Daniel 10
10
Daniel, amana kapat sahmuni talna Tigris wasnikung yakat
1Persia kingni Ciro kidika kingkana kurih bās yakat, Daniel, ayangni uk kidika laih Beltsasar, witing amana kapat sahmuni talna, di ramh kidika, kaunah tanka amanglanin laih dadasni dai.#10.1 Kaunah tanka...dadasni dai: barangni yulnin kat kalbauyang muihni mahni. kaput kaunah Daniel witing kidika yakat yamni palni talna dai, bahang witing sip dai kidika tanka amanglana atnin.
2“Kidika mani balna, yang Daniel, uba kulnik bukna dai wīk bās. 3Di kasnin auhni balna kidika kastasyang dai, dimuihni dawak wain bik ditasyang dai, dawak di walapni balna bik kahtasyang dai, kidika wīkni bās kidika bayakna kat. 4Kurih kawak tatuna waiku kidika ma 24 yakat, yang Tigris wasni nuhni kungyakat sakyandai. 5Sirihni kat yang talnayang muih al as witing linin prakni kat kana, dawak banimak sitnin dini kidika laih gol kau yamnadai. 6Witing muihni kidika kipala lalahni yaringni kapatdai, dawak witing muhni kidika alwana lapwa kapatdai, dawak minikpa balna kidika kuhtuturni kapatdai, tingni balna dawak kalni balna kidika laih brās kapatdai, dawak witing dinit yulwa kidika muih mahni yulbabauwa kapatdai.#Rib 1:13-15; 2:18; 19:12.
7“Amana kapat kidika laih yang manah sipdai talnik, kat yaihkit kau muih balna kidika laih amanglalawasdai, kat muihsak dadauna dawak kiri uiwi yakmamaldana. 8Yang alas sakkauna adika amana kapat kidika talnayang. Muihki bitik laih āki dis kapat pihni kalnayangdai, dawak ising-aitingkat paraski dis kalnadai. 9Yulbauwak dakik, sangkadautik buknayang, kaput laih sau yakat tusyangdai. 10Usnīt kat muih tingni as yalaihwi yadulauna, kaput laih tingki kau dawak kalaskimak kau lawik taihnayang. 11Usnit kat yayulna: ‘Daniel, wais yakat Papang yaklauwi dalani talwa kidika, yamni dakah mayulki kidika: lawah kat yang adika yasihna manyakat,’
“Kidika yulni balna yulwi danh dawak, yukwinah lawanayangdai, lawik kalkikau ataknayang. 12Kaput laih yayulna: ‘Yamaduwinih, Daniel, kat tatuna kaupak di amanglanin dadasni kidika amanglakuhti yamnaman, dawak Papangma muhni tani yakat buknaman kidika, man mamatyulnaman balna kidika dakana. Kidika bahang yang aiwanayang. 13Insal, Persia kingni walanibis tatuna kidika nikingkauh yaklauna ma 21 praisni; kaunah Miguel,#Jud 9; Rib 12:7. insal balna pasyakat tanit nuhni kidika, kaiwi ilp yana, kat yang alas alahwanayang dai bahang Persia kingni balna karak. 14Kaput bahang tanka yamni mayulna aiwanayang, man tawanma yakat di kalahwarang kidika ma balna kaiwarang yakat, kat man amana kapat talnaman kidika laih, kidika mani di balna kalahwarang tanka.’
15“Witing kidika yayulwak, yang sau yakat mikpa kidika talasakyangdai yul as bik yultas. 16Sirihni muih as kaina muih al walanibis as yang kungkimak yakat sukna. Kaput dawak kalyulnayang muhkitani kau sakkidika yakat: ‘Dakiwan, amana kapat talnayang kidika kulnik kaida kidika bunghdana, dawak paraski bik disdana. 17¿Amput man dima yamyang adika yulbauwarang yah, paraski bitik palni disdana kidika dawak wingkita bik sip dutasyang kidika?’
18“Kidika muihni, simh muih al walanibis kapatdai kidika watwi yasukna, dawak baisa paraski wisam yana 19dawak yayulna: ‘Yamaduwinih dawak bik kulta kalbauwinih. Papang dalani matalwi; ¡Kulnam dulautah, dawak bik kulnam dadasni yamtah!’
“Yulyabauwa sakkat, kaldakanayang paraski apis dunayang, dawak yulnayang: ‘Dawan, yulyabautah, waralaih paraski yanaman.’ 20Kaput laih yayulna: ‘¿Amanglatamanh, ais yamtik matalna aiwanayang kidika? Kat waralaih, wattik kalbauki bahang, insal kidika karak Persia kingni walanibis tatuna kidika. Dawak kidika karak kalbautik danh daki kat, Grecia kingni walanibis al tatuna insal kidika kaiwarang ki. 21Waralaih mayulki, wauhnitaya as ramh kidika yakat ulna kidika tanka: Kidika balna niningna yakat kalbautayang kidika, ilp dutayang Miguel kaupak manah,#Jud 9; Rib 12:7. israel kingni walanibis al tatuna, insal kidika.
Currently Selected:
Daniel 10: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
