2 Samuel 11
11
Devid dawak Betsabé karak
1Ma as kat, kurih ma daihwa yakat kidika king balna witingna kalahwi awawaihwa bahang, Devid yaklauwi Joab dawak kalbauyang balna tunan nunuhni balna karak yakwi sihna dai, Israel muihni kalbauyang balna bitik karak, dawak Amón muihni balna kidika bitik bahwi daukalmumukna dai, dawak Rabá tawanni kidika awaihdadakna. Devid laih Jerusalén yak sak dai.#1 Cr 20:1.
2-4Ma as kat Devid pāni kaupak yaklauwi king ūni tuna kau langni yakat awaihwa likkauna kidika yakaupak talna yal as nuhni yaksihni as waskawa sakkat. Kidika yalni laih wainiku bayakdana kat kalahwi maisihnidis kalahwa sak dai. Dawak Devid yaklauwi muih sihna walwi talna atnin kidika yalni waispa, uiwi talwi usnit kat kalyuyulna kidika laih Betsabé, Eliam walanibis, dawak Urías hitita kaupak kidika yalni. Dawak Devid yaklauwi muih sihna duwi uina atnin witing yakat, dawak kaput laih witing karak kalalangna, dawak usnit kat yal kidika mahka ūni kau kiuna.
5Kidika yalni muih karukdana, kaput laih Devid yakat isningpakna. 6Kaput dawak Devid yaklauwi Joab yakat pakna Urías hitita kaupak kidika witing yakat duwi kiuna atnin, dawak kaput yamna dai Joab. 7Urías Devid muhni yakat kiwakat, witing yaklauwi kalyulwi dakana, Joab dawak kalbauyang muihni balna kidika ampatpa, dawak war yulni kidika ais sakyah. 8Usnit kat kalyulna ūni yakat kiwi kalni suhna atnin.
Urías kidika king ūni kaupak kalahwi kiudawak king yaklauwi di kasnin yamni as dauh kalsihna dai; 9kaunah Urías ūnikau kiwas dawi, king ūni dūrni yakat payahna, kalbauyang balna king witing palni duwasak kidika balna karak. 10Devid yakat kalyuyulna Urías laih witing ūni yakat kiwasdana kalatwak, Devid yaklau kalyulwi dakana:
—¿Ais yamta ūma kau yawas danamanh, man likkauna aiwanaman kaupak?
11Urías yaklau nangnitlana:
—La baksni Papang dini kidika, kaput bik Israel dawak Judá muihni kalbauyang balna kidika, witingna ū labanni minit yakat pan basni kau ilna kat kakawa kidika; yang takituna Joab bik sihm kaput kidika dawak kingki ahalni kalbauyang tanituna balna bik sihm kaput, pini ahni yakat payayahwa kidika; ¿kaput kidika yang laih ūki pasyakat awakiyah, di kasnik dawak dinik bik, dawak yalki karak bik alangwinikyah? ¡Yang kingki sangnika kau yang sip kaput yamtas awaki!
12Kaunah Devid yaklauwi pakna:
—Waradika bik wattah, yahan mani madating yawama.
Dawak kaput laih Urías witing Jerusalén yak watwi payahna. 13Devid yaklau duwi kiuna witing karak di kaswi dawak bik dinin, bahang kaput laih wasak dauna. Dawak puklakwakat kalahwi kiwi kalbauyang balna king yaihnit kau duwasak kidika balna pasyakat kawi payahna, witing ūni kau kiwasdana.
14Ma payahlawak Devid yaklau Joab yakat wauhtaya as ulwi kalsihna, bahang kidika wauhnitaya laih Urías karak sihna dai. 15Kidika wauhnitaya yakat ulna dai: “Urías kidik war tunan yakat latah, angdika parasni kalbauwa kidika niningyakat, dawak alas kaldatanangkat ihiwang.”
16Kaput laih Joab witing tawan nuhni kidika awaihwi dakna kat, witing angkat kalbauyang balna tanit kulninna dadasni duwa balna bangkidika pasyakat āna dai, 17minit as kat tawan nanitdakwa bangkidika kalahwi Joab niningyakat kalbabauna, bahang kidika yakat Devid ahalni kalbauyang tanituna balna kidika as bubukna, bahang kidika pasyakat Urías kidika likdai.
18Joab yaklauwi wauhtaya as ulwi sihna Devid yakat, amput kalbabauna kidika bitik, 19dawak wauhtaya dukiwa muihni yakat amput yamnin kidika kalyulna: “Man lawa king yakat kalyulma amput war kalbauna kidi usnit kat, 20sipki king anna atnin, dawak mayulwi dakana atnin bik: ‘¿Ais yamta tawan nuhni kidika yaihnit palni yakat yawa awa kalbaunamanah? ¿Manna amanglatas manah daklana ma yakaupak di ruruhmwa kidika, 21Tebes yakat yal as yaklauwi Jerobaal#11.21 Jerobaal: grik kau ulna kidika laih kaput yulwi. Hibru kau laih Jeroboset (2:8 yakat talah). walanbis Abimelec yakat īna kidika, daklana makaupak kiwatak ruhmlakwi?#Jue 9:53. ¿Aisyamta daklana kidika yaihnit palni yakat yawanamanah?’ Kaput mayulwak man lawa nangnitlama: ‘Hitita al Urías dai kidika bik dauna, king man alma kalbaunayang balna tunan muihni as dai kidika.’ ”
22Wauhtaya duwi kiuna muihni kidika kiwi kawi Devid yakat yul kalyulna, Joab yaklauwi amput kalyulnin pakna dai kaput. Kaput laih rahm palni Devid kasak kulnin daukalna Joab nining kauh, dawak, yul duwi kiwa muihni yakat kalyulna:
—¿Ais yamwi tawan yaihnit palni yakat uiwi kalbabaunayah? ¿Amanglalawas katpah daklana makaupak di ruhmlalakwa kidika, Tebes kau yal as yaklauwi Jerobaal walanibis Abimelec yakat īna kidika, daklana makaupak kiwatak as rumhlakwih? ¿Bahang amput dawak daklana yaihnit palni yakat uinayah?#11.22 Kaput laih ramh palni Devid...uinayah?: grik kau ulna kidika laih kaput yulwi. Hibru wauhnitaya yakat laih S.d. 22 witni niningkauh kidika kalahwas ki.
23Kaput laih yul duwi kiwa muihni yaklau kalyulna:
—Kalbauyang muihni balna di dadahwa pāni yakat kalahwi nikingna yakat kalbabauna kidika witingna kau sip dai yangna karak dawakat, kaunah yangna lawik diyamtiningkat dangsawi tawan nuhni kiwi kawa yakat uiwi kakana dai. 24Kaput dawak daklana kaupak sibang ruhmyang balna kidika king man alma kalbauyang balna niningna yakat ruruhmna, dawak kalbauyang balna taninatuna as dadauna, kidika pasyakat hitita kaupak dai kidika, Urías bik likdai.
25Kaput dawak Devid yaklauwi yul duwi kiwa muihni yakat kalyulna:
—Joab yakat kalyultah witing uba bik kulnin awaski kalahna kidika yulni, kat war laih kaput bahang. Kaunah baisa parasni kalbauwang tawan nuhni niningyakat, bahwi daukalpamwarang kat. Dawak man bik ilp kalata kulnin dulautah.
26Urías yalni dakana witing alni dauna atwak, bahang kaput laih kulnin bukna kidika duna dai alni yulni; 27kulnin bukna kidika bayakwa dawakat, Devid yaklauwi duwi kiuna, dawak witing ūni yakat āwi duna, kaput bik laih witing yalni yamna dai dawak yal kidika yaklauwi walanibis as yakna. Kaunah Dawan witing yamni talwas dai Devid yamna kidika.
Currently Selected:
2 Samuel 11: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
