Daniel 5
5
Tāt yakat ulna
1Babilon kingni Belsasar, di kasnin alasnina nuhni as yamwi witing kingkawa sauni kau muih nunuhni balna bangkidika tausin as yulwi duwi kiuna, bahang kidika di kakaswa pasyakat wain mahni didina. 2-3Wain yaklauwi muihnina dukih kidika diana, dawak king Belsasar yaklauwi duaina atnin pakna gol dawi lalah sūnitak nunuhni balna Papangni Nebokatnesar Jerusalén kau Papang ūni kidika kaupak yakwi duwi kiuna balna dai kidika. Sutak nunuhni balna kidika duaina, dawak kidika balnakau witingna utuhwi didina dai king, yalni balna, yalni binina dawak kasnin alasnina yakat muih uk balna bang dai kidika kauna. 4Witingna bitik kalpakwi wain diwi, daninawan dauh balna yakat ayangni nuhni yayamna dai, bahang kidika laih gol kau, lalah kau, bras kau, ayan kau, pan kau, dawak kipala kau bik yayamna dai.
5Kidika minitni yakat muih al tingni as kalahwi, ahni panuhni kau awas yaringni duwa lāih kidika yakat tingni bikisni kau tāt pihni minit yakat ulna. Muih tingnikau ulwa kidika king talna manikat, 6pihni kalna dai, dawak yamadunin kal-laihna kidika yulni kalyukna dai, kalnisut kaupak tunankat. 7Usnitkat sarahwi diyulna, sukyah balna, sins nuhni duyang balna, yala tanka walwi talyang balna Babilon kau bang dai yakat witing yakat uina atnin, dawakat diyulna:
—Kutkau ulna bangkidika yulwi talwi, dawak ais tanka kidika lāih yakwi yulwarang kat, asna pauni prakni kau āna karang, dawak dinimak yakat gol alahni kau alahna karang, dawak yang king awayang sauni akat pa bās yakat kalana awaki.
8Sins nuhni duyang balna bang dai kidika bitik ū pasyakat kawi yaklalana, kaunah muih as bik amanglawas dai ulna balna kidika ais tanka duwa dai pa king yakat kalyulna atnin. 9King Belsasar uba yamaduna, muihni kidika bitik laih pihni kalna dai. Muih nunuhni balna bang dai kidika ais yamninpa amanglalawas dai, 10kaunah king yal nanang kidika, walanibis king dawak muih nunuhni balna uina kidika bik sararahwak dakawi kasnin alasnina pani yakat kāyaklawi aput yulna:
—¡King man kidika ban sangka kaput awama! Man kulnam kulwi kalbauwinih dawak muihsak bik dauwinih, 11man king āwaman sauni akat muih al as likki, Papang Spiritni holi kidika duwi. King, man papangma king dai kidika mani balna yakat, witing kulnin yakat di bitik lāih duwa kidika niningkana dai, sins nuhni duwi simh dawan balna kapat. Kidika bahang king Nebokatnesar man papangma yaklauwi; di malnikau lāih yakwa muihni balna, sins duyang muihni, dawak yala tanka walwi tatalwa muihni balna bitik taninatuna āna dai, Babilon sauni yakat, 12Daniel yakat, king yaklauwi ayangni pakna Beltsasar witing Spirit tanit yamni duwa kidika, sins lani bik, amana talnin bik amanglawi, yul balna amangladas bik lāih yakwi yulwi, di dadasni balna bik barangni āwi. King man lawa Daniel yakat yultang kaiwang, witing yaklauwi tanka mayulwarang, tāt kau ulna pakkidika.
13Daniel king muhni yakat duwi uina, dawak king yaklauwi kalyulwi dakana:
—¿Manyah Daniel, Judea kaupak ju muihni balna papangki Nebokatnesar yaklauwi laihwi duaina dai kidika warau lani yakat? 14Yayuyulna, Papang spiritni kidika man yakat ki, dawak man kulnam kidik lāih barangni ki, sins nuhni bik dutaman. 15Ahal kau sins nuhni duwa balna akat aina dai, adika yulni balna yulwi talwi tanka yayulna atnin, kauna amanglalawas ki. 16Kaput kauna yang dakanayang, di amangladas balna kidika man lawa lāih yaktaman, dawak di dadasni balna bik barangni ātaman. Adika yulni balna adika yulta tala dawak tanka yayulma kat yang prak pauni kidika mahaki, dawak damamak yakat gol alahni alalhwarang, dawak yang king āwayang sauni akat pa bās yakat mahaki.
17Daniel yaklauwi nangnitlana:
—King man di yanin yultaman kidika dutah, dawak muih ūk yakat kalataman king āwaman sauni yakat pa yamni as yanin yultaman kidika. Yang lawik tanka yaktik mayulki king, tāt kau ulna bangkidika.
18“Papang makau sakkidika yaklauwi kalana king lani, dawak nuhni atnin bik, alasnina bik, ayangni nuhni atnin bik, man papangma Nebokatnesar yakat, king. 19Parasni nuhni kalana kidika yulni, sau ūk muihni balna, tūni ūk yuyulwa balna witing yakat nuhni kukulwa dai, dawak diyukwa dai witing muhni yakat. Dawak witing yaklauwi īwa dai, dawak sangnika karak kaldawa dai, witing yaklauwi angdika muihni yakat kaput kalyamnin kulwa kidika, as as kat makau dulauna dai, dawak ūk balna laih sau yakat taihlakna dai. 20Kauna witing nuhni kaldakana kat, dutni yamna dai, witing manah kaldakana, kaput laih witing kaupak dakyakna dai parasni dawak alasnina duwa dai kidika king kapat. 21Muih paskaupak naikau yakna bahang tinglau kapat kalna dai, asangpas biriniku balna karak kalpapakna dai, dibasta kasna turuh almuk kapat, dawak diwas kidika witing muihni yakat suihna dai, kaput laih Papang makau sakkidika yakat amangnilana kat, witing mana parasni nuhni duwa kidika sau kingni balna bitik minitna yakat, dawak witing yaklauwi tatuna duwi, kaput bik wais yakat kalanin kulwa yakat kalawi. 22Waralaih king Belsasar kidika walanibis, dawak man amanglataman witing yakat ais kalahna dai kidika, dawak man bik kulnam yudutni karak yalahtasman dai. 23Nawatkauh laih Papang hibin kau kidika sarahni kalyamna man, bahang sihtang tibil akat duwi aina, Papang ūni sūnitak balna dai kidika, dawak yultang aina muihni balna karak kalpakta kidika sūnitak balna kau wain dīnamana, dawak bik dawan dauh balna gol kau yamna, lalah kau yamna, bras kau yamna, ayan kau yamna, pan kau yamna dawak kipala kau yamna balna yakat ayangni nuhni yamna mana, kauna kidika daniwan dauh balna laih dakakawas ki, tatalwas ki, dawak di amanglalawas ki. Papang tingni kau man sangmaka sakkidika yakat laih ayangni nuhni yamtasdanaman, king#Job 12:10. di bitik laih witing yakat ki. 24Kaput bahang, witing yaklauwi tingni kidika sihna ulna atnin, 25MENE, MENE, TEKEL dawak PARSIN, 26bahang kidika tanka laih aput ki: MENE: Papang yaklauwi king āwanam mani balna kidika kulna sakki, danh witna; 27TEKEL: King man laih uman paun mahana ki, dawakat kuihwas buknaman; 28PARSIN: King āwanaman sauni adika sahwi yakna ki, dawak medos persas balna yakat diana karang ki.#5.28 Adika yulni bās adika laih paun kidika awaskat saramani lalahni: mené “lalah”; tekel (shekel) “siclo” (= $0.60) parsín, adika yulni, “peres” yulni kidika kau mahni yulna ki, tanka laih lalah papusdak. Adika ulna muihni yaklauwi libitna ki sihm mani balna yakat.
29Usnit kat, king yaklauwi pakna Daniel yakat asna pauni kidika āna atnin, dawak gol alahni as dinimak yakat alahna atnin, dawak isningna pakna, kidika minitni kaupak Daniel kidika pa bās yakat duna karang witing king kawa sauni yakat.
30Simh kidika puknita yakat Belsasar ipapamna dai, Caldeos balna kingnina, 31# M. sahyakna binina 5:31—6:28 kat kidika laih Arameo kau sahyakna binina 6:1-29 kidika ulna.dawak Media kaupak al as ayangni Darío yaklauwi pani kidika duna dai. Kidika yakat Darío kurih 62 duwa dai.
Currently Selected:
Daniel 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
