Daniel 6
6
Daniel layan balna panina yakat
1King Darío yaklauwi, witing king kāwa sauni yakat gabamint manah 120 āna dai di balna kidika witingna yamna atnin. 2Kidika balna minitna yakat muih bās āna dai, witingna awaihwi talna atnin gabamint warkni balna kidika ampat yayamwapa, tanka laih king kidika dutni kalahnin awas yulni. Tunan muihni balna bās āna as kidika laih Daniel dai, 3witing laih sirihni palni as balna kidika tanitna bayakna dai, kat uba di amanglawa dai bahang, kidika yulni king kulna dai Daniel kidik tunan āna atnin witing kingkawa sauni yakat. 4Minit talyang balna dawak kabamint muihni balna karak kalpakwi tanka wawalna dai amput yamwi Daniel dutni as yamna kat kalyakna atnin kidika sauni pasyakat kingni lani kidika, kaunah witing laih al as barangni bahang dutni as bik kalyayakwas dai, kaput bahang king yakat uiwi yulwas dadana witing niningkauh. 5Kaput kaunah witingna kulwi uiwi aput yuyulna: “Mayang Daniel niningkauh di as bik yakdas karang ki, kaunah witing Papangni lani karak laihtak mayang sipkarang yaknin”
6Kaput laih tunan muihni awaihwi talyang balna dawak gabaminit balna karak aslah kalpakwi yulwi talwā dawi king Darío yakat uiwi aput yuyulna:
—¡King man kidika sangka ban kaput awama! 7Gabamint muihni balna dawak tunan muihni balna ūk bik aslah kalahwi yulbauwi lā as ānin kukulna, bahang kidika laih, ma 30 pasyakat, muih as bik dawan dauh as kau bik minityulnin awaski, dawak al askau bik, kaunah king manyakat manah sipkarang minityulna atnin. Kidika lani kat wais dakawi yamwas karang kat, layanh ūni yakat rumhna karang. 8Kaput bahang king adika lani man parasni kalatah, dawak ayangma ultah, lani balna adika satuk wirlanin-awas yulni, medos dawak persas lani yakat sip- awas karang yakpamna atnin.#Est 1:19; 8:8.
9King Darío yaklauwi adika lani parasni kalawi ayangni ulna dai. 10Daniel dakana dai kidika lani king yaklauwi ayangni ulna kidika, bahang ūni yakat kiwi, kama pani yaihnitkau windar kidika apahna, bahang kidik winnidar kaupak laih, lāih talwa dai Jerusalén#1 Re 8:44,48; Sal 5:7; 28:2; 138:2. tawanni nuhni kidika, dawak limbabahwi Papang kau ayangni nuhni yamna. Ma bitik pasyakat witing wat bās#Sal 55:17. kaput yamwa dai, niningh. 11Kidika ahalni balna kalpakwi uiwi kakana Daniel ūni yakat, dawak Daniel kidik Papang ayangni nuhni yamwi minit yulwasak dai. 12Usnit kat king yakat uina, witingna lā yayamna kidika kalyulna atnin:
—King man lā as ānaman, kidika laih ma 30 pasyakat, dawan dauh kau minit yulwarang, kidika awaskat muih al as kau bik minit yulwarang kat, man yakat minit yulwas dawi, kidika muihni laih, layanh balna panina yakat rumhana karang atnaman, ¿kaput-awasdaih?
King yaklauwi yulna:
—Kaput dai. Lā kidika yakat yamna atnin ki, medos dawi persas lani yakat yamna atnin ki, bahang kidika lani laih sip-awas ki dauhyamna atnin.
13Kaput laih witingna baisa yuyulna:
—Ju muihni as Daniel kidika rispik mawas ki dawak lā yakat bik rispik kalawas ki, uman talnayangna witing kidika ma as pasyakat wat bās minityulwi.
14Adika dakawi, king kulnin bukna, dawak tanka manas walna Daniel kidika laihwi yakna atnin. Ma kakiwasīk kat tanka walna laihwi yakna atnin, 15kaunah kidika ahalni balna watwi king yakat aiwi kalyuyulna:
—King man yamni amanglataman, medos dawak persas balna lānina yakat, lā as kau king yaklauwi ayangni ulna kidika sip dauh yamwas ki.
16Kaput dawak king yaklauwi pakna Daniel kidika duwi uina atnin witing yakat, kaput laih layanh balna panina yakat rumhanin. Kaunah baisa rumhahawas tanit kauh, king yaklauwi Daniel yakat kalyulna:
—¡Man Papangma, witing yakat kulnam bitik kau dini yamtaman kidika yaklauwi malaihyakna karang!
17Daniel layanh pani yakat rumhahana kat, panikungmak yakat kipala as kau puputna dai, dawak king witing tampni, dawak muih nunuhni balna tampnina kau bik taihna dai minit yakat, kaput laih lā yakat yamna atnin yulni. 18Usnitkat king witing ūni yakat kiwi masan dini kaswas dawi kalangna, dawak bik witing nining alasna duwa kidika bik yamwas dana dai; dawak bik pukta kidika kamas payahna. 19Payahlawak witing mahka yaklauwi kiuna layanh balna panina yakat. 20Panikungmak yaihnit yakat kiwi, king sarahwi yulna:
—Daniel, Papang sangka kidika warauni, ¿man Papangma kau kulnam bitik duta dini yamtaman kidika witing sip daih malaihwi yakna atnin layanh balna kaupak?
21Daniel yaklauwi nangnitlana:
—¡King man kidika ban kaput sangka awah! 22Yang Papangki innisal sihna dai, bahang witing yaklauwi layanh balna tininapas putna dai#Hib 11:33. yang akat yakasnin-awas yulni, dawak Papang amanglawi yang dutni yamtasyang, dawak man namangkauh bik dutni yamtasyang kidika.
23Kaput laih king kulnin alasna kalahna, dawak pakna Daniel kidika mahka layanh pani kaupak yakna atnin. Yayakna kat, witing muihni yakat kusna as bik dis dai, kat witing Papangni yakat barangni kulna bahang. 24King yaklauwi pakwak, Daniel yulni yayakna balnadai kidika duahaina, dawak yalnina, walaninabis balna karak libitwi layanh balna panina yakat rumhahana, baisa uiwi bubukwas kat layanh balna laihwi kaswi bibisna dai.
25Kaput laih king Darío yaklauwi sau muihni balna bitik yakat ulna, tūni satni balna yuyulwa balna yakat bik, aput diyulna: “Dukih yāwi manna kidika kulnamna aslah dawak baraknin lani dutanang kat, 26dawak yang lawik paktayang, king āwayang sauni bitik yakat, rispik kalanin, nuhni kulnin Daniel Papangni yakat.
“Kat witing laih Papang sangka ki,
dawak witing laih ban kaput atnin ki,
witing king kawa kidika laih sip daukalwas karang ki
dawak parasni nuhni duwa kidika bik saran diski.
27Witing laih laihwi yakyang,
dawak di taldas dini balna kidika yamwi,
kisang yakat, dawak sau yakat bik.
Witing yaklauwi Daniel laihwi yakna
layanh tipisnimak kaupak.”
28Daniel laih witing muih nuhni as dai Darío kingkawa sauni yakat, dawak king Ciro Persia kau kingkawa dai yakat bik.
Currently Selected:
Daniel 6: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
