Deuteronomio 13
13
1“Manna pasmangna yakat prapit as kalahwarang amana talyang kapat dawak sain as namangnakawarang, 2kidika awas bik witing ais yulwa yakat kalahwarang, kidika yulni ban manna kau manayulwarang: ‘¡Dawan dauh balna kau mamikit yuldarang manatwarang, kidika minit yakat manna talasmana dawan dauh yakat baisa yamdanang manatarang kat!’ 3Yulni dakakawinih. Kat Dawan Papangmana yaklauwi mamana balna talwarang, rahm witing yakat dalani talamana pa, ismangna dawak sulamana bitik. 4Kaput bahang, manna tamatna yakat ban yawanauh dawakat manna Dawan Papangmana yakat manah mamatna yultanama; witing lani balna manna yakat laihta yamtanama, witing yulni daka ayangni usnit yakat prias yamtanama; witing karak ma bitik aslah awanauh. 5Bahang kaput laih kidika prapit karang, awaskat di amanglayang karang bik, witing minit yakat daunin lani kidika kaina karang, kat Dawan Papangmana Egipto kau warau manaduwabangdai kaupak manalaihwi yakna, niningyakat alas yulnin traitalna yulni, kidika minit yakat, manna Dawan Papangmana yaihnit kaupak ahni yakat manayaknin dawi witing tani balna kaupak bik ahni yakat manayaknin kulna yulni. Bahang kaput laih manna pasmangna yakat di dutni bangkidika bitik kidika diswi kaina karang.#1 Kor 5:13.
6“Man walambis yal dawak al karang, yalma karang, kaltalyang yamni karang, dawan dau balna yakat prinias yamnin mapakwarang kat, papangma balna bik amanglalawas dai kidika daniwan yakat, 7kidika balna laih dawan dauh balna duduwa kidika tawan balna, yaihnit yakat kidika awaskat naikau bik, awaih duduwi sau sutni kaupak sutni as kat, 8dawan dauh balna kalnina yakat bukwinih, dawak yulni bik dakakawinih, minikun bik talwinih, dawak yulni bik malwinih; 9kaunah nawatkauh laih itah. Dawakat man tatuna witing niningyakat tingma dulauma, usnit kat tawanma muihni balna bik witing niningyakat tingnina dulalauna karang. 10Kipala kau bartanama angkat dauwarang kat, witing yaklauwi Dawan Papangmana Egipto kaupak manayakna yaihnit kaupak naikau manayaknin kulna yulni. 11Kaput laih Israel walanbis balna bitik amanglalawarang dawi bik adika sat di dutni yamnin kidika yamaduduwarang.
12“Manna Dawan Papangmana yaklauwi bang-atnamna yulni tawanmana pasyakat muih 13al as Papang yulni dakawas dawak tawan muihni balna yakat alas diyulwi dawan dauh balna yakat minitna yulnin dukiwarang kat, 14manna yamni walta talnamna karang kidika dini. Dawak yuyulwa kidika rahm karang kat, dawak manna pasmangna yakat di dutni kidika yayamna karang kat, 15kaput laih kidika tawanni nuhni muihni balna kidika isparah kau manah itanama, tingninalau balna bitik, kidika pasyakat di bangkidika bitik laih daukalmuktanama.#Dt 20:16-18; Jos 6:17. 16Ritsni balna kidika uduhtanama, muih kalududuhwa pāni papusyakat, dawak kuhkau bustanama bitik, di dakyaknamana kidika balna bitik, kidika laih minitdis kalanin dini as kapat busnamna karang dawan Papangmana risnipik yakat. Kidika tawanni laih daukalpamna karang, dawak watlaih laihwi dulauwi yamwas karang.
17“Bitik daukalmuknin yakna kidika kaupak as bik duduwinih, kaput laih Dawan kidika manna yakat kulnin daukalwas karang; nawatkauh laih mamaknakun manatalwarang, dawak mahni bik manayamwarang, muihmanabararak balna kau pramis yamna dai kaput, 18manna Dawan Papangmana yulni dakanama, dawak lāni balna kau yulwa kaput yamtanama kat, warmani manatikda kidika, witing minikpa yakat barangni manah yamnin.
Currently Selected:
Deuteronomio 13: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
