Ezequiel 11
11
Jerusalén wahni
1Papang parasni kau yadulauwi yadu'kiuna, Papang uni dūrni, ma kawa niningkauh sakkidika yakat. Dūr yakat ahal muihas luih minit kau singka bangdai kidika balna pasyakat amanglanayang dai Azur walanibis Jaazanías, dawak Benaía walanibis Pelatías bik, witing laih tawan tanituna as dai. 2Papang yaklauwi yayulna: “Adika balna kuduh muih inin yayamwa kidika, dawak warknina dutni yamnin kukulwa kidika tawan nuhni pasyakat. 3Yuyulwi: ‘Nai dawaski, ū balna yamnamayang kidika. Akat laih dutni mailaihwas karang, sihm di muihni suba pasyakat kapat,’#Ez 24:1-14. 4kidika bahang yuldibautah, ayangki kau duta.”
5Papang piritni kidika yang akat yalaihna, dawak yāpakna yulna atnin: “Adika Papang yulwi: ‘Kidika manna kultamana, Israel balna. Yang amanglatayang manna kulnamna kidika. 6Manna uba muih īna mana tawan nuhni yakat, dawak tapas kidika muih dauna manah bahngnamana. 7Kidika bahang, yang Papangyang kat rahm kidika yultayang: Jerusalén kidika suba as karangki, dawak dinimuihni kidika laih manna-awas ki, kauna manna muih inamana kidika balna karang ki, bahang manna laih suba paskaupak manayakki ki. 8¿Wār yamadutamana? Manna mamatna yakat wār kalating kaiwarang ki. Yang, Papangyang kat yulki manayultayang. 9Manna namangna yakat lamana yamtik wah manaki ki; Akaupak manayakki ki, dawak muih kaltalyang-awas mana tingnina yakat mana-āki ki. 10Isparah kau dautanama. Israel kiwi watwa yakat bitik lamana yamki, dawak amangkilatanama, yang adika Papangyang. 11Tawan nuhni adika manna namangna yakat suba kapat dutas awanama, dawak manna dimuihni-awas awanama. Yang lawik Israel sauni kiwi watwa yakat bitik lamana yamki ki, 12kaput laih amangkilatanama yang adika Papangyang. Manna kidika yang lāki balna kaput yalahtas mana, dawak laki yakat bik duta yamtas mana, nawatkauh laih, yaihmatna kau nisan balna yayamwa yakauh tala yamtamana.’ ”
13Yang Papang ayangni kau dutik yuldibautasakyang kat, Benaía walanibis Pelatías dauwi bukna. Yang abuktik, muhki sau kat lakna yang, dawak parasni sarahtik yulnayang: “¡Alakaih, Papang! ¿Israel balna bulah wawatna kidika bitik dahn yammayah?”
Pramis wisam as Papang yulwi
14Papang yang akat kaiwi yayulna: 15“Muih balna, Jerusalén yakat yalalahwa kidika, Israel yulni kidika yuyulwi, man karak sau asla balna mana, dawak yuyulwi: ‘¡Witingna kidika Papang kaupak naikau ki! Dawak mayang laih nawatkauh, adika sauni mayana, mayang madiki atnin.’ 16Kidika bahang diyulta: ‘Papang aput yulwi: Yang lawik pamana kaupak manayaktik nisan balna pasyakat manasihnayang, sau as manna talasmana sauni yakat, kauna ma parahni manah manasihnayang. Waralaih, yang adika pa as maisihni dis kapat awaki witingna niningna yakat, witingna uina pāni yakat.’ 17Adika bik diyultah: ‘Papang aput yulwi: Yang lawik manayamtingkat kidika sauni dawak ninisan balna kaupak aiwanama, manasihnayang pāni kaupak, mana-uduhtik manaki Israel sauni kidika. 18Witingna saunina yakat aiwarang, dawak di dutni lan kakalna balna dai kidika bitik dadawarang, witingna yakat duduwa dai kidika. 19Yang lawik, witingna isningna dadasni kipala kapat kidika yakpamki; dawak isning wisam as diaki, spirit bik wisam as diaki.#Sal 51:10. 20Kaput laih yang lāki balna kat yalalahwarang, dawak laihwi yayamwarang. Witingna kidika yang tawan ki karang, dawak yang kidika witingna Papangnina awaki.#Ez 36:26-28. 21Kaunah kidika balna dutni yakat dawas ban yalalahwa kidika, witingna yayamwa balna kidika minit diyulki ki. Yang Papangyang kat yulki manatayang.’ ”
Papang alasnina yaksihni kidika Jerusalén kaupak naikau kalahwi
22Di lawani duwa balna dai kidika yaklalauna, dawak wīlni balna bik uiwi uina. Kaput laih, Papang alasnina yaksihni witingna minitna yakat dai, kidika 23yaklauwi tawan nuhni kidika kaupak naikau kalahna, dawak kiwi bukna, tawan nuhni kidika kaupak ma kilwa niningkauh asang as sakyakat.#Ez 10:1-22; 43:2-5. 24Usnit kat Papang parasni kidika kau yadulauna, dawak Babilon yakat watwi yaduwi kiuna, muih buas yakwi duwi kiuna bangdai yakat. Adika laih amana as kau kapat Papang piritni yaklauwi nikingkana. Usnitkat talasakyang dini dai kidika disna dai mikpa kaupak, 25dawak yang lawik, yakwi dukiuna muihni balna yakat diyulnayang, Papang di nikingkana balna bitik.
Currently Selected:
Ezequiel 11: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
