2 Samuel 3
3
1War kalbaunin kidika naini palni kiuna dai, Saúl ūni dawak Devid ūni karak, kaunah Devid laih baisa dawak baisa parasni kalwadai, dawak Saúl laih baisa sau yakat bukna parasni dis.
Devid walanibis balna
(1 Cr 3:1-4)
2Devid walanibis balna batahndadana kidika Hebrón yakat sak dai mani balna yakat, kidika laih adika balna: walanibis barakni kidika laih Amnón, kidika laih Ahinoam walanibis Jezreel kaupak dai kidika; 3bu kidika yakat, Quileab, Abigail Nabal tingnimak kaupak yakna kidika, bahang witing kidika laih Carmel pāni kaupak dai; bās yakat laih Absalón, Maaca kaupak yakna dai kidika, Maaca laih Gesur kingni Talmai walanibis yal dai; 4arungka yakat laih Adonías, Haguit kaupak yakna dai kidika; singka yakat laih Sefatías, Abital kaupak yakna dai kidika; 5tiaskauas yakat laih Itream, Egla kaupak yakna dai kidika, bahang kidika laih Devid yalni ūk dai. Adika walanibis balna bitik batahndadana Devid Hebrón yakat sakdai kidika mani balna yakat.
Abner laih Devid karak aslah kalalahwi
6War kidika ban kalbauwi uina, Saúl ūni dawak Devid ūni karak, dawak Abner kidika baisa parasni duna Saúl ūni pasyakat. 7Saúl laih witing ialni as duwa dai ayangni laih Rizpa, Aja walanibis yal, bahang kidika yal karak Abner laih kalduwi payayahna dai.#3.7 bahang kidika yal karak Abner laih kalduwi payayahna dai: grik yulni kau ting kau ulna kidika laih kaput yulwi. Hibru wauhnitaya yakat laih adika yulni kalahwas ki. Kaput laih Is-boset yaklauwi kidika yulni kalyulna Abner yakat:
—¿Ais yamta man alangwanamahn papangki ialni kidika karak?
8Abner uba kulnin daukalna Is-boset yaklauwi kaput kalyulna kidika, dawak nangnitlana:
—¿Yang adika sul as yangkatpa, Judá akat di balna yamtayang kidika? Man papangma, dawak wanaihni balna dawak kaltalyang yamni balna bitik niningna yakat yang laih barangniyang dai, dawak bik Devid tingni yakat mahatas danayang. ¿Dawak waradika man lawa yayultaman yal as karak dutni lani kidika yamnayang? 9¡Dawan yaklauwi wah parasni yāwarang, Dawan yaklauwi Devid yakat pramis kalyamna kaput yang yamtas awaki kat, 10Saúl sulani balna#1 Sam 15:28. ban king kawi uiwa kidika yakpamtik Devid kidika trun yakat iltas awaki kat, Israel dawak Judá minit yakat, Dan kaupak Beerseba kat!
11Is-boset yaklauwi Abner yakat yul as bik kalyulwas dana, kat yamaniduwa dai bahang. 12Abner laih witing muih yakwi sihna Devid yakat kalyulna atnin: “¿Adika sauni adika wais diniyah? Mayang pramis as yamdang: yang ais yamnik sipyang yakat yamki, Israel bitik man yakat wiryaklanin kidika yulni.”
13Devid yaklauwi nangnitlana: “Man karak pramis as kaput yamnin kidika yamni talayang, kaunah aput karang kat: yang akat yatalna aiwama kat Saúl walanibis yal Mical kidika duaitas awama kat kaiwi yatalwinih.” 14Baisa minit yakat, Devid yaklauwi yul sihna dai Is-boset yakat aput: “Yang yalki Mical kidika yatah, kidika laih filisteo ahalni balna muihnina unitak 100 minit wirihnayang.”#1 Sam 18:27.
15Kaput laih Is-boset yaklauwi, alni Paltiel tingni kaupak dakyakna, bahang Paltiel laih Lais walanibis dai; 16kaunah, Paltiel laih dawas uiwi kiuna, kaidīnah, dawak ban uiwi kiuna Bahurim pāni kat. Yakat Abner yaklauwi kalyulna nawatwi kiuna atnin, bahang kaput laih nawatwi kiuna.
17Usnit kat Abner yulbauna Israel muihnibararak balna karak, dawak aput diyulna: “Uman nai dawi manna waltamana Devid kidika manna kingmana atnin. 18Kaput kat yamniki, mani kaiwi kana mahka yamna atnin, kat Dawan yaklauwi pramis yamna Devid munah Israel kidika laihwi yakna atnin, witing tawanni kidika, filisteo balna tingnina kaupak, dawak waihninala balna parasnina kaupak.”
19Abner yulbauna Benjamín sulani balna karak bik, usnit kat Abner Hebrón yakat kiwi Devid yakat kalyulna, Israel balna dawak Benjamín balna kulninna lani kidika. 20Ahal 20 duwi Hebrón yakat kiuna, bahang Devid kidika yakat sakdai, dawak Devid yaklauwi kasnin alasnina as yamna dai, uina balna kidika bitik kasninna. 21Usnit kat Abner yaklauwi Devid yakat kalyulna:
—Waralaih yawinikki Israel balna kidika bitik uduhna atnik, king man karak pramis yamnin kidika, kaput laih kingman kidika kulnam lani kat king āwanam.
Dawak kaput laih Devid yaklauwi kalawak kalahwi kiuna isninglak ki.
Joab yaklauwi Abner yakat iwi
22Joab dawak Devid usnit uiyang balna kidika, witingna awaihwi talwa bangkauna uina, bahang kaput laih waihninala balna kaupak di mahni dakyayakna kidika duwi uina. Abner kidika Devid karak awas dai Hebrón yakat, kat witing laih isninglak kiuna dai bahang Devid yaklauwi kalparaswi dawak. 23Joab kiwi kawak kalbauyang balna mahni karak, kalyuyulna dai Abner, Ner walanibis kidika laih Devid karak witingna kalpakna bangdai bahang usnit kat king yaklauwi paraswi dawak mahka kiuna. 24Kaput laih Joab yaklauwi king yakat kiwi kaltalwi dawi, aput kalyulna:
—¿King man ais yamnamanh? Abner king yakat kaiwi talnayah, dawak king man datang kiunayah. 25¿King, man amanglatasman katpah, Ner walanibis Abner kidika laih kaiwi alas mayulna kidika, witing talna kaina amput sakman kidika, dawak man king ais yamtaman kidika bitik amanglana atnin?
26Joab, Devid karak yulbauwi kalahwa minitni yakat muih yakwi sihna dai Abner walna atnin, bahang Devid laih dakawas dai, bahang uiwi kukuihna Sira wasni pāni kuhrna kidika yakat, bahang kidika kaupak kalyuyulwak nawatwi kiuna. 27Abner kidika Hebrón yakat kiwa kat, Joab yaklauwi tawan dūrni nakas yakat duwi kiuna, witingna karak albulah, dawak kidika yakat bani yakat isparah kau tusna daunin praisni kat, kidika laih wirahni Asael dauna kidika minit biriwi kalyamna. 28Kidika usnit kat Devid dakawi yulna: “Dawan muhni yakat, dawak yang king awayang sauni akat bitik laih kidika pātni dis palni yangna, Ner walanibis Abner ihina kidika. 29¡Kidika pātni laih Joab tunan yakat bukwang, dawak witing walanibis balna minit yakat bik, witing ūni yakat witingna muihnina kaupak wasnina kiri kidika dis awaskarang, dawak lipar bik, kaput bik sakahwa bik kalalahwarang, dawak muih ūk yaklauwi kalinin kidika bik, dawak kaput bik laih yuh wauhwas laih awaskarang!”
30Joab dawak Abisai karak kalpakwi Abner kidika ihina, Gabaón pāni yakat kalbabauwakat witingna wirahnina as īna dai bahang.
31Usnit kat Devid yaklauwi pakna Joab dawak witing karak bangkidika muihni balna yakat: “Prakmana ista bistanauh, dawak asna utuhni kidika awanauh, Abner dauna kidika yulni dawak bik kulnamna bukna kidika dutanauh.” King Devid laih trukwi duwi uiwa pāni usnit yakat kiuna, 32dawak Abner kidika Hebrón yakat nununa. Dawak kidika yakat king Devid parasni sarahwi kaidana Abner sauni ū yaihnit yakat, dawak muih ūk balna bik sihm kaput yayamna dai. 33Kaput laih king witing aput yulwi kaidana:
“¿Amput dawak daunamanh, Abner,
pini tanka as bik dis,
34tingma kidika sitna awas dai,
dawak kalma bik sīn āna awas dai?
¡Daunaman, muih as kat dauwa kapat
muih dudutni tingnina yakat!”
Dawak muih ūk balna bik witingna kakaidana dai witing yulni. 35Usnit kat Devid yakat uiwi kalni dinit yakat bukwi kalyuyulna di kasna atnin baisa ma kakiwas tanit kauh, kaunah Devid Papang ayangni kau yakwi yulna:
—¡Papang wah parasni palni yanakarang, yang, plawar busna karangpa kidika awaskat di ūk bik kaski kat baisa ma kakiwas tanit kauh!
36Kidika bitik witingna amanglalana, bahang yamni kapat tatalna, dawak king di balna yamwa balna bitik kidika muih balna yamni tatalna. 37Kidika mani Israel muihni balna bitik amanglalana, Ner walanibis Abner dauna kidika king witing pasyakat dis dai kidik.
38Usnit kat king yaklauwi diyulna kalbauyang balna duwa kidika tanituna balna yakat:
—Manna amanglatamana, warmani Israel akat tunan muihni nuhni as bukna, muih nuhni as. 39Kidika bahang yang adika, Papang yaklauwi yayakna kaunah king atnik, kaldakayang paraski diski, Sarvia walanbis balna dutni yayamwa kidika niningyakat. ¡Dawan yaklauwi minit diana karang, angdika muihni kat yaklauwi adika dutni yamna kidika!
Currently Selected:
2 Samuel 3: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
