Daniel 11
11
1Yang bik witing kulnin dulaunayangdai, dawak ilp kalanayang, Media kingni Darío kidika king kana kurihni tatuna yakat. 2Dawak waradika laih matingkat di ramh kidika talma:
Tingpal niningkauh dawak wadah niningkauh kingni balna kidika
‘Persia yakat baisa king bās kakawarang ki, kidika balna usnitkat king arungwa kidika kawarang ki, bahang kidika tanit di duyang karang ki tatuna bās kakana balna kidika karak dawak. Dawak witing di manas duwa kidika munah parasni bik nuhni duna karang ki, dawak Grecia kingni lani niningkauh manah yaklauwarang ki. 3Kaunah kidika usnītkat king ūk kana karang ki, bahang witing laih war kalbauyang muihni as karang ki, dawak witing laih king balna minitna yakat karang ki, dawak witing ais yamnin kulwa kidika yamna karangki. 4Kaput kaunah, witing yamni pani duwarang usnitkat, witing kingni lani nuhni kidika daukalna karang ki, dawak arungka sahyakna karang. Dawak adika kingni sulani balna kidik sip king kakawas karang ki, dawak bik kingni lani nuhni kidika parasni-awas karang ki muhnilaudai kapat, kat sahwi kalahna karang bahang dawak witing pāni yakat ūk king kakana karang.
5‘Wadah niningkauh kingni kidika laih parasni nuhni duna karangki, kaunah kalbauyang ahalni balna duwa kidika taninatuna as karang kidika laih tanit parasni karang ki witing karak, bahang witing parasni kidika king nuhni as minit yakat karang ki. 6Kurih as as bayakwak witingna albupak aslah lani yayamwarang ki: wadah niningkauh kingni kidika yaklauwi walanibis yal kidika kalawak duna karang tingpal niningkauh kingni yakat, kidika laih kulnin aslah dunin kidika yulni kaput yayamna karang ki. Kaunah kidika kulnin lani kidika dauh kalna karang ki, kat yal kidika dawak walanibis balna, alni dawak dini yamyang balna kidika bitik laih ihina karang ki. 7Kaput kaunah, witing wanaihni balna paskaupak yaklauwi tingpal niningkauh kingni kidika niningyakat kalbauna karang, dawak king ūni parasni kidika kawi laihwi duna karang, dawak witing kalbauyang ahalni balna duwa kidika yaklauwi minit bayakwi taihwi duduna karang. 8Baisa kidika minit yakat, witingna daninawan dauh yayamna balnadai kidika Egipto yakat duwi uina karang, gol dini dawak lalah kau di yayamna balnadai kidika bik duwi uina karang. Kurih as as bayakwak kidika nesan balna bu kidika war kalbabauwas karang, 9tingpal kingni kidika yaklauwi wadah kingni nining yakat kalbauwarang, kaunah sip-awas dawak nawatwi kalahna karang.
10‘Kaunah tingpal niningkauh kingni walanibis balna laih redi kalalahna karang war kalbauna atnin, dawak kalbauyang muihni balna mahni ududuhna karang. Kidika paskau as kalahwi kiuna karang kalbauyang muihni balna duwa yakarak wadah niningkauh kingni niningyakat kalbauwi minit bayakwi kawi duna atnin, dawak di bitik kidika yakat daukalna karang simh was nuhni pauwa kapat; kidika kaupak watwi niningyakat kalbauna karang bahang kaput laih wadah kingni ūni parasni kidika yakat kiwi kana karang. 11Tingpal niningkauh kingni kalbauyang balna duwa kidika yaklauwi wadah niningkauh kingni niningyakat kalbauwa kidika yulni kulnin daukalna karang, kaput laih witing kidika kalahwi kalbauna karang waihnila nuhni kidika niningyakat, kaput laih bitik palni minit bayakna karang. 12Minit bayakna kidika dawak waihnila balna mahni palni dadauna kidika yulni witing manah kapat kaldakana, kaunah witing parasni kidika naini laih duwas karang ki. 13Tingpal kingni kidika watwi uduhwi duwarang ki kalbauyang muihni balna kidika, baisa tanit mahni karang ki muhnilaudai kidika karak dawakat kurih as as bayakwakat, wadah niningkauh yakat kalbauna karang kalbauyang muihni balna mahni duwi kiwi, dawak bik kidika balna laih kalbauyang dini yayamni manah dudukarang ki.
14‘Adika dini kalahwakat, manas laih wadah niningkauh kingni niningyakat yaklalauna karang. Kidika pasyakat israel muihni muih dudutni balna kidika bangkarang, amana kapat kau namangkana kidika yakat, kaunah witingna sip-awas kalalahna karang. 15Tingpal kingni kidika kaiwi kalbauyang balna ūnina parasni kidika daklana yaihnitkau yakat sau uhwi dukilkiwarang, kaput yamwi kalbauwi minit bayakwi kawi duwarang. Wadah niningkauh muihni kalbauyang tanit yayamni balna kidika bik sip-awas karang waihla kaiwi kawa kidika laihwatna atnin. 16Kalbauwi kawi kiwa kidika witing ais yamkih kidika kaput laih yamna karang sip-awas kalna muihni balna yakat, dawak muih as bik diskarang nining yakat yaklauna atnin, dawak watna karang sau nuhni yaksihni#11.16 Talah 8:9 yakat. yakat, witing tanipas yakat di babang kidika bitik laih daukalna karang. 17Baisa kidika minit yakat, redi kalahwi wadah sauni kidika bitik laih laihwi duna karang, witingna niningna yakat, kidika kingni karak pramis as yayamwarang dawak witing walanibis yal kidika kalawak duna karang, kidika laih kingkawa lani kidika daukalpamna atnin yulni, kaunah witing yamnin kulwa balna kidika bitik laih dauh kalna karang. 18Kidika usnitkat kuma kungkauh tawan nunuhni balna niningyakat kalbauna karang, dawak manas bik witing tingni yakat bubukna karang; kaunah kalbauyang balna taninatuna nuhni as laih adika asalni lani kidika witing yaklauwi dangh yamna karang, dawak tingpal kingni niningyakat asalni kidika kalahna karang.#11.18 Kidika usnitkat kuma kungkauh...kalahna karang: kaput wirlana kidika yamni kapat ki. Hibru kau laih amangladas ki. 19Kidika kaupak, king kidika, witing sauni kau kalbauyang balna ūnina pararasni kaupak kalahwi kiwarang; kaunag dutni as kalpakwarang bahang kidika yakat sangnika disna karang, dawak watwi witing yulni dakawas karang.
20‘Witing pani kidika yakat king ūk kana karang, dawak di tunan minit yakyang muihni kidika sihna karang kaput laih witing kingkawa sauni kidika di duyang kalna atnin yulni; kaunah ma as as bayakwak ihina karang, kaunah kalbabauwa pani yakat laih ihiwas karang ki.
21‘Witing kidika usnit yakat muih al dutni dauh kalkulna kidika satni as king kawarang, bahang witing laih king kanin muihni-awasdai, kaunah dutni balna kidika malwi muih amanglanin-awas, kaput laih alas lani kau parasni kidika laihna karang. 22Parasni balna witing niningkauh yaklalauwa balna kidika bitik laih bahwidis yamna karang, dawak baisa minit yakat pramis yayamna tanituna kidika īna karang. 23Kulnin yamni lani kau pramis yayamna muihni yakat bik alas kalyulna karang, dawak muih bolah duwakarang bik witing minit bayakna karang. 24Muih as bik kaput kalahwarang kidika tahawasdai karang bik, sau tanit yamnidai kidika yakat kāna karang, dawak muihni bararak balna yayamwas dinidai kidika witing laih yamna karang: witing kalbauyang muihni balna duwa kidika karak di yayamni balna dawak ritsni balna kidika bik sahyakwi duduna karang kalbauwi dakyayakna dini balna kidika Tawan pararasni balna niningyakat kalbaunin kidika redi kalalahna karang, kaunah kidika laih ma bolah kaput yayamwarang karang bik.
25‘Witing parasni dawak kulnin dadasni duwa kidika yaklauwi kulnin dulauwarang, dawak wadah kingni niningyakat kalbauwarang, kalbauyang muihni balna mahni duwi, kaput laih parasnibik nuhni karang. Dawak wadah niningkauh kingni kidika witing bik kulnin dadasni kau kalahwi kalbauna karang bahang witing bik kalbauyang muihni balna mahni dawak parasni nuhni karak kawi kiuna karang; kaunah malnikau dutni kalyayamna karang bahang waihnila niningyakat sip-awas kalna karang. 26Simh kidika balna witing tinibil yakat ilwak di kakaswa balnadai kidika yaklauwi kalyayamwak witing dutni kalahna karang, witing kalbauyang muihni balna duwa kidika sip-awas kalalahna karang kaput bik laih kalbauyang muihni balna duwa kidika mahni palni dadauna karang. 27Kaput laih king balna kidika albupak, witingna biri biri kaldaukalnin manah kukulwarang, dawak simh tinibil yakat yalahwi di kakaswarang, dawak biri biri alas manah yuyulwarang, kaunag witingna albupak ais laihnin kukulwa kidika lalaihwas karang kat, baisa mani kidika kaiwi kawas bahang. 28Tingpal niningkauh kingni kidika nawatwi kiwi kana karang pāni yakat di manas palni duwi, kalbauwi dakyakna dini balna kidika, dawak kaput laih holi pranimis niningkauh yaklauna karang; dawak witing ais yamnin kulna kidika yamna karang, dawak kidika usnit kat witing sauni yakat kiuna karang. 29Māni āna kidika kiwi kawakat, witing kalbauyang balna duwa kidika sihna karang wadah kingni niningyakat, kaunah muhnilau minit bayakwi taihnadai kapat laih yamwas karang. 30Witing kalbauyang balna duwa kidika mā kawa#11.30 Mā kawa: barangni yulnin kat Quitim. niningkauh kalbauyang muihni balna kidika yaklauwi niningna yakat kalbabauna karang, bahang kidika balna laih kuma kuringkau duwi kiuna karang, kaput laih witingna muihsakdauwi kikirarang. Kaput laih tingpal kingni kidika kulnin dutni kulwa kidika kau holi pranimis kidika niningyakat yaklauna karang, bahang witing muih buas holi pranimis kidika dukih diawas muihni balnadai kidika duna karang witing dini yamna atnin.
31‘Witing kalbauyang muihni balna duwa kidika yaklauwi makatyulnin ūni dawak ū pararasni balnadai kidika bik resnipikdis yayamna karang dawak ma bitik yakat sakripais yayamwa kidika dadana karang, dawak kidika yakat holi dini yakat resnipik kalawas wayakani kidika ahana karang.#Dn 9:27; 12:11; Mt 24:15; Mk 13:14. 32King kidika dukih palni witing bakannin kulwarang pramis holi kidika niningkauh yaklalauwa balna kidika, kaunah tawan balna Papang yakat dalani tatalwa balna kidika laih tanitna yak barangni uina karang, dawak trabil balna kidika niningyakat yaklalauna karang. 33Tawan muihni sins duyang balna kidika yaklauwi muih manas yakat sumamalna karang, kaunah usnīt kat kidika balna yakat īmumukwarang dawak kuhkau bubuswarang, dawak di duduwa balna bitik laih mamalna karang, dawak kaput laih dadauwas balna kidika pa ūk yakat laihwi duwi uiwi papakwak dinina yayamwarang. Kidika laih ma parahni manah kaput karang. 34Uiwi laihnin mani balna kaiwikawak, ilp dibin as dudwarang, kaput kaunah muih manas palni laih kidika balna karak aslah kalahwarang, kidika laih witingna alas dukih diawa yulni kaput yayamwarang. 35Kaput bik laih, tawan muihni balna yakat sumamalwa muihni balnadai kidika balna yakat bik laihdang atwi uhuiwarang, kaput laih, laihwi talwi dawi, maisihni kidika bitik suhwi yakna karang dawak bik barangni diyakna karang, kaput laih mani witni kaiwi kawarang mani āna kidika kat.
36‘Tingpal kingni kidika, witing ais yamkih kalawa kidika kat yamna karang. Witing manah kapat kaldakawa kidika nuhni palni kulna karang bahang, witing kidika dawan balna bitik kidika karak tanit kalkulwarang,#2 Ts 2:3-4. dawak Papang ramh palni kidika nining yakat yul yamadadanghni yulwarang;#Rib 13:5-6. dawak di bitik kidika witing nining yakat yamni manah kalahna karang, Papang yaklauwi wah kalsihwarang kat; kat Papang yamnin kidika laih yamnakarang bahang. 37Adika kingni laih witing muihnibararak balna daninawan dauh dai kidika yakat kulwas karang ki, dawak yayal witingna daninawan dauh balna yakat bik, dawak dawan dauh ūk balna kidika bik kulwas karang; kat witing laih tanit nuhni kaldakawa bahang kidika dawan balna karak dawakat. 38Kaput kaunah pararasni balna daniwan yakat nuhni kulna karang, dawak kidika daniwan yakat minitna yuyulwasdai kidika witing muihnibararak balna kidika yakat minit yulwarang; dawak dukiwi kalana karang gol, lalah, kipala minit nunuhni balna kidika, dawak di minit nuhni balna kidika bik. 39Kalbuayang balna ūnina parasni kidika nanitdaknin, kat muih balna pa ūk daniwan kau kukulwa balna kidika duna karang; dawak adika kingni yakat minitna yuyulwarang muihni balna bitik, dawak witing yaklauwi resnipik nuhni diyamna karang, dawak wark tunan nunuhni balna āna karang dawak bik sau diana karang witingna minitna kidika.
40‘Mani witni kidika kiwi kawakat, wadah kingni kidika yaklauwi tingpal kingni niningyakat kalbauwarang, kaunah adika witing kalahna karang parasni palni wingbauwa kapat, wadah kingni niningyakat, dawak kalbaunin kārni kidika banghna karang kidika sauni, kalbauyang balna aras kau kikilwa balna dawak, kuma munah bik kuring kidika mahni karang. 41Sau Nuhni Yaksinh pasyakat bik kāna karang, dawak muih manas bik īna karang; kaunah Moab dawak Edom muihni balna laih yaklalawarang, dawak Amón sauni kidika nuhni kauh bik yaklalana karang. 42Kalbauyang muihni balna duwa kidika sau pani ūk kau bik kawi duduna karang, dawak Egipto palni bik sip yaklawas karang. 43Dawak duwi uiwarang di minit nuhni gol, lalah, dawak di minit nunuhni balna kidika bitik Egipto kau duwa kidika; kidika usnit kat Libia dawak Etiopía, kidika balna minitna yakat bukna karang. 44Kaunah yul duna karang ma kilwa dawak wadah niningkaupak bik, bahang witing isning irikwarang; dawak kulnin daukalwak kulwarang muih mahni īna atnin, 45dawak witing ūni labanni kidika pakna karang kuma dawak Sau Nuhni Yaksinh kidika balna walsah yakat. Kauna kidika yakat witing daunin kidika kal-laihna karang, dawak muih as bik dis karang ilp kalana atnin.
Currently Selected:
Daniel 11: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
