Deuteronomio 10
10
Watwi la balna wisamni yamta kidika
(Ex 34:1-10)
1“Bahang Dawan yaklauwi yayulna: ‘Man kipala lababanni bu yakta, sihm tatuna dai kapat, data pan kau baks as yamta watta asang yakat ilyawah mayang karak yulbaunin. 2Bahang yakat yang lawik wattik lā balna tatuna ulnayang dai kidika wattik ulna awaki, kat kinipala balna dai kidika man lawa ruhmta bahnaman bahang, kidika adika lani balna wattik ulki mani, man lawa baks yamna man yakat apahna awama.’
3“Bahang yang mahka kidika baksni yamna yang, acacia#Ex 25:10; 1 Re 8:9. tatni kau yamna yang, kipala labanni bik bu yamna yang, datik wattik asang yakat dutik ilwik yawanayang. 4Bahang papang yaklauwi watwi la balna salap dai kidika ulna, tatuna mayang asla kaluduhna bangmayang kat asang mayakat kuh dahlwa paskaupak, yul maibauwadai kaput, 5ulwi yawa kat, yang asang kaupak mahka lahwak aiwanayang; bahang usnit kat Dawan yaklauwi adar yana, yakat lā balna ulna kidika baks pasyakat ānayang, bahang ban bangki.
6(Israel walanbis balna kidika Beerot-bene-jaacán dawak kidika kaupak Mosera sauni nining yakat uina. Kidika Aarón dauna#Nm 20:28; 33:38. dawan nununa dai, adika sauni yakat laih was manas palni dai. 7Kidika kaupak bayakwi uiwa dai Gudgoda kat bahang Gudgoda kaupak bayakwi Jotbata sauni kat uiwa dai adika sauni yakat laih was manasdai. 8Adika pāni yakat kuduh Dawan yaklauwi Leví#Nm 3:5-8. sulani paskaupak walwi yakwadai, pramis baksni kidika trukwi Dawan nuhni yakat duwi kiunin dawi bik witingna yaklauwi Dawan muhni yakat prias yamnin, bliskalyamnin witing ayangni karak, warmani yayamwa kidika kaput. 9Kidika bahang libait balna kidika kalwirah pasyakat, witingna silp dinina kapat duduwas dadana, kat witingna dinina kidika kuduh Dawan, dawak Dawan witing palni yulna kaput.)
10“Yang asangma yakat sakyang dai madah 40, dawak pukta bik 40,#Ex 34:28. sihm tatuna ilwik yawanayang dai praisni, kaput bik adika mani balna bik Dawan yang kau yadakana, manna kau bik manaiwi disnin kidika kulwaski, 11kaunah aput yayulna: ‘Man ridi alahwa yawa tawan tatuna dutah kaput laih, muihmanabararak balna kau sau yamnin dianin pramis alahwanayang kidika dakyakta dunamna yulni.’
Papang yaklauwi yamnin pakwa kidika
12“Israel walanbis balna waralaih dakanauh, ¿Dawan, Papangmana kidika manna kaupak ais dunin yulwih? witing risnipik kalanin yulwi, dawak manna bitik tani kidika yakat yawanamna, witingna yakat mamatna yulnamna parasmana dawak solmana bitik, 13witing lāni balna kidika bitik yamnin, kaput laih yamni atnamna yulni. 14Manna amanglatanauh Dawan Papangmana kidika witing dini balna, makau kisang dawak sau, kaput bik kidika paskau di balna bangkidika bitik witing dini balna. 15Kaput kaunah Dawan dukih kalana dai muihmanabararak balna kidika, kidika kaupak sulani balna kidika duna, kidika kuduh manna, tawan balna paskau bangmana kidika, warmani talnamna sipki.
16“Manna kulnamna yakat ātanauh, pramis markni#Dt 30:6; Jr 4:4; Rom 2:25-29. kidika, ban laih dutni yamwi uiwinih, 17kat manna Papangmana kidika laih Papang balna Papangnina dawak dawan balna Daninawan;#1 Tim 6:15; Rib 17:14; 19:16. witing laih Papang, la muihni parasni bitik duwi, parasni nuhni duwi dawak bik yamadahngni ki, muih balna kidika satuk satuk talwaski, dawak bik sip muih yaklauwi kulnin laihwas ki, di prisant kalawi;#2 Cr 19:7; Ap.w 10:34; Rom 2:11; Gal 2:6; Ef 6:9. 18witing warau balna kau dawak tingmak balna kau bik la kat yamwi, dawak dalani ditalwi, bayahwi, praknina diawi pa ūk muihni balna manna pasmangna kau yalalahwa. 19Kaput bahang, manna muih pa ūk kaupak balna kidika dalani talnauh, kat manna bik Egipto yakat pa ūk muihni mana dai bahang.
20“Manna Damanawan yakat ayangni dulautanauh, dawak witing yakat manah mamatna yultanauh; barangni awanauh witing yakat, di as kat witing ayangni kau yakwi yulni kat, yakta yultanauh. 21Kat manna laih witing yakat kuduh ayangni nuhni yamtanama kidika; witing kidika Papangmana, manna yulmana adika di balna yamna, taldas dini balna kidika. 22Manna muihmanabararak balna Egipto yakat uina kidika muih 70#Gn 46:27. manah dai, kaunah waradika laih manna Papangmana yaklauwi mahni manayamna, sihm makau yala balna kapat mahni.#Gn 15:5; 22:17.
Currently Selected:
Deuteronomio 10: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
