2 Samuel 8
8
Devid war kalbauna balna kidika
(1 Cr 18:1-13)
1Kidika usnit kat Devid yaklauwi filisteo balna yakat minitna bayakna, dawak tataihna, kaput bik laih parasnina kidika dakyakna dai. 2Dawak moab muihni balna kidika bik minitna bayakna dai, dawak dipakwak sau yakat kalalangna dawak wah kau kulwi ditalna: kulwi talnin wahni kau kulna bu yakat bukna balna kidika laih daunin yakat diwirlana dai, dawak kulwi talwa wauhni kau aslah kulna pasyakat bubukna balna kidika laih iwas sangka didana. Kaput laih moab muihni balna kidika Devid yaklauwi taihna dai, dawak tunan minit bik lauwi kalalawa dai.
3Devid yaklauwi, Soba kingni Rehob walanibis Hadad-ezer yakat bik minit bayakna dai, adika alni witing Éufrates wasni nuhni kau sau kidika bitik witing dunin yamna dai yakat. 4Kidika balna, Devid witing laihwi muih 1,700 aras kau kilwi kalbauyang balna kidika, dawak tausin 20 kalkau uiwi kalbabauwa balna kidika, dawak bik war kalbaunin kārni balna aras mumurwa dai kidika, aniras balna kidika bitik kalnina bahna dai, kaunah kalnina bahwas dana dai kidika laih kār 100 praisni murnin aniras balna kamanah dana dai.
5Kidika usnit kat sirio muihni balna Damasco kaupak uina, Soba kingni Hadad-ezer yakat ilp kalana atnin, kaunah Devid yaklauwi minitna bayakna sirio balna yakat, kaput laih īna dai tausin 22. 6Kidika usnit kat Devid yaklauwi Siria sauni Damasco yakat maintalyang muihni balna āna dai, dawak sirio muihni balna laih witing tingni dinityakat bubukna dai, dawak tunan minit lalauwa dai. Kaput laih, Dawan yaklau Devid yakat minit bayaknin kidika kalawadai angkat angkat kiwa balna yakat.
7Kidika usnit kat Devid witing duna dai Hadad-ezer ahalni kalbauyang balna taninatuna balna nanitna daknin dini gol manah dai kidika, dawak Jerusalén yakat duwi kiuna. 8Kaput bik laih Beta dawak Berotai tawanni nunuhni kau bras duwa dai kidika bitik duna, kidika tawanni nunuhni balna laih Hadad-ezer dini balna dai.
9Hamat kingni Toi dakana, Devid yaklauwi Hadad-ezer ahalni kalbauyang balna yakat minit bayakna atwak, 10dawak walanibis Joram kidika yakwi sihna king Devid yakat uiwi kalana atnin lalah, gol dawak bras, kidika balna kau di yamna balna kidika, kaput laih witing yakat parasna atnin dawak kulnin yamni kidika kalana atnin Devid yakat, Hadad-ezer nining yakat kalbauwi minit bayakna kidika yulni, kat Toi bik war kalbabauna dai bahang Hadad-ezer karak. 11Devid witing adika dini balna bitik laih Dawan yakat kalana dai, dawak pa bitik kau witing parasni dinit yakat bubukna balna kidika di sisihwa dai gol dawak lalah, bahang kidika laih Papang dini yakna dai, bahang kidika balna karak libitwi kalana dai: 12Edom#8.12 Edom: grik kau ulna kidika laih kaput yulwi. Hibru kau laih Siria. kaupak, Moab, Amón, filisteo balna kaupak, dawak amalecitas balna kaupak bik, kaput bik Hadad-ezer walanibis Soba kingni Rehob nining yakat kalbauwi dakyakna balna kidika bitik.
13Devid laih ayangni nuhni kalna dai. Witing Edom muihni balna#8.13 Edom muihni balna: grik kau ulna kidika laih kaput yulwi. Hibru kau laih sirio muihni balna. niningna yakat kalbauwi minitna bayakwi kaina kat, bahang witing laih Edom muihni balna tausin 18 kidika balna yakat minitna bayakna dai Kuma Sauni Langni yakat.#Sal 60 Yulni tunan kidika Hibru kau ulna. 14Kidika usnit kat Edom sauni bitik yakat kalbauyang balna āna dai, kaput laih Edom muihni balna bitik kidika witing parasni dinit yakat dai, bahang witing angkat kiwa kidika bitik yakat Dawan yaklauwi kalawa dai minit bayaknin kidika.
Devid kalbauyang balna duwa kidika tanituna balna
(2 Sam 20:23-26; 1 Cr 18:14-17)
15Devid witing king kana dai Israel bitik minitna yakat, witing yamna kidika lā kat, dawak barangdai witing tawanni muihni balna bitik minitna yakat. 16Kalbauyang muihni balna tanina tuna nuhni kidika laih Joab dai, Sarvia walanibis, dawak Ahilud walanibis Josafat laih king yaihnit yakat wauhtaya ulyang dai. 17Ahitob walanibis Sadoc, dawak Abiatar walanibis Ahimelec, kidika balna laih sumalyang balna dai; dawak Seraías laih yul balna kalahwa kidika ulyang dai, 18dawak Joiada walanibis Benaía laih cereteo dawak peleteo balna kidika taninatuna dai. Devid walanibis ahal balna kidika laih sumalyang balna dai.
Currently Selected:
2 Samuel 8: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
