Deuteronomio 15
15
Muih tras duwa kidika dawakat Disnin kurihni
1“Kurih tiaskaubu bitik, muih tras duduwa kidika dawak disnakarang.#Lv 25:1-7.
2“Adika muih tras duwa kidika kaupak dawak disnin kidika aput dai: Muih bitik kalwanaih karang, wanaihni awas karang bik, di as wayaki kalanamana dai karang bik, dawakat disna karang, adika trasni nuhni karang bik dawak disna karang. Tras kalana muihni yakat taihwi kalyamwas karang trasni kidika lauwi kalanin yulni, kat kidika trasni kidika dawakat disna karang, dawak disnin kurihni laihwarang mani Dawan risnipik kalana karang. 3Tringsar muihni as kau wayaki kalanaman kat kalyultang lauwi manin karang ki, kaunah man tawanma muihni as laih datang diswarang. 4Kaput manah manna pasmangna yakat muih as bik minikunni diskarang, kaput bik Dawan Papangmana yaklauwi manna tawan manana yakat blisin lakna karang, 5kidika bik manna witing yulni daka, warmani witing lani balna manatayang yakat yamtanama kat, 6babang kaput laih manna Dawan Papangmana blismayamwarang, pramis mayamna kaput, dawak nisan ūk balna yakat wayaki dianam sipkarang; bahang kaput laih nisan balna manas taihta duma, kaunah biri laih matataihwas karang.
7“Manna pasmangna yakat muih minikunni as sakkat, Dawan Papangmana yaklauwi sau manana pasyakat, ilp kalatah, pa aslah mana muihni yakat; 8nawatkauh laih, kulnam yamni awah, witing dukih kalawa kidika kalatah.#Lv 25:35. 9kulnam yakat kidika kulnin dutni kidika duwinih: ‘Kurih tiaskaubu kidika ulisdana, tras duduwak diswa kurihni kidika’, dawak pa aslah mana yakat muhma dutni yamta, wanaihma yakat di wayaki kalatas awama kat muih minikunni yakat, witing Dawan yakat yulwarang man kalyamtaman kidika, bahang kidika laih man yakat dutni as makulna karang. 10Man tawanma muihni yakat ilp kalama, ais praisni ilpni nuhni karang bik, kat kidika yamma kidik Dawan Papangma yaklauwi blisin mawarang, di yamma balna bitik dawak di lan alahwama kidika bik. 11Sau akat, muih di dukih diawa balna kidika ban karang,#Mt 26:11; Mk 14:7; Jn 12:8. kidika bahang mayultayang, witingna niningna yakat kulnam yamni awah, sauma yakat muih miniknakunni balna yakat.
Muih dinina yamyang minitna yakat lā kidika
(Ex 21:1-11)
12“Man pa aslah muihnimana kidika, yal karang, al karang, man yakat wauhwi mabakanwarang kat muih dini yamyang#Lv 25:39-46. kidika, kurih tiaskauas manah dima yamwarang; kurih tiaskaubu laihwakat pri dapamma. 13Mahka dapamtang kiwarang kat, tingni pāni manah kiwas karang, 14tingmalau balna kaupak kalama, dawak plawar minik bik manas palni, dawak wain, yuldarang kat Dawan Papangma di mana kidika sahyakma. 15Damatkahnin awaski man bik Egipto yakat muih dini yamyangman dai, Dawan Papangma yaklauwi malaihwi yakna. Kidika bahang warmani mapaktayang kaput yamnam.
16“Kaunah man dima yamyang kidika, witing manyakat madanin kulwas karang kat, man yakat dalani matalwi, kaput bik ūmapas kau balna kidika yakat bitik dalani talwarang kat, man yamni kalyamtaman kidika yulni, 17kaput laih di subangni as duta, uma dūrni yakat duyawa tapani ahlma, kaput laih witing kidika man dima karang. Dima yamyang yal niningkauh bik kaput yamma. 18Dima yamyang dapamtang kiunin kidika dutni talasman kat, wark kalahyang minit papuswayah praisni kurih tiaskauas dima yamna kidika; kidika minit yakat Dawan Papangma blismayamwarang, kidika yamma bitik kidika.
Tinglau walaninabis tatuna ahalmuk yakwak Papang dini yaknin
19“Tumanaruh, sīpmana walaninabis tatuna sahwa kidika, Dawan Papangmana dini yaknamna karang.#Ex 13:12.
“Turuh yal kaupak walanbis tatuna almuk bin yakwarang kat paktang wark kalahnin awaski, kaput bik sīpma yal kaupak tatuna walanbis almuk yakwa kidika butuni kahrnin awaski. 20Bahang kurih kaiwa bitik kidika wanaihmana balna bitik kalpakta Dawan Papangmana muhni yakat di kastanama, witing yaklauwi pa walwi yakna yakat. 21Kaunah sakahwa karang kat, duyawa dawan yakat sakripais yamnin awaski. 22Angkat tawanni nuhni yakat yalahtaman kat kidika yakat kasma, manna bitik kalpakta, maisihnidis awama, maisihni awama karang bik, sihm sana muihni kasnin kapat. 23Kauna āni kidika laih kasnin awaski,#Gn 9:4; Lv 7:26-27; 17:10-14; 19:26; Dt 12:16,23. sau yakat utuhma, was utuhnin kapat.
Currently Selected:
Deuteronomio 15: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
