2 Samuel 10
10
Devid yaklauwi minitna bayakwi sirio dawak amonita balna yakat bik
(1 Cr 19:1-19)
1Ma as bayakwak Amonita kingnina Nahas kidika dauna, dawak kidika pāni yakat witing walanibis Hanún kidika king kana. 2Kaput laih Devid witing kulna, Nahas walanibis Hanún yakat bik sihm kaput yamni kalyamnin, Nahas kau yamni kalyamna dai kapat, kaput kulna kidika yulni kalbauyang tunan balna kidika yakwi sihna Hanún yakat kalyulna atnin witing papangni dauna kidika yulni witingna bik dalani kukulwi. Kauna Devid ahalni, kalbauyang balna tanina tuna kidika Amón balna saunina yakat uiwi kakawakat, 3Amón muihni balna taninatuna balna kidika yaklauwi, witingna kingnina yakat kalyuyulna: “¿King man kultaman rahm Devid yaklauwi man papangma dauna kidika yulni muih sihna kultamanh kulnam bukna kidika yulni? ¡Rahm palni kidika laih sipki witingna aina kidika laih tawan nuhni adika yakpakdi talnin, dawak usnit kat daukalpamna atnin!”
4Kaput laih Hanún yaklauwi pakna Devid muih sihna balna kidika laihna atnin, dawak kungninabas kidika papusdak karhna atnin, dawak asninana balna bik papusdak iswi bisna atnin, saranina kat. Usnit kat damukwak uina. 5Kidika Devid dakana kat, muih sihna tanitna kau uiwi kalpakna atnin, kat uba asalni pakna bahang, dawak dipapakwak Jericó yakat watna atnin, witingna kungninabas nanaiwa kat witingna sipkarang uina atnin.
6Amón muihni balna amanglalana witingna muih dudutni balna kidika Devid niningyakat, kaput bahang Bet-rehob dawak Soba pāni kidika balna kaupak sirio muihni kalbauyang balna kidika tausin 20 duduna lalah kau minitlauwi, dawak king Maaca kaupak muih 1,000 duduna, dawak Is-tob kaupak muih ahal tausin 12. 7Kaunah Devid dakawi witing Joab kidika yakwi sihna kalbauyang muihni balna bitik karak. 8Kaput laih Amón muihni balna kidika uiwi ridi kakalna tawan nuhni kiwi kawa yakat, dawak sirio muihni kalbauyang Soba dawak Rehob pāni kaupak balna kidika, kaput laih Is-tob dawak Maaca muihni kalbauyang balna kidika laih di dadahwa pāni yakat kalahwi uiwi panina duduna. 9Joab witing talwak muhnit kaupak dawak dangnit kaupak bik nining yakat kalbaunin yayamwak, Israel sulani tanit yayamni balna kidika yakwi sirio muihni kalbauyang balna yakat kalbaunin yakna. 10Kidika usnit yakat kalbauyang muihni ūk balna kidika laih witing wirahni Abisai tingni yakat dana, bahang witingna laih amonita muihni balna niningna yakat kalbauna atnin, 11dawak kalyulna: “Siria balna kidika witingna kauh sip karang kat yang karak, man aiwa ilpki āwama, kidika awaskat amonita kidika witingna kauh sipkarang kat man karak dawak, yang yawik ilpma awaki. 12Kulnam dulautah, mayang manekisan yulni makulnik parasni yamdi kalbaudang, dawak bik mayang maPapangki tawanni nunuhni balna yulni bik. ¡Dawak Dawan yaklauwi yamna karang, witing amput yamni talwa yakat!”
13Joab witing kalbauyang ahalni balna karak kawi kiuna kalbauna atnin asiria balna niningna yakat, kaunah witingna kikirana. 14Amonita witingna tatalwak Siria muihni balna kidika kikirak, witingna bik Abisai niningkauh kikirana dawak tawan pasyakat kawi uina. Kaput laih Joab witingna niningna kauh kalbauwasdana dawak Jerusalén yakat nawatwi kiuna.
15Siria muihni balna kidika dakakawak Israel yaklauwi minitna bayakna atwak, watwi kalududuhna. 16Hadad-ezer yaklauwi Siria muihni balna Éufrates wasni nakaskau bangdai kidika duaina, bahang witingna laih Elam kat uiwi wawatna. Witingna taninatuna kidika laih Sobac dai, Hadad-ezer ahalni kalbauyang balna kidika taninatuna. 17Kaunah kidika yulni Devid yakat kalyuyulna, usnit kat witing yaklauwi Israel muihni kalbauyang balna bitik laih sihna, Jordán wasni kidika dakyaklawi Helam kat uina. Kidika Helam yakat Devid witing Siria muihni balna karak kalbabauna, 18kaunah witni kat Israel balna niningna kaupak kikirana, kat Devid yaklauwi īna kidika laih tausin manah 40 dai, bahang kidika muihni balna laih aras kau kilwi kalbabauwa balna dai, dawak kār kau kilwi uiwi kalbabauwa balna kidika laih 700 dai; dawak kidika minit yakat Devid yaklauwi Sobac yakat tusna dai, witing laih Siria muihni kalbauyang balna kidika taninatuna dai, kaput laih kidika yakat dauna. 19King balna Hadad-ezer karak aslah kalahna balna dai kidika witingna tatalwak, Israel balna yaklauwi minitna bayakwak, dawi witingna kulninna aslah yayamna Israel balna karak, dawak witingna tingnina dinit yakat bubukna. Kidika kaupak Siria muihni balna kidika yamaduduna Amón muihni balna yakat watwi ilp diana atnin kidika.
Currently Selected:
2 Samuel 10: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
