2 Samuel 6
6
Devid witing Dawan baksni kidika pa ūk yakat duwi kiunin yamwi
(1 Cr 13:5-14)
1Devid yaklauwi Israel muihni kalbauyang balna walwi yakna dai kidika uduhna, kidika balna laih tausin 30 dai, 2Judá kau pa as ayangni Baala kidika kaupak, muih mahni witing karak bangdai kidika balna karak, witing mahka duwi kiuna Papang baksni kidika, bahang kidika yakat Dawan ayangni parasni bitik duwa kidik yakwi yulwa kidika, dawak witing trunni duwa kidika querubines balna minitna yakat.#Ex 25:18-22; 1 Sam 4:4; 1 Re 6:23-28; Sal 80:1; Is 37:16; Ez 1:26-28. 3-4Turuh mumurwa kārni wisam kat minit yakat ihilna baks kidika, dawak Abinadab ūni yakat duwi uina, asang ubulni makau sakkidika yakat.#1 Sam 7:1-2. Abinadab walanbis balna Uza dawak Ahío balna kidika tatuna duwi uina kār Papang baksni duwi kiwa kidika, dawak Ahío kidika laih tatuna kiuna. 5Devid dawak Israel balna laih Papang muhni tani yakat ubuwi, unbauwi uina parasnina bitik palni, paswi yakisdinin dini, puhnin dini, bara, isihnin dini kidika satni balna kau. 6Nacón Era pāni yakat uiwi kakawakat, Uza kidika witing tingni dulauwi Papang baksni yakat laihna, kat turuh murwa tulu kidika atatakwak karhwakat, baksni kidika bukwa kapat dawakat. 7Kaunah Dawan kulnin daukalna Uza yakat, kidika yamna kidika yulni, dawak kidika pāni yakat sangnika dakyakna, bahang kaput laih Uza kidika dauwi bukna Papang baksni yaihnit yakat.
8Devid kasak kulnin daukalna, kat Dawan yaklauwi sangnika dakna#6.8 Sangnika dakna: Y.y. pa sulihni ahlna. bahang Uza yakat, kidika yulni, pāni kidika ayangni pakna Pérez-uza,#6.8 Pérez-uza tanka laih Uza yakat pa sulihni ahlna kidika. kidika ayangni warmani kat duwi. 9Kaunah sihm kidika mani Devid kasak yamaduna Dawan yakat, dawak yulna: “¡Dawan baksni kidika duyawinik kultasyang!” 10Dawan lani baksni kidika Devid tawanni nuhni yakat dukiunin kulwas dana bahang, di pakna, Gat kaupak al as ayangni Obed-edom ūni yakat dukiwi dana atnin. 11Dawan baksni kidika waiku bās watna dai Obed-edom ūni yakat, dawak Dawan yaklauwi blisin kalana dai witing yakat dawak walanibis balna bitik yakat.#1 Cr 26:4-5.
Dawan baksni kidika Devid yaklauwi Jerusalén yakat duwi kiuna
(1 Cr 15:1—16:6)
12Devid yakat kalyuyulna Dawan lani baksni kidika yulni Obed-edom wanaihni balna yakat blisin diana, kaput bik dini balna bitik yakat, dawak Devid alasna manah kiwi Papang baksni kidika Obed-edom ūni kaupak yakwi dukiuna Devid tawanni nuhni yakat. 13Dawan lani baksni duwi uiwa balna kidika asahna tiaskauas lapapakwak, Devid laih turuh almuk as dawak sīp almuk as salalani balna kidika sakripais yamna dai.
14Devid laih kāna dai linin prak nuhni tingni kalhni minit kau kawa kidika, dawak witing parasni bitik laih ubuwa dai, 15witing yamwa kapat Israel balna bik witingna Dawan baksni duwi uiwa kidika alasna duwi sararahna, dawak trumpit bik pupuhna.
16Dawan baksni kidika Devid tawanni nuhni yakat kiwi kana kat, Saúl walanibis Mical kidika dungh kalahwi talna windar yakat; dawak witing talwak Devid kidika Dawan muhni tani yakat ubuwawitkat witing Devid nining yakat di dauh as kalkulna.
17Dawan baksni kidika duwi uiwi pāni yakat lalakna, ū labanni as Devid yamna dai kidika yakat. Kidika usnit kat Devid witing sakripais karauni kauna busna, dawak Papang karak watwi yamni kalahnin sakripaisni bik busna dai, Dawan muhni tani yakat, 18kidika yamwi dana usnit kat, tawan yakat blisin kalana Dawan parasni nuhni bitik duwa kidika ayangni kau, 19dawak kidika yakat Israel balna bangdai kidika, ahal dawak yayal, witingna yakat diana dai, plawar busna as, pasas ulangwi busna kidika bik as diana. Dawak usnit kat mahka bitik ūnina kau uina.
20Devid bik ūni kau kiuna witing walanibis balna yakat bik blisin diana atnin yulni;#1 Cr 16:43. kaunah Mical, Saúl walanibis niningkauh kalahwi kiwi kalyulna:
—¡Ais ampat yamni kalahnayah warmani Israel kingni kidika, witing dini yamyang balna muhnina yakat, muih pini as kapat asalni dis dai!
21Devid yaklauwi nangnitlana:
—Rahmki; yang ubutawityang dai, kaunah kidika laih Dawan muhni tani yakat, bahang kidika laih papangma pāni yakat yahana, wanaihma balna dawak Israel bitik yakat tunan atnik yulni. Kidika yulni laih witing niningyakat ubutayang. 22Dawak baisa sau yakat bukki ki, sau yakat bukki ki man yultaman kaput, kaunah risnipik nuhni kidika dukiki, sihm kidika diki yamyang balna yultaman kidika balna kaupak.
23Dawak Mical laih baisa walanibis duwas dai sangnika bitik yakat.
Currently Selected:
2 Samuel 6: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
