2 Samuel 7
7
Papang pramis yamwi Devid yakat
(1 Cr 17:1-27)
1King Devid kidika ūni yakat yamni kawi yalahna mani kat, Dawan yaklauwi kulnin aslah lani kidika kalana yaihnit kau waihnila balna kidika bitik kau, 2dawak prapit Natán yakat kalyulna:
—Man talnam sip ki, king ūni kidika laih suhun kau yamna kat awayang, kaunah Papang lani baksni kidika laih dūr rinin kidika dinit yakat ki.
3Dawak Natán yaklauwi nangnitlana:
—Kaput kat, man ais yamnin kulnaman kidika bitik yamtah, kat Dawan ilpni kidika bik mawa bahang.
4Kaunah sihm kidika puknita, Dawan yaklauwi Natán yakat kiwi kalyulna: 5“Yawa, yang diki yamyang Devid karak yulbautah, dawak kalyultah, yang Dawan yang kat yultayang kidika: ‘Witing awaskarang yang ūki pakwak yakat āwinik kidika. 6Egipto kaupak yaknayang kidika mani kaupak Israel balna kidika, warmani kat, yang makatyulnin ūni as kau bik yalahtasyang, kaunah ū lababanni kau manah yang yalahtayang. 7Ma bitik yakat witingna karak yang dai kidika, witingna taninatuna#7.7 Tunituna: kaput kapat ulna ki. Hibru kau laih sulani. as kau bik yultasyang dai, yang lawik ānayang dai kidika tawanki tanituna kana atnin, kidika balna yakat yultasyang dai suhun ūni as yamwi yayawang.’ 8Kaput bahang yang diki yamyang Devid yakat kalyultah, yang Dawan paraski bitik palni dutayang kidika kalyultayang: ‘Yang sīpki balna paskaupak mayaknayang, dawak sīp uduhna balna dangnit kaupak likman dai kidika mayakna yang, man kidika yang tawanki Israel kidika tanituna atnam yulni; 9yang mankarakyang dai angkat yawanaman dai yakat, dawak man waihmala balna namangyakat yaklalauna kidika bitik laih dahn yamnayang, dawak bik ayangma nuhni kidika manayang, adika sauni akat ahal nunuhni dikulna balna kapat. 10Dawak baisa minit yakat pa as ridi yamnayang yang tawanki kidika dini, dawak yakat uitik danayang kaput laih witing silp pāni yakat yalahna atnin, kaput laih muih as bik kalusnin-awas, dawak muih dudutni balna bik yaklauwi taihnin-awas, tatuna kau dai kapat, 11yang lawik wihta balna ānayang dai kidika tawanki Israel kidika tanituna kana atnin. Yang lawik yamting kat waihmala balna bitik kaupak di as bik mayayamwas karang. Dawak bik ismangpaktayang sulama balna maki 12dawak sangmaka kidika witni kat kiwak dauma kat man walamabis kidika as king lani yakat āna awaki. 13Bahang witing yaklauwi yang kau makatyulnin ūni as yamna karang, dawak yang lawik witing king kawa lani kidika ban kaput yamtik kalana awaki. 14Yang adika witing papangni awaki, dawak witing kidika yang walakibis karang. Dawak witing dutni as yamwarang kat, yang lawik wah kalaki, sihm papang as walanibis kau yamwa kapat,#Dt 8:5; 2 Kor 6:18; Hib 1:5; 12:5-11. 15kaunah yang dalani talayang kidika witing kaupak yaktas awaki, Saúl kau yamnayang kapat laih yamtas awaki, witing kidika yaktik pāni yakat man mahanayang kidika. 16King āwama kidika sulama balna kau tilahwi kiwarang kidika, dawak kingma lani bik ban kaput karang yang lawik nanitdakting kat, dawak kaput bik man trunma kidika ban kaput atnin yakat karang.’ ”#1 Re 2:4.
17Natán yaklauwi Devid yakat kidika yulni balna bitik kalyulna, witing amput talna dawak bik dakana kaput. 18Kaput laih, king Devid, witing Dawan muhni yakat kiwi yulbauna, dawak aput yulna: “Dawan, ¿yang adika waisyang, dawak walakibis balna kidika wais balnayah, man lawa akat yatang aiwanayang kidika? 19¡Dawak adika di dauhbin kapat as talnamanh, Dawan, dawak man dima yamyang sulani balna kau bik king lani kidika ban kawi kiwarang kidika bitik yulnaman kidika! ¡Muih al as bik man yamtaman kaput yamwas ki, Dawan! 20¿Ais baisa mayulnik sipyah, Dawan, man dima yamyang akat yamni amangnilataman kidika? 21Taldas dini yayamni balna kidika bitik man yamnaman, man yamnin yulnaman kaput dawak bik dukih mana kaput, yang amanglana atnik yulni; 22kaput bahang, yang Dakiwan, ¡man kidika ampus nuhnimanh! Kat muih as bik diski man kapat, dawak dawan ūk diski man kapat, yangna bitik dakanayangna yakat karang kat. 23Man tawanma Israel kidika laih, ¡ūk diski witing kapat, kidika laih nisan as ki witing kidika manah sau akat! Man, Papang laihta yaknaman, man tawanma atnin yulni, dawak bik ayangni nuhni yamnaman, witing munah taldas dini kidika nuhni palni yamnaman. Man tawanma Egipto kaupak laihta yaknaman kidika muhni tani yakat ruhmta danaman, nisan ūk balna kidika, dawak daninawan dauh kidika bik, 24kat man lawa kaput ānaman bahang man tawanma atnin niningh kaput, dawak man laih, Dawan, witing Papangni awama.
25“Kaput bahang, Dawan dawak Papang, man dima yamyang kau pramis yamnaman kidika sulani balna kidika ban tilah king kawi uina atnin kidik ban laihta dutah, dawak ais pramis yamnaman yakat laihta yamma. 26¡Man ayangma kidika ban nuhni kaput karang, dawak bik yuyulna karang Dawan parasni bitik duwa kidika laih israel Papangni! ¡Dawak, man dima yamyang sulani balna kidika ban king kawi uiwarang kidika ban kaput parasni karang man nanitdaktaman kidika kau! 27Man, Dawan parasma bitik dutaman kidika, nikingkanaman yang sulaki balna king kawi ban uiwarang kidika; kidika bahang yang, man dima yamyang yang kaunah, man kalma dinit yakat buktik yultayang. 28Dawan man laih, Papang man, dawak yulma balna bik rahmki, dawak man dima yamyang yakat man kulnam dalani kidika pramis yamnaman; 29bahang bliskalyamtah man dima yamyang yakat witing sulani balna kau bik, kaput laih man nanitdaktaman dinit yakat ban karang. Man Dawan, Papang man, pramis yamnaman, man blimasin kau dima yamyang king kawa kidika ban kaput kiwarang sulani balna kau.”
Currently Selected:
2 Samuel 7: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
