Deuteronomio 12
12
Holi pāni aslah atnin
1“Adika lāni balna kuduh manna laihta yamnamna kidika sangmanaka bitik yakat, Dawan Papangmana yaklauwi manawak āwa dutanama kidika.
2“Manna tawan balna kalbauta minit bayakta āwa dutanama balna pasyakat, dawan dauh kau minitna yuyulwa kidika bitik disyamtanama: asang balna, ububulni balna, dawak pan nunuhni balna dinitkau yakat bik. 3Sakripais bubuswa pāni kidika bahtanama, kininapala kidika bik sahtanama, pan saran balna kidika, daninawan wayani balna; kaput bik pa balna witingna kukulwa kidika bitik daukaltanama.#Dt 7:5.
4“Dawan manna Papangmana kidika kaput ayangni nuhni yamnamna awas ki. 5Manna sulamana balna pas kaupak, Dawan yaklauwi pa as walwi yakwi manawarang witing ayangni kau, bahang kidika pāni yakat yawa ayangni nuhni yamtanama. 6Kidika pāni yakat sakripais yamtanama witing risnipik kau, dawak bik tunan minit salap kidika duyawanama, pramis minit, minitdis kalanin kidika bik, turuh dawak sīp balna walaninabis tatuna kidika balna bik. 7Yakat di kastanama, Dawan Papangmana muhnit yakat, manna warkmana minik balna kidika Dawan Papangmana blisyamna kidika alas walamanabis balna karak alasna dutanama.
8“Kidika yakat manna yamnamna awaski, akat waradika balna yamtamana kidika, mayang bitik amput yamni talda kidika yamna karang.#Jue 17:6; 21:25. 9Rahm kidika laih manna baisa yawa āwasmana pa yamni yakat Dawan Papangmana manawak yawa āwanama dutanama pāni yakat. 10Kaunah Jordán wasni kidika daklawanama dawak witing sau manawarang yakat yalahtanama kat, kaput laih waihmanala balna kidika kaupak dakta alahwanama, dawak yamadangni dis awanama, 11kaput laih, Dawan Papangmana yaklauwi pa as walwi yakwarang kidika witing ayangni kidika yakat sak-atnin, manayultikda kidika bitik yamtanama: tinglau balna kidika sakripais yamta bustanama, witing risnipik kau, tunan minit salap launin kidika, dawak kaput bik ais pramis yamnamana kidika bitik yamtanama. 12Dawak alasna yamtanama Dawan Papangmana muhni tani yakat, walamanabis balna dawak dimana yamyang balna karak bik kalpakta, kaput bik Libait balna pasmangna yakat yalalahwa balna kidika karak bik, kat witingna laih manna pasmangna yakat sau duduwasdai bahang.
13“Amungtalnauh, tinglau kidika Dawan yakat sakripais bustas awanama, pa pini yakat; 14manna yamnin sip-awanama Dawan Papangmana yaklauwi pa as yakna kidika yakat manah, sulani balna as paskaupak. Kidika yakat yamtanama, yamnin manapakna kidika bitik.
15“Kaput kaunah manna sipmana di ita kasnamna pamana yakat, angdika mani kaskih mawarang kat, di yamni balna Dawan Papangmana yaklauwi manana kidika. Manna bitik kastanama, maisihni, kidika awaskat maisihnidis awanama karang bik, sana muihni satni balna kidika kapat. 16Kaunah āni kidika laih kasnamna awaski,#Gn 9:4; Lv 7:26-27; 17:10-14; 19:26; Dt 15:23. kaunah sau yakat utuhtanama was utuhni kapat.
17“Manna tawanmana nuhni pasyakat sip kastas awanama plawar minik balna tunan minit salap yaknamana kidika, wain, disala, kaput bik tumanaruh balna sīpmana balna walaninabis tatuna sahwarang kidika bik, Dawan kau kalanin pramis yamnamana kidika kasnamna awaski, dawak minitdis kalanin dini kidika bik. 18Manna Damanawan muhni yakat manah sip karang kaput yamnamna, pa as witing walwi yakwarang kidika; dawak kidika yak Dawan Papangmana muhni yakat walamanabis balna dimana yamyang balna karak kalpakta dawak libait balna manna pasmangna yakat yalalahwa balna kidika karak bik, manna warkmana minik balna kidika alasnina dutanama. 19Kidika sauni yakat yalahtanama mani balna yakat, libait balna kidika ruhmwi dadawinih.
20“Dawan Papangmana yaklauwi saumana kidika baisa nuhni yamwi manawarang kat, pramis yamna kaput, dawak dimuihni kaskih manawarang kat, sip awanama kasnamna. 21Dawan, Papangmana pa as walwi yakna kidika yakat ayangni sak atnin, bahang kidika kaupak naikau bangmana kat, turuh balna, sīp balna Dawan manana kidika ita kasnamna sipmana, bangmana pāni yakat, yang lawik manapaknayang kaput. 22Sana muihni balna bik sihm kaput karang, manna bitik sip-awanama kasnamna maisihni mana, maisihni awas awanama bik. 23Kaunah āni kidika laih kasnin sip-awas karang, kat ā yakat sangnika sakbahang; kaput bahang sangnika dawak muihni karak sip-awasmana kasnin. 24Yamnamna kidika laih kidika laih sau yakat utuhtanama.#Lv 1:5; 17:10-14. 25Kakaswinih, dawak manna yamni awanama, walamanabis balna bitik Dawan minikpa yakat barangni awanama kidika. 26Minitdis dini duainamana kidika, dawak pramis yamnamana kidika laih, Dawan yaklauwi pa walwi yakwarang yakat duyawanama, 27dawak Dawan Papangmana yakat sakripais busnin pāni yakat, kidika yakat sakripais karauni kauna busnin kidika yamtanama, kaunah muihni kidika laih kastanama.
28“Dakanauh dawak yamnin yulnayang kidika bitik yamtanauh, kaput laih walamanabis balna bitik yamni awanama, manna Dawan Papangmana minikpa yakat barangni awanama kidika.
Dawan dauh niningyakat yulna kidika
29-30“Dawan Papangmana yaklauwi nisan balna kidika iwi disyamwarang mani kat, pāni kidika awa dutanama, dawak kidika sauni yakat yalahtanama, amung talnauh kidika muihni balna usnitna uhuiwinih, daninawan dauh balna kidika bik. 31Dawan Papangmana yakat kaput yayamwinih, kat di dutni balna kidika Dawan talkih kalawas ki, nisan balna dawan dauh yakat minitna yuyulwa kidika, witingna walaninabis palni sakripais bubuswa kidika.
32 # S.b. 12:32—13:18 kidika laih S.b. 13:1-19 kat kidika simh ki hibru kau ulna kidika.“Manayulnayang, bitik kidika yamtanauh, minitkau laknin dawak dakyaknin bik awaski di as bik.#Dt 4:2; Rib 22:18-19.
Currently Selected:
Deuteronomio 12: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
