Deuteronomio 11
11
Papang nuhni kidika
1“Manna Dawan Papangmana yakat dalani talnauh, dawakat witing lāni balna yakat yamtanauh. 2Warmani amanglatanauh Dawan dawak Papangmana yaklauwi barangni manayakwa kidika, manna walamanabis balna kidika laih amanglalawaski dawak bik tatalwaski. Witing nuhni kidik dawak parasni nuhni duwa kidika amanglatanauh, 3dawak sain nunuhni yamna kidika Egipto yakat, Fero niningyakat dawak sauni niningyakat bik,#Ex 7:8-12:30. 4Egipto muihni kalbauyang balna kau diyamna kidika, aninaras balna, kārnina, amput kuma pauni wasni yakat āmukna kidika, witingna manna yakat manauiwi aiwak.#Ex 14:28. Dawan yaklauwi imukna karang. 5Kaput bik manna ismangna kattanauh manna yulmana kauhmak wanilang yakat di yamna balna kidika, manna akat aiwa āwanamana kat; 6kaput bik Datán dawak Abiram, Eliab walanibis balna, Rubén sulani balna, sau wakahwi ukmukna kidika wanaihnina balna, dawak ūnina lababanni balna bitik, dawak di duduwa balna bitik, Israel balna muhnina yakat.#Nm 16:31-32. 7Manna palni witnis mana Dawan di balna mahni yamna kidika.
Pramis sauni blisyamna kidika
8“Warmani lā balna mananayang kidika bitik yamtanauh, kaput parasni kalnamna, kalbauta minit bayakta sau dutanama kidika, 9kaput laih ma mahni yalahnamna Dawan yaklauwi sau dianin pramis yamna dai kidika muihmanabararak balna yakat, dawak sulamana balna yakat bik; sau as tāwas dawak amak kidika was kapat kira kidika. 10Manna kalbauta minit bayakta sau dutanama kidika laih sihm Egipto kapat ki, manna kidika kaupak alahwanamana kidik, manna yakat di dahtamana dai, di miniksani balna kidika kalmana kau ratamana dai, di dadahwa pāni yakat, 11kaunah manna sau as āwa dutanama kidika laih asangpas dawak sau langni bik duwi, dawak makau kisang kidika kaupak was kaiwi utuhwi. 12Kidika laih sau as, Dawan yaklauwi maintalwi, kidika yakat manah talwi minikpa kidika, kurih bitik yakat.
13“Warmani lā mananayang yakat yamtanama kat, Dawan Papangmana yakat dalani tala, manna kulnamna bitik kau dawak solmana bitik kau bik, 14witing yamwarang#11.14 Witing yamwarang: grik kau ulna kidika laih kaput yulwi. Hibru kau laih yang lawik yamnayang karang. dawak was kidika kaiwarang awarni kat, kaput laih manna plamanawar minik kidika yakta dutanama dawak, wain, disala bik dutanama. 15Kaput bik yamwak dibasta balna kidika ukuswarang asangpas yakat, tingmanalau balna kasninna, kaput bik kasnamna manas dunamna. 16Kaunah amungtalnauh datanang alas manayuyulwarang; Dawan kaupak naikau alahwa dawan dauh balna yakat prinias yayamwinih; kidika balna yakat limbabahwinih, 17kat Dawan manna namangna yakat yaklauwarang, dawak kalawak was bik lauwas karang; kaput laih sau bik di minik balna yakwas karang, kaput laih sirihni palni dautanama sau yamni yakat, Dawan yaklauwi sau manawarang kidika.#Lv 26:3-5; Dt 7:12-16; 28:1-14.
18“Adika yulni balna adika kulnamna yakat āta dutanauh; sain kapat bik sittanauh tingmana dawak sapamana yakat bik. 19Kidika sumaltanauh walamanabis balna yakat, ūpas yakat dawak tapas balna yakat bik, alangwamana dawak lawamana yakat bik. 20Ūmana kalni balna yakat dawak dūr yakat bik ultanauh,#Dt 6:6-9. 21kaput laih manna sangmanaka dawak walamanabis balna sangninaka bik, Dawan yaklauwi muihmanabararak balna yakat sau dianin pramis yamna dai kidika naini kalwarang makau kisang dawak sau yamna kapat karang.
22“Warmani lā manatayang kidika yakat yamtanama, dalani talamana kat Dawan Papangmana yakat, witing tani yakat barangni yawanama kat, 23dawak Dawan yaklauwi manna muhmana kaupak ruhmwi yakwarang dawak manna laih tawan tanit mahni dawak bik pararasni balna kidika minit bayaktanama. 24Angdika manna kalmana taihtanama kidika, yakat wattanama. Lainmana kidika kauhmak wanilang kaupak líbano kat karang, dawak Eufrates wasni kaupak Mediterráneo kumani kat karang. 25Muhmana yakat muih as bik sip-awas karang.#Jos 1:3-5. Dawan Papangmana kidika yaklauwi yamwak muihsak dadauwarang, angkat pāni bayaktanama balna bitik kidika, witing pramis yamna yakat.
26“Adika mani manatayang manna laihta duna atnamna blisin kidika awaskat latuhna kidika. 27Blisinni karang, Dawan Papangmana lāni kidika kat yamtanama kat, warmani manatikda kidika. 28Latuhna karang, dawan dauh balna usnitna uitanama kat, Dawan Papangmana lani dakas awanama kat, dawak witing tani kaupak alahwanama kat warkmana manawada kidika.
29“Dawan Papangmana yaklauwi manawak awanama kat, Gerizim asangni yakat ayangni nuhni yamtanama, dawak latuhna kidika laih Ebal asangni yakat.#Dt 27:11-14; Jos 8:33-35. 30Adika asangni balna laih Jordán wasni nakas yakat rauki, makawa niningkau ta kiwa yakat, Cananeo balna saunina, sau langni kau yalalahwa kidika, Gilgal muhnit kau, dawak More kirahni balna yaihnit yakat. 31Manna Jordán wasni kidika daklawanamna manah ki, Dawan Papangmana yaklauwi sau manawarang kidika kalbauta minit bayakta dunamna. Minit bayakta dakyakta dutanama kat, kidika yakat yalahtanama, 32manna mahka palni adika lani balna manatayang adika yamtanama.
Currently Selected:
Deuteronomio 11: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
