Tubal tanituna nuhni, yang man waihmala alahwayang. 4Yang lawik mayamting nawatma, dawak tamapas yakat pan rahni as āki, man kidika mayakki, dawak muihma balna dutalikman kidika balna bitik, aras kau kilwi praknina yaksihni kakana balna kidika bitik, kidika kalbauyang balna tingnina yakat isparah dawak nanitna daknin dini satni bitik duduwa balna kidika bitik 5Uinakarang kalpakwi, Persia, Etiopía dawak Libia muihni balna bitik, bahang witingna balna bitik laih nanitna daknin dawak pakninna balna bitik duwi uina, 6kaput bik Gomer dawak Bettogarma witingna kalbauyang duduwa muihni balna bitik dai, bahang witingna laih tingpal niningkau naikaupak auina dai, tawan mahni witing karak aslah kalalahna dai kidika. 7Mahka ridi alahwa kalbaunam dini kidika duta, man dawak kalbauyang muihni balna dutalikman kidika balna bitik; man parasma dinit yakat āta dutah. 8Kurih mahni bayakwak ismangpakna karang sau as yakat yawa kalbauna atnam, bahang kidika sauni laih tanit mani kau war kalbauna dai, kauna waralaih uman yamni kalna kapatki; tawan as nisan balna mahni pasyakat ruhwi kiuna dawak witingna kidika bitik laih buswi bayakna dai, kauna watwi kaluduhna kapatki Israel asangni balna yakat. Kaput kat witingna kidika sau manas kaupak nawatwi uina kapatki, dawak witingna kidika isningnalak yalalahwa kapatki. 9Man yawama, mukus sani as kapat, dawak wing bauwa kapat yawa āwama kalbauyang muihni balna dutaman kidika dawak tawan mahni aslah kalpapakna kidika.
10‘Yang, Papangyang kat yultayang: Kidika mani balna yakat wark dutni yamnin kidika kulnam yakat kaiwarang. 11Yulma: Sau as nanitdaknin sip-awas kidika niningyakat yawik kalbauki, muihni balna kidika isningnalak yalalahwi, tawannina nunuhni balna kidika daklana diski, dūr bik diski. 12Yawik dini balna kidika laihtik duki, malki; dawak tawan nunuhni balna daukalna kat watwi laihwi dulauwi yayamna balna kidika niningna yakat bik kalbauki, nisan mahni kaluduhna balna kidika, dawak witingna kidika laih tinglau duduwi dawak di ūk balna bik duduwi, bahang witingna laih sau papus palni yakat yalalahwi. 13Sabá dawak Dedán muihni balna, kaput bik Tarsis muihni di wauhwi bakanyang balna, dawak tawan nunuhni ūk balna bik mayulwi dakakawarang: ¿Di malna aiwanamahn? ¿Kalbauyang muihni balna uduhta dunamahn aiwa di balna kidika duna atnam lalah, gol, tinglau balna, dawak dinina ūk balna kidika bik, ritsni mahni duwi kiuna atnin?’
14“Yamniki, ayangni kau yakta yulta Gog yakat, dawak kalyulta aput: ‘Adika Papang yulwi: Yang tawanki Israel kidika isninglak yalahwarang kat, man mahka lawa lapakma#38.14 Mahka lawa lapakma: grik kau kaput ulna. Hibru kau laih yulwi amanglama. 15sauma kaupak, tingpal niningkauh pa naikaupak kalbauyang balna mahni, pararasni dawak aras kau kilna balna kidika karak bik aiwa, 16yang tawanki Israel niningyakat kalbautanama. Man, Gog, sau minit kidika bitik muklak dama mukus sani kapat. Kidika mani witni balna yakat matingkat yang sauni niningyakat aiwama, man munah nisan ūk balna kidika amangkilana atnin, yang maisihni disyang kidika niningnakating kat.
17‘Yang, Papangyang kat yultayang: ma balna bayakna yakat yulnayang dai kidika laih man, yang prakipit balna munah yulnayang dai kidika; yang yulnayang dai kidika mani balna yakat, matingkat aiwa Israel niningyakat kalbauna atnam.’
Gog yakat wah kalana
18“Papang yulwi, yang: Gog yaklauwi Israel yakat kiwi kalbauwarang mani yakat, yang kulnik daukalna kidika yamadangni palni dahlna karangki. 19Yang kulnik daukalna karang yakat, yang rahm yultayang, kidika mani, sau parasni isihna karang Israel yakat. 20Kuma kau waspa dini balna, makau uhu binina, di anyang balna dawak bil satni balna bik diyukna karang yang muhki yakat, sau muihni balna bik kaput yayamna karang. Asang nunuhni balna kidika ihrna karang, kipala nunuhni balna bik bubukna karang, dawak daklana balna kidika bitik laih sau yakat manah bubukna karang. 21-22Yang lawik yamtingkat Gog minit yakat di dutni balna kidika kiuna karang dawak muihsak dauna karang.#38.21-22 Dutni balna...muihsak dauna karang: grik kau kidika kaput ulna. Hibru kau laih yulwi yang asangki balna dawak isparah. Wah kalana awaki daunin kau, siknis balna kau, dawak daunin dutni balna kau bik. Yamtingkat witing minit yakat bukna karang, dawak kalbauyang muihni balna duwalikkidika, kaput bik tawan mahni witing karak kalpakna bangkidika balna yakat bik, was parasni launa karang, minik balna bik uhna karang ma kaupak, kuhpau dawak sulhpa bik uhna karang, dawak witing muihni balna kidika biri biri isninaparah kau kalihiwarang. Yang Papangyang kat yultayang. 23Kaput laih tawan mahni balna yakat niningnakana awaki yang paraski dawak maisihni bik disyang kidika. Yang lawik witingna yakat lāih alahwaki, dawak witingna amanglalawarang yang laih Papangyang kidika.
Currently Selected:
Ezequiel 38: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
