2 Samuel 22
22
Minit bayakwi balna kidika Devid unbauna
(Sal 18)
1Devid witing unbauna Dawan yakat adika unbaunin karak, Saúl tingni kaupak dawak waihnila balna tingnina kaupak laihwi yakana usnit kat. 2Aput yulna:
“Dawan, man laih nakitdakyang man,
yang maldayang pāni,
yalaihwi yakyang,
3yang Papangki,
kipala as yang nakit dakwa kidika,
yang nakit dakwa dini,
parasni kau yalaihwi yakwi,
yang maldinik pāni makau palni kidika,
yang āwik maldinik pāni makau palni kidika,
yalaihwi yakyang.
¡Kalbaunin paskaupak yalaihta yaknaman!
4Dawan, man laih ayangma nuhni yamnin kidika dima palni ki:
mayultingkat, waihkila balna kaupak yalaihta yaktaman.
5“Daunin lalamwi kaiwa kidika yakat yabalakna dai;
yamadunayang dai bahwi disyamwa kidika kaiwi bayakwakat.
6Daunin wahni kidika kau yawiditna dai,
¡daunin dini dudutni kalpaknayang!
7Yang kulnik kaida pasyakat, Dawan kau kalyulnayang,
yang Papang yakat ilp yulnayang,
dawak witing ūni kaupak yadakana;
¡sarahnayang kidika witing tapani kat kiwi kana dai!#Sal 120:1; Jon 2:2.
8“Kaput laih sau parasni yukna dai:
makau kisang rahni balna bik yukna dai;
Dawan kulnin daukalna kidika yaklauwi dulauwi isihna dai.#Jue 5:4-5; Job 36:30; Sal 29:3-9; 77:16-19; 144:5-8; Hab 3:3-13.
9Nangnitak kaupak wayau manah kalahna dai,
dawak tinpas kaupak kalahna dai daukalwi disyamwa kuhnipau;
¡dawak tinpas munah kuh tuturni puhwi yakna!
10makau kisang dūrni asnina rina kidika bik karhwi kiwi sau yakat kaiwi yaklakna.
¡Kalni dinit yakat bik mukus sani nuhni palni bik duwa dai!
11Di lawani duwa as kau kilwi yaklauwi kiuna,
wing lawani yakat dukiwak kaltalna dai.#Sal 68:33; 104:3.
12Witing ūni labanni duna dai,
puksani nuhni awaih kalduwa kidika kau
dawak mukus sani was manah duwa kidika kau bik.
13Yaringni, alwana as lapwa kapat witing muhni tani kaupak kalahna;
dawak kuh tuturni dahlwa balna kidika was lauwa kapat uhna dai.
14“Dawan, witing makau palni kidika,
makau kisang kaupak dinit parasni alwana kapat yulwa kidika yulwak dakakana:
15sinibang kidika ruhmna dai, dawak alniwana lapwa kidika bik,
dawakat waihkila balna yakat diyamwak pini kikirana.
16Kuma tuhni kidika bik laih ahnimanah dana dai;
sau nuhni adik rahni balna bik lāih kalahna dai,
Dawan dinit kidika parasni niningkauh yulna kidika yulni,
dawak wingnita parasni puhna dai kidika yulni bik.#Ex 15:8; 19:19.
17“Mayakaupak Papang tingni kidika yayuna dai,
dawak kuma nuhni paskaupak witing tingni kau yalaihwi yakna.
18Yang waihkila pararasni balna kaupak yalaihwi yakna
dawak kidika kaupak yalaihwi dutni yakukulwadai,
dawak witingna kauh tanit pararasni dai, yang karak dawakat.
19Yang didis mikunni kalnayang mani balna yakat,
niking kauh yaklalauna, kaunah Dawan yang akat ilp yana:
20laihwi yaknin yakat yayakna;
¡yalaihwi yakna, kat dalani yatalwa bahang!
21Dawan yaklauwi mikit lauwi yana,
kat yamtayang balna kidika dutni dis bahang kaput sipdai dunik,
22kat yang laih Dawan tāni yakat usnit uitik yawanayang bahang;
¡wat as bik Papangki yakat talasyang yultasyang dai!
23Witing lāni balna kidika yang dutayang;
¡wat as bik witing lāni balna kaupak datik pirini yakat yawasyang!
24Witing muhni tani yakat dutni as bik dis yawanayang;
dutni kaupak naikau alahwanayang.
25Dawan yaklauwi mikitlauwi yana
witing muhni yakat maisihni as bik disyang bahang.
26“Dawan, man laih barangniman,
angdika muihni barangni kidika niningyakat,
angdika muihni kulnin daukalna kidika muih muhni kat yakwas kidika,
man bik sihm kaput kalyamtaman kidika muihni yakat,
27muih as kulnin alas dis kidika,
man bik kidika muihni niningyakat kapat man,
kaunah sinsma nuhni karakman
angdika muihni alas yulwi lan muihni niningyakat.
28Muih buknin lani duwa kidika,
man lawa laihta yaktaman,
kaunah witingna manah kaldakakawa balna
dawak buknin lani duduwa balna yakat man ditalaman.
29Dawan, man laih, yang yaringkiman;
man, yang Papangki, puksani yakat yaringni yataman.
30Man ilpma kau waihkila niningyakat kalbauki
dawak tawanni nunuhni daklana minit munah bayakki.
31“Papang tani kidika laih barangni ki;
Dawan pranimis kidika laih rahm palni kulnin kidika kalanin ki.
¡Papang yaklauwi tanitna dakwi witing yakat kulninna āwi duduwa balna yakat!#Pro 30:5.
32¿Wais kidika Papang yah, Dawan kaupak ūk kidika?
¿Dawan ūk as sakyah mayang matakit daknin kidika?#Is 44:8.
33Papang kidika laih yang maldinik parasni palni ki,
witing yaklauwi yamtayang balna bitik yamni manah yamwi,
34witing yaklauwi kalki sirihni yamwi, sihm sana kapat,#Hab 3:19.
witing yaklauwi yayamwakat kalki kau parasni lawayang mayakat,
35wais yasumalwi war kalbaunik,
wais paraski yawih, bras lasni kidika istik kawainik.
36“Man lawa nakit daktamahn, dawak yalaihta yaktaman;
man kulnam minikun talnin dutaman kidika yaklauwi yāwak nuhni kalnayang.
37Yang taki kidika isi yamna,
dawak yang kalki balna kidika atakting karhwas dana.
38“Waihkila balna kidika uitik yawik itik dismukna yang,
yang alas nawattik aiwanayang imuknayang kat.
39¡Itik dismuknayang! ¡Daktik bikis yamnayang!
Watwi yaklauwas dadana: ¡yang kalki dinit yakat bubukna!
40Kalbaunin pasyakat man parasma yanaman;
yamtang kat muih kulninna dudutni balna kidika yang akat aiwi abubukna.
41Dawak yang muhkit yakat waihkila balna kidika kikirana dai.
Kaput laih sipyang dai dismukna atnik muihni dudutni yakukulwa balna kidika.
42Ilp yuyulwak muih as bik ilp diayawasdai;
Dawan yakat kalyuyulwak bik nangnitna lawas dana.
43¡Sau yahamni kapat dismuknayang dai!
¡Kalki kau atakna yang dai ta pas kau wasmak kapat!
44Tawanki kalbauwa kidika kaupak yalaihta yaknaman dai,
nisan balna taninatuna kapat yadunaman,
dawak muih talasyang balna kidika yang diki yayamwi.
45Yang yulki dakawi yayamwi;
sau ūk muihni balna kidika yang yamni dakayang.
46Sau ūk muihni balna kidika yamaduduwi,
dawak yakmamalda pāni kaupak diyukwīnah kalalahwi.
47“¡Dawan sangka ki! ¡Yang nakitdakyang kidika blisyamna karang!
¡Papang kidika ayangni nuhni yamna karang,
yalaihyakwi yakwi dawi nakitdakwa kidika!
48Witing kuduh Papang, biriwi yang yulki diyamna kidika,
dawak tawan balna kidika yang tingki dinit yakat duaiwi āna kidika.
49Waihkila balna kaupak witing yalaihwi yakwi,
kulninna dudutni balna nikingkauh yaklalauna kidika.
¡Man Dawan, ahal kulninna dutni anyang balna kaupak yalaihta yaktaman!
50Kidika bahang nisan balna paskaupak ayangma nuhni yamtayang
dawak man ayangma kidika unbautayang.#Rom 15:9.
51King as yakta dunaman kidika yakat kalataman minit bayaknin nunuhni balna;
Devid dawak sulani balna yakat bik ban kaput dalani ditalaman.”
Currently Selected:
2 Samuel 22: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
