Daniel 7
7
Amana kau, di nuhni wayakani dutni, arungka talna
1Pukta as kat, Daniel amana talna, Babilon yakat Belsasar king kana kurihni tatuna yakat. Sahmuhwi, wauhtaya kau ulna di talna kidik. Bahang aput ulna dai.
2“Amana talnayang yakat wing sutni arungka kidika wauhwa dai, dawak kuma kidika lalamna. 3Kidika minitni yakat di nunuhni wayakani dutni sat arungka kalalahna kuma kaupak, tatuna as kalahwak dangnit yakat ūk balna kidika dangnitna us us kalalahna.#Rib 13:1; 17:8. 4Tatuna kalahna kidika laih layan kapat dai, kauna yākalnuh lawani duwa dai. Yang talasakyang kat, lawani balna kidika kalahna dai, dawak sau kaupak dulalauwak kalni kau atakna muih kapat, dawak tunan ba kidika muih kalna simh muih yul kulwa kapat.
5“Bu yakat talnayang kidika laih, dangkatakalbas kapat dai, pirini nakas kidika apis dulau dai, anani yakat di suluni bās kasna duwasak dai, dawak dakanayang aput kalyuyulwak: ‘¡Yawa dimuihni kastah, ampus kasnin sipman yakat!’
6“Bās yakat laih nawah bulni kapat dai, kauna dangni yakat lawani arungka duwa dai, dawak bik tunan arungka duwa dai, dawak parasni kidika witing yakat kalana dai.#Rib 13:2.
7“Di nuhni wayakani dutni, arungka yakat talnayang kidika amana kau yamadangni dai, dawak parasni nuhni palni duwa dai. Anani balna ayan dai; di bitik kaswa dai, dawak bik daukalwa dai, dawak sutni bayakwa kidika laih kalni kau atakna. Adika dini laih satuk dai as balna karak, yang talnayang dai kidika amana kau, kaput bik tamni#Rib 12:3; 13:1. salap duwa dai tunani yakat.
8“Yang tamni balna yakat talasakyang kat, tamni balna walsah yakat uk binibin as kalahna dai, dawak tamni balna bās bahwi yakmukna dai, witni kalahna kidik pani kalana atnin yulni, bahang kidika laih muih minikpa kapat duwa dai, dawak tinpas kaupak yulwa kidika laih anna manah dai.#Rib 13:5-6.
Papang la yamna
9“Ban talasakyang kat
king yalahnin pani#Rib 20:4. balna buas lalakna,
dawak muihbarak as yalahna dai.
Prakni kawa kidika pihni mukus kapat dai,
dawak basni bik pihni dai sīp butuni pihni kapat.#Rib 1:14.
Yalahwa sinini dawak wīlni balna kidika laih kuh dalhwa kapat dai,
10dawak witing muhnit tani yakat kuh dalhwi kalahwa dai simh was murwa kapat.#Rib 5:11.
Muih tausin tausin dini yayamwa dai,
dawak milian milian witing muhni tani yakat yaklauna bang dai.
Bahang mahka lā kidika yamna,
dawak wauhtaya balna bik apahna dai.#Rib 20:12.
11“Yang talasakyang dai, tamni dibin kidika yaklauwi yul annin balna manas yulwa kidika; yang talasakyang kat dini dai kidika iwi sasarhna, usnit kat kuh yakat rumhahana busna atnin. 12Di nuhni wayakani dutni ūk balna dai kidika bik parasnina dakyakna dai, kauna sangninaka laih diana dai awarni balna kaiwak kat.
13“Yang ban talasakyang dai pukta yak adika amana. Sirihni:
“Talingkat mukus kaupak kaina
muih as, simh muih al walanibis kapat,#Mt 24:30; 26:64; Mk 13:26; 14:62; Lc 21:27; Rib 1:7,13; 14:14.
bahang kidika muih dai kidik, muihbarak sikdai yakat kiuna;
dawak kalyayamwak yaihnit yakat kiuna.
14Dawak parasni kalana dai, alasnina yaksihni, dawak king kawa lani kidika bik,
dawak sau ūk muihni balna, tunina sat sat yuyulwa balna bitik witing dini yayamwa dai.#Rib 11:15.
Dawak parasni kidika laih ban witing karang,
dawak witing king kawa lani balna kidika sip daukalwas ban kaput karang.
15“Yang, Daniel, ising aitingkat muihsak kidika yang mikit bayakna dai, dawak kaput bik uba kultik kalbaunayang, di balna talnayang bitik kidika yulni, 16kalnina kau yaklauna balna bang dai kidika yaihnitna yakat yawanayang, dawak diyulnayang kidika tanka yayulna atnin. Witing yaklauwi tanka yayulna: 17‘Adika di nunuhni wayakani dutni arungka talnaman kidika laih king arungka kalahwarang ki, bahang witingna yaklauwi sau adika bitik tingnina dinit yakat karang ki.#7.17 Sau adika...karang ki: satuk yulnin karang kat: sau kaupak yaklalauna karang. 18Kauna usnit kat king kakawa sauni kidika didakyakwi Papang makau sakkidika tawanni balna yakat diana karang ki, dawak kaput laih witing dini ban karang ki saranidis.’#Rib 22:5.
19“Yang baisa amanglanik kulnayang, di nunuhni wayakani dutni arungka kidika, bahang kidika laih as balna bās kidika kapat-awasdai satuk dai, kat kau diwayakani dai bahang: ananina ayan duwa dai dawak tipisnimak laih bras dai; di bitik laih kaswa dai, dawak daukakalwa dai, sutni bayakwa balna kidika laih kalnina kau atakwa dai. 20Tamnina balna salap duduwa tanka kidika bik baisa tanka dunik kulnayang, dawak tamni binibin as kidika minikpa duwa dai, dawak tinpas duwa dai kidika muih kapat, kaput bik yulwa kidik annin yulni manah yulwa dai kidika, tamni as balna yakarak kidika kauh tanit nuhni bik kapat dai, tamni bās bubukna dai, pa kalana atnin yulni. 21Bahang talnayang adika tamni laih Papang tawanni niningkauh kalbauwa dai dawak minit bayakwa dai,#Rib 13:7. 22muihbarak kidika kiwi kana kat lā barangni kidika yamna dai, Papang makau sakkidika tawanni yakat,#Rib 20:4. kaput laih mani balna kidika kiwi kana dai, Papang tawanni kidika, king kawa lani sauni kidika yakat kawi pani duna atnin. 23Dawak yulna:
‘Di nunuhni wayakani dutni arungka
kidika laih kingkawa sauni as karangki sau akat,
bahang kidika laih satuk karang ki ūk balna karak;
sau adika bitik kasna karang ki,
kalni kau atakwi daukalna karang ki.
24Tamni salap kidika tanka laih king salap ki,
bahang witingna laih kidika kingni sauni yakat king kakawarang ki.#Rib 17:12.
Witingna usnit kat, ūk king kawarang ki,
bahang witing laih satuk karang ki tatuna balna dai kidika karak,
dawak kidika kingni balna bās laih tuklakna karangki.
25Papang makau sakkidika niningyakat yulna karang ki,
dawak Papang tawanni balna yakat danhyamwi kiwarang ki;
traitalwarang ki Papang lani balna kidik satuk ānin, dawak manuhni balna kidika bik,
Papang tawanni kidik witing kalni dinit yakat karang ki,
kurih bās minitkau papusbah.#Dn 12:7; Rib 12:14; 13:5-6.
26Kauna lā yamyang muihni balna lā yayamna karang ki,
dawak witing parasni kidik dakyakna karang,
daukalpamwi rumhwi dana karang.
27King kawa sauni lani, parasni, alasnina balna
sau akat kidika bitik kalana karang Papang makau#Rib 20:4. sakkidika tawanni balna yakat.
Kidika kingni lani laih sarandis ban kaput karang ki,#Rib 22:5.
dawak sau akat tawan balna bitik laih witing dini yayamwarang ki.’
28“Adika yulni balna laih akat danhki. Yang, Daniel, kulnik uba kulwi kalbauna, pihni kalnayang dai, kauna muih as kau bik adika yulni kalyultasyang dai.”
Currently Selected:
Daniel 7: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998