2 Samuel 20
20
Seba king nining yakat yaklauna
1Benjamín sulani paskaupak muih dutni as likdai, ayangni laih Seba, Bicri walanibis, bahang witing laih Gilgal yakat sakdai. Adika Seba yaklauwi tawan muihni balna yakat kulninna uswi sahmuhna dai kalbaunin dini kidika laihna atnin,#20.1 Tawan muihni balna...laihna atnin: barangni yulnin kat: puhnin dini kau duwi puhna dai. bahang aput diyulna: “¡Mayang laih Isaí walanibis, Devid karak dipahni as bik dismayang! ¡Israel balna bitik ūmana kau yawanauh!”#1 Re 12:16; 2 Cr 10:16.
2Israel ahalni balna bitik Devid kidika ruhmwi dadana dawak Seba yakat usnit uhuina, Bicri walanibis kidika yakat. Kaunah Judá muihni balna laih, Jordán wasni kaupak Jerusalén kat kidika king karak barangni dai.
3Devid watwi Jerusalén yakat kiwi kana kat, ialni salap#2 Sam 16:22. dawi kiuna dai kidika ūni maintalna atnin, kidika balna laihwi ū askau āwi putna, dawak maintalnin bik pakna dai. Dawak kidika yakat witing ban maintalwa dai, kaunah witing kidika yayalni balna karak watwi kalangwasdai. Kaput laih yayal kidika awi putna, bahang tingmak kapat dai, dadauna kat.
4Usnit kat king yaklauwi Amasa yakat pakna:
—Judá ahalni balna yultang aiwang, ma bās pasyakat witingna karak yang akat aiwama.
5Amasa kiwi uduhna dai kaunah, ma kalana kidika bayakna dai. 6Kaput laih, Devid yaklauwi Abisai yakat kalyulna:
—Seba kidika tanit dutni maiyamwarang ki, Absalón karak dawak. Kaput bahang, yang kalbauyang balna dutayang kidika tanina tuna awa uita yawah, tawan nunuhni balna daklana pasyakat kawi yaklawarang.
7Joab ahalni balna, cereteo dawak peleteo balna kalbauyang tanit yayamni king witing yaihnitkau duwasakdai kidika balna karak witingna Jerusalén kaupak kalahwi uina Abisai karak, Seba laihnin uiwi uina dai. 8Gabaón yaihnit kau kipala nuhni as sakkidika yaihnit yakat uina kat, Amasa dai kidika kalahwi kalpapakna. Joab laih kalbaunin prakni kānalikdai banimak sitnin dini sitwi dawak bik isniparah kidika ūni kau awi dangni yakat sitna tusdai, kaput bahang iswi sau nining yakat murlakwak īsi kalahnin manahdai. 9Dawak Joab yaklauwi Amasa kungnibas yakat tingni palni kau laihwi umwa kapat yakauna kalyulwi dakana:
—¿Yamni manh wirah?
10Amasa witing amanglawas dai Joab tingni yakat isparah duwi kiwa kidika. Kaput laih sirihni Amasa bani yakat dakna dai, kaput laih bani bitik laih sau yakat uhna. Kaput laih Joab yaklauwi watwi tuswas dai, bahang kaput laih dauna. Kidika usnit kat, Joab dawak wirahni Abisai karak Bicri walanibis Seba yakat uiwi uina. 11Kaput laih Joab witing kalbauyang duwa kidika balna paskaupak as kalahwi Amasa yaihnit yakat kiwi yaklauwi aput yulna dai:
—¡Joab dawak Devid karak yawamana kidika, Joab yakat usnit uita yawanauh!
12Kaunah Amasa kidika ban ta papus yakat pihrwatusdai āni minit yakat, dawak kalbauyang muihni kidika talwak muih balna bitik laih kidika yakat watwi tatalna, dawakat Amasa kidika ta pirini yakat latuswi dawi mukna dai; kat amanglana dai, muih bitik laih kidika yakat uiwi watwi tatalwa bahang. 13Ta pirini yakat laktusna usnit kat, Joab karak bangkidika muihni balna, bayakwi uiwi uina Seba yakat.
14Seba kidika Israel balna bitik pasmunah kawi bayakwi kiuna dai Abel-bet-maaca kat, dawak Bicri sulani balna bitik kalpakwi dangnit yakat kawi uina dai tawan nuhni pas yakat. 15Joab ahalni balna kidika Abel-bet-maaca yakat uiwi kakana kat, daklana pining ahni kaupak sau uhwi duwi iluiwadai, kaput laih tawan muihni balna niningna yakat kalbauna atnin, usnit kat witingna bitik kalpakwi daklana kidika tukwi laknin yayamna dai. 16Kidika minitni yakat, yal as kalahwi, daklana mayakaupak sarahwi yulna dai:
—¡Yadakanauh! ¡Yadakanauh manna plismana! ¡Joab yakat kalyultanangkat yaihkit akat kaiwang, kat witing karak yulbaukuhtiang!
17Joab yaklauwi yaihnit yakat kiwakat, yal dai kidika yaklauwi kalyulwi dakana:
—¿Manyah Joab?
—Agha, yang —kaltadai Joab yaklauwi.
Yal kidika yaklauwi kalyulna:
—Man dima yamyang yal adika yulwa kidik dakah.
—Madakayang —kalatna.
18Kaput laih witing mahka yulna:
—Tanitmani kau aput yuyulwadai: ‘Wais di as amanglakih kalawakat Abel yakat yulwi dakawang atwadai.’ Dawak kaput laih barangni kalahwa dai. 19Yangna tawankina nuhni adika laih, tawan as tanit kulwi kalbaunin lani kidika dis atnin, dawak bik barangni kidika Israel tawanni balna pasyakat,#20.19 Dawak kaput laih...Israel tawanni balna pasyakat: kaput kidika barangni ulna. Hibru kau laih amangladas ki. ¡dawak bik tanit nuhni kalkulna kidika! Kaput kaunah man daukalpamnin yamtaman. ¿Ais yamta daukalpamnin yamtamahn Dawan dini kidika?
20Joab yaklauwi nangnitlana:
—¡Kidika laih kulnin bik awaski! Yang yamtayang kidika laih daukalpamnin kulnik yakat dutasyang. 21Kidika awaski, kaunah Efraín sauni kaupak al as ayangni Seba, witing king Devid nining yakat kalbaunin dini dulauna. Witingmana yatanauh, kaput laih adika tawanni nuhni kaupak datik yawaki.
—Tunan kidika daklana ma akaupak ruhmlaktanaki —kalatna, yal kidika yaklauwi Joab yakat.
22Kaput laih yal kidika kiwi tawan muihni balna bitik yakat yulbauwi kulninna wirlawi, Seba kidika laihwi tunan dakwi Joab yakat kalalana dai. Kaput laih Joab yaklauwi diyulna dai puhna atnin mahka dawi kalahnin yulni, kaput laih tawan nuhni kaupak mahka dawi kalalana, dawak witingna mahka ūnina kat kat uina, dawak Joab laih Jerusalén yakat nawatwi kiuna king karak yulbauna atnin.
Devid kalbauyang tunan balna duwadai kidika
(2 Sam 8:15-18; 1 Cr 18:14-17)
23Joab kidika tatuna nuhni as āna dai Israel muihni kalbauyang balna bitik pasyakat, dawak Joiada walanibis Benaía laih cereteo dawak peleteo balna tanina tuna āna dai. 24Adoram laih muih balna yakat taihwi pakwak wark yamnin kidika tanituna dai, king yaihnit yakat ulyang as duna kidika laih, Ahilud walanibis Josafat dai. 25Seva laih yul balna kalahwa kidika ulyang dai, Sadoc dawak Abiatar kidika balna laih sumalyang dai. 26Jair pāni kaupak al as ayangni Ira, witing bik Devid sumalniyang as dai.
Currently Selected:
2 Samuel 20: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
