2 Samuel 4
4
Is-boset ihina kidika
1Saúl walanibis Is-boset witing dakana kat Abner kidika Hebrón yakat dauna atwakat, kulnin kidika bitik palni sau kat bukna, dawak Israel muihni balna bitik yamaduduna. 2Is-boset witing duwa sakdai dini yamyang balna bu, kidika laih dimalyang muih dudutni balna uduhna as kat tanituna balna dai. As kidika laih ayangni Baana, dawak ūk kidika laih Recab. Witingna kidika laih Beerot kau Rimón kidika walanibis balna dai, kaput bahang Benjamín sulani balna dai, kat Beerot tawanni muihni balna laih kukulwa dai witingna kidika Benjamín sulani, 3Beerot muihni balna kidika Gitaim yakat kiri uina dai karang bik, dawak kidika yakat witingna tringsar kapat yalalahwi warmani kat, kaunah ban dikulna ki Benjamín sulani.
4Waralaih, Jonatán, Saúl walanibis kidika walanibis as duwa dai ayangni laih Mefi-boset, witing kidika laih sakahwa dai kalni nabupak.#2 Sam 9:3. Mefi-boset kidika kurih singka duwa kat, Jezreel kaupak yul kiuna Saúl dawak Jonatán karak dadauna; dawak kaput laih witing kalmaintalwa muihni kidika duwi kirana, kauna sirihni palni kiri yaklauwi kiuna kidika yulni bukwi bahna bahang witing kidika kaput kalbah kalna dai.
5Beerot kau Rimón walanibis balna Recab dawak Baana, witingna Is-boset ūni yakat uina, bahang kidika minitni palni laih ma kidika daihni palni dai, dawak Is-boset kidika kamatus dai. 6Dūr maintalyang kidika di minik balna klin yamwasak kauna kamana, bahang kaput laih Recab dawak wirahni Baana karak kawi yaklalana ū pasyakat muih as bik ditatalwas kat.#4.6 Dūr maintalyang kidika...ditatalwas kat: grik kau ulna kidika laih kaput yulwi. Hibru kau laih: Dawak witingna laih ū kidika papus kat kawi plawar minik duduna dai, dawak witingna yaklau yal bani yakat dadakna dai. Dawak Recab dawi wirahni Baana karak laih kiri yaklalana dai. 7Ū pasyakat kawi uiwakat, Is-boset laih pāni yakat kamatus dai; kaput laih iwi tunan dadakna, dawak tunan dadakna kidika duwi kalahwi uina, dawak pukta kidika bitik witingna lapapakna Arabá tāni yakat 8kidika laih duwi uiwi Devid yakat kalana atnin, witing Hebrón yakat sakkidika. Dawak king yakat kalyuyulna:
—King man akat dutaman, Is-boset tunan, Saúl walanibis dai kidika, dawak kidika laih king man waihmala dai kidika, dawak witing laih sangmaka daknin walwa dai kidika. Kaunah warmani laih Dawan yaklauwi mana kingman yakat biriwi kalyamnin kidika, Saúl dawak sulani balna bitik yakat.
9Dawak Devid yaklauwi nangnitnalana:
—Dawan ayangni kau yaktik manayultayang, kaidinin bitik kidika yalaihwi yakna, 10as kaiwi yayulna, bahang witing kulna kidika laih yul yamni as yāwi kulna, bahang yayulna Saúl laih dauna, bahang kidika yulni yawa kidika kau yang laihtik īnayang Siclag yakat.#2 Sam 1:1-16. 11¡Kidika karak tanit manna karak bik sihm kaput yamki, muih dudutni balna, manna muih dutni yamwas kat īnamana, witing ūni yakat kalangna tuskat! Kaput bahang, ¡yamting kat manna lautanama dauna kidika yulni! ¡Adika sauni kaupak manaustik yakpamki!
12Kidika usnit kat Devid witing kalbauyang balna duwa kidika tanituna balna yakat dipakna, dawak imumukna; tingnina dawak kalnina dakmumukna, dawak Hebrón kau was laihwa pāni yaihnit yakat uiwi pan yakat sitwi mur'ihilna. Kidika usnit kat Is-boset tunan kidika duaiwi nununa Hebrón yakat, Abner sauni ū yakat.
Currently Selected:
2 Samuel 4: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
