Deuteronomio 14
14
1“Manna kuduh Dawan Papang walanbis balna mana. Muihmana yakat dadakwinih, dawak basmana bik dadakwinih muih as dauwak.#Lv 19:28; 21:5. 2Kat manna laih tawan as Dawan Papang dini manayakna; sau akat tawan balna bitik paskaupak manawalwi yakna, witing dini atnamna.#Ex 19:5-6; Dt 4:20; 7:6; 26:18; Tit 2:14; 1 Pi 2:9.
Tinglau asangpas dini maisihni, maisihni dis balna kidika
(Lv 11:1-47)
3“Maisihni kidika kakaswinih.
4“Adika dini balna laih sipkarang kasnamna: turuh, sīp almuk, kuts, 5sana satni balna, asangpas kutsni balna dawak ūk balna bik. 6Kaput ki bahang tinglau karang, asangpas dini karang tamni dawak tipisnimak awas kat, susni sahna duwa dawak dibasta kaswa balna kidika kasnin yamni kulna ki, 7kaunah adika balna laih kastas awanama, dibasta kasyang balna karang dawak susni sahna karang bik:
“Kiamil, tibam satni; kidika laih maisihni kulna karang, dibasta kaswi kaunah tipisnimak sahwas bahang.
8“Kusih kidika tipisnimak sahna kaunah dibasta kaswaski. Kidika bahang maisihni kulnin ki. Adika dini muihni balna kakaswinih, laihnin bik awaski dadauna kat.
9“Waspadini balna kisini duduwa kidika laih kastanama, 10kaunah kisini dakah silini dis kidika kakaswinih; kidika laih maisihni kulnamna ki.
11“Dilawani balna kasnamna kidika, 12kaunah pas yakat as as laih kasnamna sip-awaski: yakalnuh, dawak yakal satni balna kidika, 13dawak yakal bikikisni balna kidika bik, 14kuparis balna, 15uhu nuhni, kubam, yami satni bik, 16mukmuk, kuma paskau yami kapapat satni balna kidika bik, 17awahta, upam, kuma kupaniris. 18Yami nuhni abubilla dawak umis.
19“Di muih satni lawani duwa bitik kidika dutni kulna ki. Sip-awaski, kasnin. 20Kaunah dilawani duwa balna yamni kulna kidika laih sipki kasnin.
21“Tinglau as, kidika awas bik, asangpas dini alas dauna kidika manna kasnamna awaski, kat manna kidika kuduh tawan as Dawan Papang yaklauwi dini yakna bahang, kaunah sipkarang pa ūk muihni pasmangna yakat yalalahwa balna yakat dianam; witingna laihtak sipki kasninna. Kaput bik sip karang bakamnamna, pa ūk muihni kaiwi bayakwak.
“Kuts baisa dibin ta suwa kidika iwi lahwinih.#Ex 23:19; 34:26.
Tunan minit salap launin lani kidika
22“Kurih bitik manna damatnakahnin awaski, di dahta minik yaktamana bitik kidika salap tunan minit kidika yaknamna karang ki.#Lv 27:30-33; Nm 18:21; Mal 3:8-10. 23Adika salap tunan minit yaknin kidika kuduh, wain balna dahta minik yaktamana kidika, dawak disala balna yaktanama kidika, kaput bik tumanaruh balna, sīpmana balna walanbis tatuna sahwarang kidika manna bitik kalpakta Dawan Papangmana muhni tani yakat kastanama, witing pa walwi yakwarang yakat, kaput laih Dawan yakat risnipik kalanin kidika lan alahwanamna. 24Kaput bik manna dimana balna yakat Dawan blisyamna kidika yulni, yakat kalanin yulni, salap tunan minit kidika yaktamana, dawakat adika dini balna bik Dawan pa as walwi yakna yakat duta yawanama, 25dini balna kidika wauhta bakanta, lalahni kidika duta yawanama, Dawan pa as yakna pāni yakat. 26Bahang kidika lalahni kau manna angdika dini as bakannin kultanama kidika: turuh almuk wark kalahyang, sip karang, wain karang kidika awas kat wain dinin satni, kidika awas kat manna ais as bakannin kultanama kidika bakanta, Dawan Papang muhni yakat bitik kalpakta kastanama, ūmanapas muihni bitik karak.
27“Manna tawanmana yakat libait muihni balna yalalahwa kidika ruhmwi dadawinih, kat witingna palni saunina duduwas bahang, manna dunamana kapat.
28“Kurih bās bayakwa bitik yakat, di minik dahta yaktamana kidika kaupak sahyakna salap kidika yakta awanama, dawak tawanmana nuhni yakat puta awanama, 29libait muihni balna aiwarang mani kat, witingna laih saunina duduwas kidika, kidik awaskat pa ūk muihni balna manna pasmangna yakat yalalahwa kidika, kidik awaskat papangnina dis warau balna kidika, dawak tingmak balna kidika kauna, kaswi minitnatang bayak atninna. Kaput laih Dawan Papangmana kidika yaklau blismanayamna karang, ais ais yamtamana kidika bitik yakat.
Currently Selected:
Deuteronomio 14: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
