2 Samuel 21
21
Gabaón muihni balna yaklauwi biriwi diyayamna
1Devid king kana mani balna yakat yuhlakna dai kurih bās. Kaput laih Devid yaklauwi Dawan yakat kalyulwi dakana, dawak Dawan yaklauwi biri nangnitlana: “Yuh lakwa kidika laih Saúl dawak sulani balna bik dutni yayamna kidika yulni kaput kalahwi, kat witingna yaklauwi Gabaón muihni balna yakat laihwi ihina bahang.”
2Devid yaklauwi Gabaón muihni balna karak yulwi duaiwi yulbauna. (Gabaón muihni balna kidika laih Israel sulani awas dai, witingna laih amorreo sulani balna baisa buas wawatna dai kidika balna, dawak witingna laih Israel balna karak pramis#Jos 9:3-15. as yayamna dai, kaunah Saúl witing Israel balna dawak Judá muihni balna bik minitna anwa kidika yulni iwi dismuknin yamna.) 3Devid yaklauwi diyulwi dakana:
—¿Ais as sipyah yamnik manna yulmana? ¿Manna yakat dutni manayamna kidika amput sipkarang barangni yamnin, kaput laih Dawan tawanni kidika blisin duna atnin watwi?
4Gabaón muihni balna yaklauwi nangnitlana:
—Lalah yulni bik awaski Saúl dawak witing sulani balna karak yangna barangni yamnin dutayangna kidika, dawak bik dukih yanawas ki Israel pasyakat muih as bik dauna atnin.
Devid yaklauwi diyulna:
—Kaput kat yayultanauh, ais as yamkiyah manna yulmana.
5Witingna yaklauwi nangnitlalana:
—Al as yaklauwi yanadaukalmuknin kulna dai kidika, dawak warkni balna bik yamna dai kidika yanadismukna atnin Israel sauni paskaupak, 6dukih yanawi sulani balna paskaupak tiaskaubu kidika yangna tingkina yakat atangkat dininamak yakat sittik Dawan muhni yakat murtik iltanaki Saúl pāni Gabaa yakat, Dawan walwi yakna muihni kidika.
King yaklauwi maki kalatna, 7Saúl mani, Jonatán walanibis, Mefi-boset yakat dalani talna dai kaunah, witingna Papang ayangni kau yakwi pramis yamna dai witing dawi Jonatán#1 Sam 20:15-17; 2 Sam 9:1-7. karak. 8Kaput dai kaunah Aja walanibis Rizpa ahal bu dai kidika, Saúl kaupak yakna dai kidika balna laihna dai, ayangnina laih Armoni dawak Mefi-boset, dawak Merab#21.8 Merab: grik kau laih kaput ulna. Hibru kau laih Mical.,#1 Sam 18:19. walanibis ahal singka dai kidika bik laihna dai, adika laih Saúl walanibis yal dai dawak Mehola pāni kaupak al as ayangni Barzilai walanibis al Adriel kaupak walanibis yakna dai kidika, 9kaput laih Gabaón muihni balna tingnina yakat āna dai, dawak kidika balna asang yakat duwi uiwi dininamak yakat sitwi ihina dai Dawan muhni kat. Kaput laih witingna tiaskaubu kidika papatni dadauna, di minik bahnin mani balna tatuna yakat.
10Kaput laih, Aja walanibis yal Rizpa kidika, witing asnina utuhni kat kana dai, kulnin kaida kidika yulni, dawak kidara as sakdai bahang kidika minit yakat kalangna. Di minik balna bahnin mani kana kaupak waslakna kat, dawakat di lawani balna asbik dawak muih dadauna balna minitna yakat kikilwas dai, madah yakat, dawakat pukta yakat bik.
11Saúl ialni Rizpa yamna kidika Devid yakat kalyuyulna, 12dawak witing kiwi, Saúl dawak walanibis Jonatán muihnina nuhni kidika duaina dai, bahang kidika balna laih Jabes kau Galaad muihni balna niningna yakauh bangdai. Bahang witingna yaklauwi Bet-sán pāni kaupak malwi duwi uina dai, filisteo muihni balna sitwi murihilna dai, Gilboa yakat kalbabauwak Saúl sip-awas dana dai mani.#1 Sam 31:8-13. 13Usnit kat Devid yaklauwi dipakna dai kidika pāni kaupak Saúl dawak walanibis Jonatán karak muihnina kidika yakwi duwi uina atnin, dawak dininamak yakat sitwi ihilwak dadauna balna kidika bitik; 14kaput laih Saúl dawak Jonatán karak Cis, Saúl papangni sauniū yakat nununa Benjamín sauni kau Zela yakat. King yulna kidika kaput yayamna dai. Kidika usnit kat, Papang yaklauwi Israel balna witing kalni dinit yakat bukwi yuyulwa kidika dakawi yamna dai.
Abisai yaklauwi Devid sangnika laihwi lāwi
15Filisteo balna watwi Israel balna niningna yakat wār yayamna. Kaput laih Devid dawi kalbauyang muihni balna duwa kidika karak kalahwi kalbabauna. Devid kidika uba kalsuhna dai, 16dawak kidika minitni yakat al nuhni as kalahwi kaina, ayangni laih Isbi-benob, Devid yakat ina atnin. Witing langnisa kidika tikini paun 60 minitkau duwa dai, dawak banimak yakat isparah wisam as sitna witdai. 17Kaunah Sarvia walanibis Abisai yaklauwi kalbauwi minit bayakwi īna. Kaput dawak, Devid ahalni balna kidika pramis as yayamna, king Devid kidika watwi witingna karak kalpakwi wār kalbauna kiunin-awas, kaput laih Israel lampni kidika piwas karang.
Ahal nunuhni balna niningna kauh kalbabauna
(1 Cr 20:4-8)
18Kidika usnit kat, Gob pāni yakat wār ūk sakdai filisteo balna karak. Kidika yakat Sibecai husatita kidika yakluwi Saf yakat īna, kidika laih ahal nunuhni balna sulanina dai. 19Dawak wār ūk sakdai kidika filisteo balna niningna yakat, sihm kidika bik Gob yakat, Elhanán, Jair#21.19 Jair: kaput kauh yamni kaput ki. Hibru kau laih Jaare-oregim. walanibis, Belén pāni kaupak dai kidika yaklauwi Goliat yakat īna, bahang Goliat laih Gat pāni kaupak dai, langnisa kidika nuhni palni dai, sihm asna yamnin panani kapat dai.
20Gat pāni yakat wār ūk as kalbabauna. Kidika yakat bik al naini likdai, bahang tingni bikis balna kidika 24 duwa dai, tingni bikis tiaskauas duwa dai tingni balna kidika, dawak kalni bikis balna bik sihm kaput dai. Kidika bik muih nunuhni balna sulanina dai, 21Israel nining yakat yaklauwak, dawak Jonatán yaklauwi īna, Simea walanibis, dawak Devid wirahni. 22Kidika ahal nunuhni arungka balna dai kidik laih Gat pāni kaupak al as ayangni Refa kidika walanibis balna dai, kaunah Devid dawak ahal kalbauyang balna tingnina yakat bik bubukna.
Currently Selected:
2 Samuel 21: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
