Ezequiel 12
12
Ezequiel yaklauwi isningpakna ki panina kaupak diyakwarang kidika
1Papang yang akat kaiwi yayulna: 2“Man, muih al, tawan as dutni pasyakat yalahtaman. Witingna miniknapa duduwi talnin, kauna tatalwas ki, dawak tapanina duduwi dakanin kauna, dakakawas ki,#Is 6:9-10; Jr 5:21; Mk 8:18. kat tawan as dutni bahang. 3Kidika bahang ridi alahwah dunam dini balna kidika, kat pa ūk kau yawama bahang, madah, dawak muih bitik miniknapa yakat data alahwah uma kaupak, dawak pa kau yawah; sip kat amanglalawarang kat witingna muih dudutni kidika yulni. 4Dawak madah palni, muih bitik miniknapa yakat dima balna kidika yaktah, pa ūk kau malaihwi maduwi uiwarang kapat; dawak ma-ulahu yakat bik muih bitik miniknapa yakat, pa ūk kau malaihwi maduwi uiwa kapat alahwa yawah. 5Usnit kat tawan daklana yakat sulihni as ahlta, muih bitik miniknapa yakat, kidika sulihni munah dima balna bitik yakta. 6Ma puklakwakat, dima balna kidika bitik trukta muih bitik miniknapa yak alahwa yawama. Muhma putma, man adika sauni talas atnam. Dukih yawi kidika sain as atnin, dawak witingna isningna aina atnin, Israel tawanni nining yakat.”
7Yang diki balna kidika ridi yamnayang dai, Papang yayulnadai kaput, dawak madah palni muih bitik miniknapa tani yakat alahwanayang dai, muih as sauni kaupak yakwi duwi uiwa kapat. Ma-ulahu dawak, daklana kidika yakat sulihni as ahlnayang dai, dawak masan dawak muih bitik miniknapa yakat diki balna kidika bitik truktik alahwik yawanayang dai.
8Payahwakat, Papang, yang yakat kiwi yayulnadai: 9“Rahm laih, Israel tawan as dutni balna kidika, mayulwi dakakana kapat ki, ais yamtasakman dai pa. 10Bahang diyulta, yang yultayang, kidika laih Jerusalén kingni yakat isning pakna as ki, dawak Israel balna bitik yakat yalalahwa kidika bik. 11Diyultah man kidika sain as man witingna yakat usta sahmuhnam, dawak man yamtaman kidika witingna bik yamninki, kat panina kaupak yakwi pa ūk yakat duwi uiwarang bahang. 12Taninatuna as duduwa kidika witing dini balna bitik trukwi kalahwarang ki dawak, ma puklakwak, daklana yakat sulihni as ahlwi yakut dini balna duwi kalahwarang ki. Muhni put dawi kalahwi kiuna karang, kaput laih muih as bik witing yakat kaltalnin-awas, dawak witing bik talnin-awas#12.12 Kaput laih muih as bik witing yakat kaltalnin-awas, dawak witing bik talnin-awas: grik kau laih kaput yulwi. Hibru kau laih, kat witing laih sip talwas bahang. sauni dawi kalahwa kidika. 13Yang laihnin dini dutayang kidika kau witing minit yakat muklaktik laihki ki. Babilon yakat duyawaki, Caldeo balna saunina yakat, sau as talwas karang kidika,#2 Re 25:7; Jr 52:4-11; Ez 17:18-20. dawak yakat dauwarang. 14Dawak wing sutni arungka yakat sihting kiwarang, dawak maintalyang balna bangkidika nanitna dadakwarang, dawak ūk balna kidika bik sihm yayamwarang, dawak uitik yawaki ki tingki yakat isparah dudatik. 15Yang lawik sau dawak nisan balna ūk yakat disihting uiwarang usmat kat, witingna amanglalawarang, yang adika Papang yang. 16Kalyamtingkat as as kiri yaklalawarang war kaupak, yuh kaupak, dawak siknis kaupak bik, bahang kidika laih witingna angdika ninisan yakat uiwarang kidika yulna atnin, witingna ampus di dutni yayamna dai kidika, dawak amangkilalawarang yang adika Papangyang.”
Isningpakna wisam as wah kaiwa kidika yulni
17Papang, yang yakat baisa, wat as kaiwi yayulna: 18“Man, muih al, di kastaman awarni yakat yamadutang mayukwang, dawak ditaman kat kulnam kidika kaidīnah ditah. 19Dawak sauni muihni balna dawak Jerusalén muihni balna yakat bik diyulta: ‘Papang adika yulwi: Witingna kulninna kaidīnah kakaswarang; dawak yamaduwīnah dinina didiwarang, dawak sauni kidika daukalpamwarang, di dis dawarang, kidika sauni muihni balna dutni yayamna kidika yulni. 20Tawan nunuhni balna kau muih bang bang kidika bitik laih daukalna karang; sauni kidika laih kauhmak wanilang kalna karang. Kaput laih manna yang akat amangkilatanama, yang adika Papangyang.’ ”
21Papang yang akat kaiwi yayulna: 22“¿Israel balna ais yulni yuyulwih; ma balna bayakwi, dawak prapit yulni balna yakat sip kalahwas ki atwa kidika?#2 Pi 3:4. 23Bahang diyulta: ‘Adika Papang yulwi: Yang yamna awaki bahang kidika yulni watwi Israel yakat yulnin awaskarang.’ Dawak bik diyulta, mani kidika ulisdana, amana balna talna kidika yakat kaiwi kalahna atnin. 24Watwi, Israel pasyakat amana taldi atwi alas yuyulwa kidika diskarang, dawak prapit yulni alas kidika bik diskarang, 25kat yang, Papangyang adika yulbauki bahang, yulki balna kidika bitik kalahna karang laihwatwas. Manna silp talnama, muih dudutni mana kidika; yang yulbauki, dawak yakat kalating kalahna karang. Yang, Papang yang kat yultayang.”
26Papang yang yakat kaiwi yayulna: 27“Israel balna yuyulwi, prapit balna amana tatalwa kidika laih, ma balna naini kaiwak kat kalahwi. 28Kidika bahang diyulta: ‘Adika Papang yulwi: Yang yulki balna kidika ma mahni bayakwak kat kalahna awaskarang; yang yulki kidika yakat kalahna karang. Yang papangyang kat, yulki kidika manatayang.’ ”
Currently Selected:
Ezequiel 12: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
