Ezequiel 37
37
Muih wakalni buhlana balna
1Papang tingni kidika yang mikit yakat yuna, dawakat yamwak witing parasni kidika yabuhngdana, dawakat langni as kat muih wakalni manah yakat yaduwi kiuna. 2Dawak Papang yaklauwi yamwak bitik awaihtik talnayang; wakal balna kidika sangni kidika bitik bunghdai, mahni palni dai, dawak wakalni balna kidika yamni buhlalana dai. 3Kaput laih yayulna: “¿Man sip kultaman wakal balna kidika watwi sangninaka duduwarang?” Yang lawik nangnitlana yang: “Papang, kidika laih man manah amanglataman.”
4Kaput laih Papang yaklauwi yayulna: “Yang ayangki kau yakta wakal balna yakat diyultang aput: ‘Wakal buhlana, dakanauh adika Papang yulni kidika. 5Papang yaklauwi manayulwi: Yamtingkat manna sangmanaka dutanama, kaput laih watta sangka kalna atnamna. 6Wakalmana salauhni kidika ātik manaki, dawak muihmana bik atik manaki, umanatak, dawak sangmanaka manaki sangka kalnamna yulni. Kaput dawak manna amangkilatanama, yang adika Papangyang.’ ” 7Yang yulbaunayang, witing yaklauwi yapakna kaput. Dawak yang yulbautasakyang kat, di as dakanayang: kidika laih sau isihna, dawak wakal balna kidika mahka kal-libibitna. 8Dawak talnayang, witingna minitna yakat wakalni salauhni balna dawak muihni unitak balna bik aiwi kalalahwakat. Kaunah sangninaka laih disdai.
9Kaput laih Papang yaklauwi yayulna: “Yang ayangki kau yakta yulta sangnika yakat, dawak aput yulta: ‘Papang aput yulwi: sangnika man kidika, aiwah sau sutni arungkapak, dawak sangnika diata adika muihni dauna balna sangninaka dis balna yakat.’ ” 10Yang, Papang ayangni kau yulnayang, witing yaklauwi yapakna kaput, dawak sangnika kidika kaiwi witingna yakat kana, dawak witingna sangka kalwi kalnina kau yaklalauna.#Rib 11:11. Mahni palni dai, kalbauyang balna kaluduhna nuhni as kalnadai.
11Kaput dawak Papang yaklauwi yayulna: “Israel tawanni kidika laih sihm kidika wakal balna kapat ki. Witing yuyulwi: ‘wakal balna buhlalana, tahnin as bik dudaski, bahang disnamayang.’ 12Yamniki, bahang yang ayangki kau diyulta aput: ‘Adika Papang yulwi: Yang tawanki, manna saumana-ū balna kidika apahki; dawak kidika kaupak manayaktik Israel sauni yakat manasihki. 13Yang lawik manna saumana-ū kidika apahtik kidika kaupak manayakting kat amanglatanama, yang tawanki, yang laih Papangyang. 14Manna yakat yang sangkika dutayang kidika āna awaki, dawak manna sangka alahwanama, dawakat manna saumana palni yakat manaki. Kaput dawak manna amanglatanama, yang laih Papangyang, yulnayang, dawak yamnayang. Yang Papangyang kat yultayang.’ ”
Judá dawak Israel karak watwi panina diawi
15Papang, yang akat kaiwi yayulna: 16“Pan as duta kidika yakat ultah aput: ‘Judá dawak Israel balna karak aslah kalalahna kidika’. Usnit kat pan ūk duta ultah: ‘José laih Efraín pāni yakat, dawak Israel muihni balna ūk karak aslah kalalahna balna bitik kidika kauna.’ 17Usnitkat, man tingma yakat bupak libitta, yuldarangkat aslah atnin. 18Manna aslahmana kidika manayulwarang: ‘Adika tanka maiyulta’ matwarangkat, 19diyulta: ‘José panan kidika laihtik duki, Efraín tingni yakat duwasak kidika dawak Israel balna karak aslah kalalahna muihni balna kidika bik, dawakat pan ūk yakarak libitki, pan aslah yamna atnin yulni yang tingki yakat.’ 20Tingmana yakat dutanauh, witingna muhnina yakat, pan bu man ulnaman dai kidika. 21Usnit dawak diyulta: ‘Papang adika yulwi: Yang Israel balna kidika yakna awaki nisan balna pasyakat uiwi wawatna kidika kaupak; pa bitik kaupak waltik duaitik uduhki, dawak yamtingkat watwi saunina yakat aiwarang. 22Witingna kidika nisan aslah yamna awaki adika pāni Israel asangni akat, dawak witingna king aslah duduwarang. Witingna kidika watwi nisan bu sahyakna awas karang, dawak king bu naikau naikau bik awas karang. 23Watwi bik dawan dauh balna yakat minitna yuyulwi maisihni kalkakahwas karang, dawak dutni balna manas bik yayamwas karang. Yang lawik laihtik yakna awaki, barangni awas#37.23 Barangni awas: sara manikau ulna kidika kaput yulwi. Hibru kau laih payahnin ū balna. yayamwa balna kidika kaupak, dutni yayamwa kidika kaupak klin diyamki. Witingna kidika yang tawanki balna karang dawak yang laih witingna Papangnina awaki. 24Yang diki yamyang Devid kidika witing manah king karang, dawak ūk diskarang witing manah karang sīpnina maintalyang kidika,#Ez 34:24. dawak witingna yulki balna dakakawarang, laki balna kat yayamna karang. 25Yang diki yamyang Jacob yakat sau kalanayang dai yakat witingna yalalahna karang, dawak kidika pāni yakat muihnina bararak balna yalalahna dai yakat. Kidika yakat witingna dawak walaninabis balna bik ban kaput yalalahna karang, dawak sulanina balna kalalahwarang balna kidika bitik; dawak diki yamyang Devid kidika witingna taninatuna ban karang. 26Witingna karak pramis as yamki bahang kidika laih witingna isningnalak yalahninna yulni. Kidika pramis laih ban kaput karang sarandis. Yamting kat witingna kidika mahni kakalna karang, dawak witingna pasyakat ban kaput atnin āna awaki ūki holi kidika. 27Witingna pasningna yakat yalahki, dawak yang laih witingna Papangnina awaki, dawak witingna kidika laih yang tawanki balna karang.#2 Kor 6:16; Rib 21:3. 28Yang ūki holi kidika witingna pasningna yakat ban sakkarang mani balna yakat, nisan balna ūk kidika amanglalawarang yang lawik Israel kidika yaktik dunayang yang palni diki holi kapat.’ ”
Currently Selected:
Ezequiel 37: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
