Daniel 9
9
Daniel minityulna tawanni yulni
1“Asuero walanibis, Darío, medos sulani, caldeos balna kabaninamint dai. 2Kingkana kurihni tatuna yakat, yang, prapit Jeremías wauhnitaya kidika lan alahwalikyang dai kurih 70#Jr 25:11; 29:10. tanka kidika, bahang kidika bayakwak kat Jerusalén daukalwarang atna kidika kaiwi kalahnin, bahang Papang yaklauwi kaput kalyulna dai Jeremías yakat. 3Yang mikityulnayang Papang kalni dinityakat buktik, di kastas, prak utuhni kidika āwik, dawak wan yakat yalahnayang. 4Yang Papang ki yakat mikit yulnayang, dawak dutki balna kidika lāih yaktik yulnayang:#Neh 1:5-11; 9:6-37.
‘Papang man laih nuhni palni man, parasma bik nuhni dutaman, man ais yulnaman yakat yamtaman, man yulmakat dakawi yayamwa balna yakat dalani lani dutaman kidika niningnakataman. 5Yangna dutni yamnayangna, man yakat makultas danayangna; dawak man lāma balna rumhtik danayangna. 6Man dima yamyang prapit balna yulnina dakas danayangna, witingna kidika man ayangma duwi yuyulna dai king balna yakat, tunan muihni balna yakat, mamuihkibararak balna yakat, man tawanma israel yakat. 7Papang, man laih barangni man, kauna yangna Ju muihni balna yangna laih asalni dakayangna warmani; Israel Jerusalén kau bangkidika, dawak israel uk balna bik, yaihnitkau bangkidika bik, naikau balna kidika, man lawa rumhmuktang uina dai kidika namangkauh yaklalauwak. 8Yangna Papang, simh king balna kapat, tunan muihni balna dai kapat, dawak muihkinabararak balna kapat asalni dakayangna, kat man namang yakat dutni yamnayangna bahang. 9Kauna Papang minikun talwi dutni dawak disnin kidika man dima palni ki. Yangna man namangkauh lawanayangna 10dawak man yakat madakas danayangna, Papang, dawak man yulma balna prapit balna yanasumamalna yakat laihtik dutas danayangna. 11Israel balna bitik man sumalnaman yakat laihwi duwas dadana, yamnin paknaman yaka balna bik yamnin yulwas dadana; kaput bahang dutni kidika yangna mikitna yakat kaina, man dimayamyang Moses ulna kaput, lā balna wauhnitaya yakat,#Lv 26:14-39; Dt 28:15-68. kat man namang yakat dutni yamnayangna bahang. 12Man wah nuhni yangna kau sihnaman, yangna kau sihnin yulnaman dai yakat, dawak tākinatuna kakawa balna yakat bik; baisa sau akat kaiwi kalahwas ki wah as yangna kau sihnaman kidika, Jerusalén minityakat. 13Adika dutni bitik yangna mikitna yakat kaina, Moses lani balna kau ulna kaput; kauna yangna laih manyak waltas danayangna, man yangna Papangkina, di bitik yamtaman kidika barangni manah ki. Dutkina baisa rumhtik datasyangna, man ramhma yakat yawasyangna. 14Kaput bahang Papang, adika dutni laih man lawa yaknaman, dawak mikitna yakat sihnaman, kat yangna Papangkina man kidika barangni man bahang di bitik yamtaman yakat; kauna yangna laih man yakat dakakih yanawas dai.
15‘Yangna Papangkina, man parasma nuhni manikingkana man, tawanma israel Egipto kaupak yaknaman kidika,#Ex 20:2; Dt 6:21; Jr 32:20-21. kaput laih man ayangma nuhni yamnaman dai kidika mani kaupak warmani kat; kauna yangna laih dutni yamnayangna 16Papang yangna amanglatayangna man laih dalani lani dutaman. Kalma dinit yakat bukdi yuldi man kulnam daukalna kidika Jerusalén minit yakaupak yaktah, kat kidika laih man tawanma nuhni bahang, dawak asangma holi bahang. Sau uk balna yaihnitkau balna kidik yaklauwi sarahni yuyulwi Jerusalén yakat dawak tawanma yakat bik, yangna dutkina yulni dawak muihkinabararak balna dutnina yulni bik. 17Papang, adika makatyulna, dakah, dawak man dimayamyang kalma dinit yakat bukwi yulwa kidika, man ayangma kau, Papang talah dalani lani dutaman kidika kau, man ūma yakat kulnin bukna kidika. 18Papang dakah dawak laihta talah, yangna daukalna yangna kidika dawak bik daukalna kidika tawan yakat kuduh man ayangma yakwi yuyulwa pani dai kidika. Yangna man yakat yultayangna kidika laih man yakat barangni yangna tanka laih awaski, kauna man dalani lani nuhni dutaman kidika kau kultik yultayangna.#Neh 9:17-19,27-28; Sal 51:1-4; 57:1-3; Is 54:8,10; Tit 3:5. 19¡Papang, Papang! ¡Yanadaka, dutkina datang diswang! ¡Wirlawa yanatalah Papangki, dawak man tawanma yulni bik, ayangma yakwi yulwa kidika, nai tahawinih!’
Prapit yulna balna wik 70
20“Yang ban mikit yultik, dutki balna kidika Papang muhni yakat yaktik yultik, dawak Israel dutni yamna kidika bik yaktik yulna yang, dawak kalni dinityakat buktik yulnayang yang Papangki yakat witing asangni holi kidika yulni bik. 21Yang mikityulta sakyangkat, Gabriel,#Lc 1:19,26. amana kau talnayang dai kidika muhnilau kau, yang sakyang yālhwi kaina. Papang kau sakripais yamnin awarni dai maulahu. 22Dawak yayulna:
‘Daniel yang aiwanayang, adika dini balna lāih yaktik namangkanik. 23Man mahka mamatyultangkat, Papang yaklauwi nangmatlana. Yang aiwanayang kidika tanka mayulna atnik, kat Papang laih uba dalani matalwi. Bahang waralaih yamni dakah, kaput laih man amana kapat talnaman kidika tanka:
24‘Wik 70 bayakwarangki
tawanma minit yakat, dawak tawanma nuhni minit yakat bik,
kaput laih danh yamna atnin niningkauh yaklauwa kidika, dawak dutni yamwa kidika bik
kaput laih dutni yamna kidika kaupak dutni balna kidika dawak disna atnin
dawak bik lā kat kidika āna atnin, ban kaput atnin,
kaput bik laih man amana kapat talnaman kidika, yakat kalahna karang
dawak holi kidika, holi kalyakna atnin.
25Adika dini daka amanglanam ki:
yamnin pakwarang kidika kaupak
Jerusalén kidika watwi laihwi dulaunin
tunan muihni Papang dini yakna kidika kiwi kawarang kat,
kidika laih wīk 7 bayakwarangki,
tāpas dawak daklana balna kidika watwi laihwi dulauwi yamna kidika Jerusalén yakat,
laih wīk 62 bayakna karang,
kaunah kidika mani balna laih dalani wauhnin mahni palni karang ki.
26Wīk 62 kidika bayakwak usnīt kat
tunan muihni tunan yakat dia ututuhna, kidika sangnika dadakna karang.
Jerusalén dawak Papang ūni kidika bik daukakalna karang
king as kaiwarang kidika muihni balna yaklauwi.
Kaput laih mani witni kidika sirihni kaina karang, was pauwi kaiwa kapat,
witni kat bik wār lani dawak daukalnin lani kidika ban karang
kaput kalahwangti yamna bahang.
27Baisa minit yakat wīk as,
muih manas karak pramis yamna karang,
kaunah wīk papusbah kat
sakripais dawak minitdis kalanin kidika balna bik laihwatna karang
Dawak holi dini kidika resnipikdis wayakani yamna karang#Dn 11:31; 12:11; Mt 24:15; Mk 13:14.
sakripais yamwa pani muhni tani yakat,#9.27 Sakripais yamwa...yakat: kaput ulna kidika yamni kapat ki. Hibru kau laih yulwi dawak lawani minit yakat.
daukalwi disyamnin āna kidika
kiwi bukwarangkat, angdika muihni yaklauwi di yamadangni yamna kidika muihni minit yakat.’ ”
Currently Selected:
Daniel 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
