2 Samuel 5
5
Devid Israel dawak Judá kingni
(1 Cr 11:1-3)
1Kidika usnit kat, Israel sulani balna bitik Hebrón yakat uina Devid karak yulbauna atnin, dawak kalyuyulna: “Yangna laih man karak ā aslah mayang, 2dawak rahm kidika laih, Saúl kidika yangna kingkina dai kaunah, man kidika kuduh rahm palni Israel yakat tunan āwaman dai kidika kalbauna kalahwi kiwa kat. Baisa kidika minit yakat Dawan yaklauwi pramis mayamna, man kidika Israel yakat tunan awama dawak king awama.”
3Kaput laih, Israel muihnibararak balna bitik laih, Hebrón yakat uiwi king Devid karak yulbabauna, dawak witing yaklauwi pramis as yamna witingna karak, dawak witnis kidika laih Dawan yakat āna dai. Kaput laih Devid kidika witingna yaklauwi Papang dini yayakna dai, Israel kingni atnin. 4Devid kidika kurih 30 duwa dai king kana, bahang kaput laih kurih 40 king kana; 5Hebrón yakat Judá kingni kana kurih tiaskaubu minit kau papusbah, dawak kidika usnit kat Jerusalén yakat kiwi king kana Israel dawak Judá kidika balna minitna yakat kurih 33.#1 Re 2:11; 1 Cr 3:4; 29:27.
Sayan kau kalbauyang balna ūnina parasni kidika Devid laihyakna
(1 Cr 11:4-9)
6King Devid witing ahal duwa dai kidika balna karak kalpakwi uina Jerusalén yakat, jebuseo balna niningna yakat kalbauna atnin,#Jos 15:63; Jue 1:21. kidika sauni muihni balna yakat. Dawak jebuseo balna kukulna Devid kidika witing kawi duwas karang kukulna, bahang kalyuyulna: “Man sip akat āwas awama, akat miniknapa di tatalwas balna, dawak kalnina nakas dis balna kidika bangki bahang kidika balna manah sipki mayamwak āwas atnam.” 7Kaput kaunah, Devid witing Sayan pāni kau kalbauyang balna ūnina parasni dai kidika laihwi dakyakna, bahang waradika laih pāni kidika Devid tawanni nuhni. 8Kidika mani Devid yulna dai: “Wais kat jebuseo balna niningna yakat kalbaunin kat, was kira kidika munah kakawang, dawak miniknapa di tatalwa balna dawak kalnina nakas dis balna kidika bitik imumukwang, kidika balna niningna yakat kulnik bitik palni dutni ditalayang.” Kidika kaupak kulnin lani as yuyulwa kidika: “Miniknapa di tatalwa balna dawak kalnina nakas dis balna kidika bitik sip awaski ki Dawan ūni yakat kana atnin.” 9Kidika usnit kat kidika kalbaunin balna ūnina parasni yakat kawi pāni duna kat ayangni pakna, Devid tawanni nuhni, dawak yaihnit yakut kidika daklawi awaihlana dai, sau uhwi duwi iluina dai kidika kaupak king ūni kat.
Hiram yaklauwi witing ayangni kau yakwi muih sihna
(1 Cr 14:1-2)
10Devid parasni kidika baisa nuhni kalna dai, dawak Dawan Papang parasni bitik duwa kidika witing karak dai. 11Kaput bahang Tiro kingni Hiram, witing ayangni kau muih yakwi sihna Devid yakat, kidika minit yakat ū yamyang balna dawak kipala kau sahwi ū yamnin dini paparhwa kidika muihni balna bik sihna dai, bahang witingna laih suhun panan kidika duwi uina dai, dawak Devid ūni kidika yayamna. 12Kaput laih Devid witing amanglana Dawan yaklauwi israel yakat king āna kidika, dawak witing king kawa lani kidika kalawak barakna dai kidika witing tawanni Israel yakat ilp kalawa yulni.
Devid walanibis balna
(1 Cr 3:5-9; 24:3-7)
13Hebrón kaupak Jerusalén yakat yaklawi kiuna usnit kat, Devid witing yayal manas ūk bik duna dawak yalni binina bik manas duna dai, dawak kidika yayal balna yaklauwi walanibis ahal dawak yayal bik manas kalalana dai. 14Witing walanibis balna Jerusalén yakat batahndadana balna kidika laih: Samúa, Sobab, Natán, Salomón, 15Ibhar, Elisúa, Nefeg, Jafía, 16Elisama, Eliada dawak Elifelet.
Devid yaklauwi Filisteo balna yakat minitna bayakna
(1 Cr 14:8-17)
17Filisteo balna dakakana kat, Devid kidika Papang dini yayakna Israel kingni kapat, kaput laih witingna bitik yaklauwi uina Devid yakat walwi, kaunah Devid witing dakawi kalbaunin ūni parasni kaupak dawi naikau kalahna. 18Kaput laih filisteo balna kidika uiwi Refaim sauni langni yakat kawi duduna. 19Kaput laih, Devid witing Dawan yakat kalyulwi dakana:
—¿Filisteo balna niningna yakat kalbaukiyah? ¿Witingna niningna yakat minit bayaknin kidika yāmayah?
Dawak Dawan yaklauwi nangnitlana:
—Agha, kalbautah, yang lawik maki minit bayaknin kidika witingna minitna yakat.
20Devid witing kiwi kana Baal-perazim kat, dawak kidika yakat minitna bayakna. Kidika bahang yulna: “Was parasni murwa kapat as Dawan yaklauwi ta yakwi yāna waihkila balna pasmunah.” Dawak kidika pāni kidik ayangni pakna Baal-perazim.#5.20 Hibru kau laih Baal-perazim tanka laih Dawan witing di yamwa balna bitik lāih kidika. 21Baisa minit yakat filisteo balna witingna daninawan dauh kidika dapamwi kikirana dai, kaput laih Devid dawak witing ahalni balna karak dulauwi duwi uina dai.
22Kaunah watwi filisteo balna kidika Refaim sauni langni yakat uiwi kakana dai, 23kaput laih Devid watwi kalyulwi dakana Dawan yakat, dawak Dawan yaklauwi nangnitlana:
—Muhnitna yakat kiwi kalbauwinih, kaunah awaihdaktah, dawak dangnitna kaupak alahwa kalbautah balsamo panan balna bangyakat yawa āwama kat. 24Pan tuna munah lapakwi kaiwa kidika dakama kat, mahka alahwa kalbauma, bahang kidika tanka laih yang man tamat yakat yawayang filisteo muihni kalbauyang balna muihnina yakat dakting dauna atnin yulni.
25Devid witing yamna, Dawan yaklauwi kalyulna kaput, dawak filisteo balna yakat minitna bayakna Gabaón#5.25 Gabaón: grik kau ulna kidika laih kaput yulwi dawak 1 Cr 14:16. Hibru kau laih Geba. kaupak Gezer kat.
Currently Selected:
2 Samuel 5: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
