2 Samuel 19
19
1-2King witing walanibis Absalón dauna kidika yulni kaidak muih balna dakawi, uiwi kalyuyulna, Joab yakat. Kaput laih, kidika mani, witingna minit bayayakna dai kidika laih kulnin bukna yakat wiryaklana dai. 3Kalbauyang muihni balna kidika bik yakmaldi kanin kukulna tawan nuhni yakat: kalbauyang muihni balna kidika asalni karuk lapakwi aina, kalbaunin pāni kaupak sip-awas dawak kiri aiwa kapat. 4King laih muhni putwi, parasni sarahwi kaidi yulna: “¡Absalón walakibis! ¡Absalón, walakibis, walakibis!”
5Joab, king ūni yakat kiwi kalyulna:
—King, man dima yamyang balna yakat asalnina yakna man, warmani sangmaka laihwi yayakna, walamabis, ahal, yayal, yalma balna bik. 6King, warmani man lāih niningkataman, kalbauyang tunan nunuhni balna ānaman balna yakat kultasman, kat muih dutni makukulwa yakat dalani talaman bahang, dawak dalani matatalwa balna yakat dutni dikultaman. Warmani amanglatayang, king man kultaman man walamabis Absalón kidika sangka atnin, yangna bitik daunayangna karang bik. 7Kaput bahang alahwa waralaih, king, man yulma kau, man usmat uiyang balna yakat, parasnina diata, kidika awaskat, Dawan ayangni kau yaktik yultayang, king, warpukta usmat uiyang balna as bik dis kalwarang. Adika laih man namang yakat tanit dutni karang, wahmaman mani balna yakat dutni makalahna dai kidika balna bitik karak libitwak.
8Kaput laih, king witing yaklauwi kiwi, tawan nuhni dūrni yakat yalahna. Dawak muih balna bitik yakat isningna papakna, king kidika tawan nuhni dūrni yakat yalahna sakki atwak, muih bitik witing muhni yakat uina.
Devid, Jerusalén yakat nawatwi kiwi
Israel balna laih, bitik ūnina kau uiyamna dai. 9Israel sulani balna bitik aput witingna biri biri yuyulwi dakakawa dai: “King Devid yaklauwi, mawaihkila balna kaupak mailaihwi yakna, filisteo balna kaupak; kaput kaunah, Absalón yulni laih, witing pāni kaupak dawi kirana. 10Absalón, mayang makingki atdi Papang dini yaknamayang dai kidika wār yakat dauna. ¿Ais tahadih, mahka yamdakat, king Devid kidika nawatwi kaiwasyah?”
11Adika yulni kidika, king ūni kat kiwi kana dai. Kaput laih yul sihna dai sumalyang Sadoc dawi Abiatar yakat, aput diyulna: “Manna yulbautanauh, Judá muihnibararak balna karak, dawak diyulta dakanauh ais yulni baisa naiwi kiwi ūki yakat nawattik yawinik kidika. 12Diyultanauh, di as bik diski, witingna kidika yuyulwakat yang nawattik aiwinik kidika, kat witingna laih yang karak kalwirah yangna.” 13Baisa minit yakat dipakna, Amasa yakat kalyulna atnin: “Man laih yang karak ā aslah mayang, kaput bahang warmani kaupak man laih, kalbauyang balna dutayang kidika man taninatuna nuhni awama, Joab pāni yakat. Mayultayang kaput yamtas yang kat, Dawan yang akat wah parasni yana karang.”
14Kaput laih, Judá ahalni balna kulninna laihna witingna bitik yuyulna king Devid kidika nawatwi kaina atnin, kalbauyang tunan nunuhni duwa balna kidika bitik karak. 15Kaput laih king kidika mahka nawatwi kiwi Jordán wasni yakat kiwi bukna. Judá muihni balna laih, Gilgal yakat uina dai kalpakna atnin, dawakat Jordán wasni kidika yakat tingnisut laihwi daklana atnin. 16Simei#2 Sam 16:5-13. bik, Gera walanibis dai kidika, Benjamín sulani, Bahurim pāni kaupak, sirihni palni yaklakwi kiuna dai Judá muihni balna karak, king karak kalpakna atnin yulni. 17Witing karak bangdai, Benjamín sulani ahal tausin. Saúl sulani balna dinina yamyang Siba, witing bik kiuna dai walanibis 15 balna karak, dawak dini yamyang balna 20 bik duwi kiuna baisa king kiwas kat witing tatuna kiuna dai Jordán wasni yakat. 18Was wakarhni balna bik dakyaklawi kiuna king walanibis balna kidika tingninasut laihwi daklana atnin, kaput witing karak yamni kalnin yulni. King kidika mahka Jordán yakat daklawakuh takat, Simei kidika king muhnit tani yakat yaklawi abukwi, 19aput kalyulna:
—Kalma dinit yakat buktayang king, adika man dimayamyang dutni yamna balna kidika kulwinih, man Jerusalén kaupak alahwanaman mani dai yakat. Yang kau dutni yakulwinih. 20Kat yang alas dutki kidika amanglatayang, dawakat José ūnipas bitik kau yang tatuna alahwayang man karak kalpakna atnin.
21Kaput dawak, Sarvia walanibis Abisai yulna:
—¿Simei kidika daunin yakat bukwaskatpa, Dawan yaklauwi king as yakna kidika niningkauh dutni yulna kidika?
22Kaunah Devid yaklauwi nangnitlana:
—¡Adika man yamnam dini awaski, Sarvia walanibis balna! ¿Ais yamwi nikingkauh yaklalauwih? Waralaih yamni amanglatayang, yang laih Israel pasyakat king yang, kaput bahang Israel akat muih as bik dadauwas karang warmani.
23Usnitkat, Simei yakat kalyulna dai Papang ayangni kau yakwi witing dauwas karangki.
24Mefi-boset,#2 Sam 9:1-13; 16:1-4. Saúl walanibis, witing bik niningkauh kalahwi kiwi kalpakna dai. King, witing kalahwi kiuna kaupak, yamni nawatwi kaina kat, witing kalni bik suhwas, kungnibas dakwas dawak asnina balna bik suhwas dai. 25Jerusalén kat kaiwi king karak kalpakna atnin yulni, bahang adika yaklauwi kalyulna:
—Mefi-boset, ¿ais yamta yangkarak aiwasmandaih?
26Witing yaklauwi nangnitlana:
—Yang diki yamyang kidika alas yayulna, king. Yang kalki sakahwa yang bahang, paknayang dai, biriku as dangni ilwi yāwakat ilwik man karak yawana atnik king. 27Kaunah witing yaklauwi, alaski yulna man muhma yakat, dutni yāyamnin yulni. Kaput kaunah, king man laih Papang innisal kapat man, man angdika yamni talaman kaput yamma. 28Yang papangki walanibis balna bitik kidik, man namang yakat daunin muihni balna dai kaunah, man dima yamyang adika, man timabil yakat yulwi duaina dai dikasna atnin. ¿Man kingman yakat ais baisa dukih yāwak mayulnik sipyah?
29King yaklauwi nangnitlana:
—Yulbaunin ūk diski. Adar kalana yang, man dawi Siba karak sau kidika sahyakta dutanama.
30Kaunah Mefi-boset yaklauwi nangnitlana:
—Witing bitik duwang. Kau tanit nuhni kidika laih, king man yamni dawak bik sangka nawatta ūma yakat aiwanaman.
31Galaad muihni Barzilai#2 Sam 17:27-29. laih Rogelim kaupak kaina dai, king kidika kalpakwi daklana atnin Jordán wasni kidika, kaput laih kalparaswa dawi mahka kiunin. 32Uba muihbarak dai, kurih 80 duwadai, king witing Mahanaim pāni yakat sakdai mani balna yakat, king dukih kalawa balna kidika bitik kalana dai, kat witing kidika uba di manas duwa dai bahang. 33King yaklauwi Barzilai yakat kalyulna:
—Jerusalén yakat mawang, yakat, yang man mainmatalki.
34Kaunah Barzilai yaklauwi kalyulna:
—Yang sangkika kidika parahni palni ki king, man karak Jerusalén yakat yawinik kidika, 35uman kurih 80 dutayang, di auhni kidika uman dakas danayang, kastayang kidika dawak ditayang kidika bik, auhni dawak dutni kidika bik sip amanglatas dana yang; unbauyang balna unbabauwa dinitna bik dakas danayang. ¿Ais yamtik king truknin as alahwakiyah? 36Tingmasut laihtik Jordán yaka madaklanik manah aiwanayang, ¿ais yamta king adika yang kau minit yanin yultamanh? 37King kalma dinit yakat buktik yulki, man yadatang paki yakat yawik dauna atnik, dawak papangki sauni ū yakat yanuna atnin. Kaunah king akat dima yamyang as dutaman: yang walakibis Quimam. King man witing karak yawah, dawak witing yakat amput kalyamnin yamni talma kidika kaput yamma.
38King yaklauwi nangnitlana:
—Quimam, yang karak kiwang, bahang amput yamni talaman kaput yamna awaki. Dawak di bitik yayulma kidika maki.
39Muih bitik Jordán kidika dakyaklalana. King bik dakyaklana, dawak Barzilai yakat laihwi umna mahka kiwa bahang. Kaput laih Barzilai nawatwi pāni kau kiuna. 40King laih witing mahka Gilgal yakat kiuna, Quimam karak kalpakwi, dawak Judá muihni balna bitik karak bik, dawak kaput bik Israel muihni balna papuswayah bik kalpakwi uina dai. 41Kaput laih Israel muihni balna bitik king yakat uiwi kaltalwi aput kalyuyulna:
—¿Amput dawak yangna wirahkina Judá muihni balna kidika king man yakat malaihwi maduduwarangyah witingna manah, dawak witingna manah tamat dakna atnin, man dawak, walamabis balna bitik, kaput bik kalbauyang balna kidika witingna manah atnin, Jordán yakat madaklalana kidika bik?
42Judá muihni balna bitik yaklauwi, Israel muihni balna yakat diyuyulna:
—Kat king laih yangna wanaihkina bahang. Kaunah kidika pasyakat kulnamna daukalnin as bik diski. ¿Yangna adika king dini kaupak kastayangna katpah kidika awaskat ais as laihtik dunayangnah?
43Israel balna yaklauwi nangnitnalalana:
—Yangna king minit yakat wat salap praisni rahmkina kidika dutayangna, manna karak dawakat. Baisa minit yakat, sulani as kapat, yangna kau muihbararak#19.43 Muihbararak: grik kau laih kaput yulna. Hibru kau laih ulna Devid yakat. yangna, manna karak dawak. Kaput kaunah ¿aisyamta kuihwas yanakultamanah? ¿Yangna lawik yamtas yangna dai katpah king mahka nawatwi kainin kidika?
Kaput kaunah, Judá muihni balna kau tanit parasni yuyulna dai, Israel karak dawakat.
Currently Selected:
2 Samuel 19: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
