2 Samuel 9
9
Devid yaklauwi Mefi-boset yakat yamni kalyamna
1Ma as kat Devid yaklauwi yulwi dakana: “¿Saúl walanibis balna dai kidika kaupak as dauwas sangka likyah, bahang kidika muihni yakat yamni kalyamnik Jonatán ayangni kau?”#1 Sam 20:15-17.
2Saúl sulani kaupak, dini yamyang as likdai ayangni laih Siba, bahang witing yakat kalyuyulna Devid muhni yakat kiuna atnin. Dawak Siba kidika kiwi yaklauwakat king kalyulwi dakana:
—¿Man Siba manh?
—King man dima yamnik muihni yang —kalatna.
3Kaput laih king kalyulwi dakana:
—¿Saúl sulani balna kaupak baisa as likyah, yang kidika yakat di as yamna atnik Papang ayangni kau?
Dawak Siba yaklauwi nangnitlana:
—Baisa Jonatán walanibis as likki, kaunah witing kidika laih kalni bupak sakahwa ki.#2 Sam 4:4.
4King yaklauwi kalyulwi daka:
—¿Angkat sakyah?
—Siba yaklauwi kalyulna:
—Lodebar yakat, Amiel walanibis, Maquir ūni yakat sakki.
5Kaput laih king Devid yaklauwi pakna, kidika pāni kaupak yakwi duwi kiuna atnin; 6Jonatán walanibis Mefi-boset, Saúl mani kidika Devid muhni yakat kiwi witing abuk dana rispik lani kau.
Devid yulna:
—¡Mefi-boset!
—King man ais yultaman yakat karang —kalatna.
7Dawak Devid yulna:
—Yamaduwinih, kat yang lawik man yakat yamni mayamki bahang, man papangma Jonatán ayangni kau. Yamting kat man kukungma Saúl sauni balna dai kidika bitik nawatwi mamana karang, dawak yang tikibil yakat nining ban kaput dikasma.
8Kaunah, Mefi-boset abuk dawi kalyulna:
—¿Ais yamta man kingman kidika dima yamyang yakat talamanh, yang laih sul almuk dauna as kapatyang kidika?
9Kaput kaunah, king yaklauwi kalyulna Siba kidika witing yakat kiuna atnin; bahang witing laih king Saúl dini yamyang barakni as dai, bahang kalyulna:
—Man damawan mani yakat kalanayang, witing dini balna dai kidika bitik, dawak sulani balna dinina dai kidika bik. 10Kaput bahang, man walamabis balna karak, dawak dima yamyang balna karak bik, sau kidika di dahtanama witing dini atnin, dawak minik yaktanama kidika uduhtanama, kaput laih sip karang, man damawan sulani balna kidika sangka atnin, kaput kaunah Mefi-boset laih yang tikibil yakat ban di kasna karang.
Siba kidika walanibis 15 duwa dai dawak dini yamyang 20 duwa dai, 11bahang king yakat nangnitlana:
—King man ais yamnin yulnaman kidika bitik laih adika dima yamyang yaklauwi yamna karang.
Dawak Mefi-boset laih nining king tinibil yakat di kaswa dai, sihm king walanibis balna dai kapat. 12Dawak Mefi-boset kidika walanibis dibin as duwa dai, ayangni laih Micaía, dawak Siba ūni yakat yalalahwa balna bitik kidika Mefi-boset dini yayamwa dai. 13Kaunah Mefi-boset kidika kalni bupak sakahwa dai, bahang witing laih Jerusalén yakat yalahwa dai, dawak bik king tinibil yakat nining dikaswa dai.
Currently Selected:
2 Samuel 9: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
