2 Samuel 12
12
Natán yaklauwi Devid yakat bilna
1Dawan yaklauwi prapit Natán kidika sihna Devid yakat kiwi kaltalna atnin.#Sal 51 Yulni tunan kidika Hibru kau ulna. Natán kidika witing muhni yakat kiwi yaklauwi kalyulna:
—Tawan nuhni as kat muih ahal bu raudai. As laih di duyang dai dawak ūk kidika laih minikunni di dis dai. 2Al di duyang kidika laih sīp mahni duwa dai, dawak turuh bik, 3kaunah muih minikunni kidika laih sīpbin aslah duwa dai, bahang kidika laih witing bakanna dai. Kaput laih sīpni kidika witing muhna, bahang witing dawak walanibis balna karak al bu kidika kaput ban dai; witing ais kaswa kidika sihm sīpbin kidika bik kaswa dai, dawak sihm sūnitak yakat witing bik diwa dai, dawak witing pasni yakat bik kawi payahwa dai. ¡Kidika alni laih witing walanibis kapat dalani talwa dai! 4Ma as kat pa ūk kaupak muih al as kiuna dai, al di duyang yakat kaltalna atnin, kaunah di duyang kidika witing sīpni dawak tuniruh yayal balna kaupak duwas dai di lahwi bayahnin kidika, al kiwi kaltalwa muihni yakat, kaunah muih al minikunni sīpni dai kidika dakyakwi iwi lahna, muih al kiuna yakat kalawak kasna atnin.
5Devid kidika dakawi kulnin parasni daukalna kidika alni niningyakat, dawak Natán yakat kalyulna:
—¡Papang ayangni kau yaktik mayultayang, angdika muihni kaput yamna kat kidika muihni laih dauna atnin karang ki! 6¡Dawak sīpnibin minit kidika laih wat-arungka minit yakat lakwi launa atnin karang, kat witing laih minikun talnin lani kidika dis yamna bahang!
7Natán yaklauwi kalyulna:
—¡Kidika alni laih man! Kidika kuduh Dawan, israel Papangni yaklauwi yulna kidika: ‘Yang lawik mayaknayang Israel kingni kapat, dawak Saúl parasni kaupak madakyaknayang; 8king ūni bik manayang, dawak damawan yalni balna bik manayang, kaput bik Judá dawak Israel yakat king kanin kidika bik manayang. Kidika balna bitik di dibin kulnaman kat, yang lawik di baisa manikdai. 9¿Ais yamta yang yulki kidika dauh kulnaman dawak yang dukih yawas kidika yamnaman? Al hitita Urías dai kidika īnaman, Amón muihni balna yakat ātang ihina, dawak witing yalni dai kidika dunaman. 10Yang akat dauh yakulta hitita al Urías yalni kidika dunaman man yalma, kaput bahang man ūmapas yakat kalbaunin lani kidika dis awaskarang, ban karang. 11Yang, Dawan yang kat yultayang: Yanglawik yamtingkat dutni kidika ma sulama balna munah kalahwarang, kaput laih man muhma kat yalma balna kidika dutik man sulama ūk yakat kalaki, dawak kalalangna karang madah yakat. 12Man malni kau yamnaman kat, yang laih Israel muihni balna muhnina yakat yamkih dawak madah yakat.’#2 Sam 16:22.
13Devid yaklau Natán yak kalyulna:
—Dawan niningyakat dutni yamnayang.
Dawak Natán yaklauwi kalyulna:
—Dawan yaklauwi man yakat wah mawas karang ki dutni yamnaman kidika yulni, dawak bik dautas awama ki. 14Kaunah man Dawan niningyakat dutni palni yamnaman bahang,#12.14 Dawan niningyakat dutni palni yamnaman: kaput kapat ulna ki. Hibru kau laih Dawan niningkauh yaklalauwa balna yakat dutni palni diyamnaman. walambis wisam batahndana kidika dauna karang.
15Dawak Natán mahka nawatwi ūni kau kiuna, dawak Dawan yaklauwi yamwak Devid walanibis yayakna dai kidika Urías yalni kaupak, siknis parasni kallaihna. 16Kaput dawak Devid Papang kalni dinit yakat bukwi yulna muihbin kidika yulni, kaput bik laih di kaswas dai, dawak pukta balna kidika sau yakat kalangwi payahna dai. 17Muihbararak balna king ūni yakat bangdai kidika uiwi kalni dinit yakat bukwi yuyulna, witing kidika sau kaupak yaklauna atnin, kaunah witing yaklaunin yulwas dana, kaput bik laih di bik kaswas dai witingna karak.
18Ma tiaskaubu bayakwak usnit kat dauna dai, dawak Devid ahalni kalbauyang balna tanituna balna kidika yaklauwi kalyulnin yamaduduna dai, kat witingna kukulna: “Muihbin kidika sangka dai mani yakat yulkalbaudak mayulki dakawas dai, ¿bahang waralaih amput kalyuldarangyah muihbin kidika dauna? ¡Sipki didutni as yamna atnin!”
19Devid talwak kalbauyang muihni balna kidika biri yulbabauwak witing amanglana muihbin dauna kidika; kaput dawak yulwi dakana dai:
—¿Muihbin daunayah?
—Agha, dauna —kalatwadai witingna yaklauwi.
20Kaput laih Devid witing mahka sau kaupak yaklauwi waskawi dawi di walapni kalkahna, dawak asnina bik ūk kawi dawi, Dawan ūni yakat kiwi kana, Papang yakat ayangni nuhni yamnin yulni. Usnit kat ūni yakat kiwi kawi di yulwak kalalawak kasna. 21Usnit kat kalbauyang muihni balna taninatuna duwa dai kidika yaklauwi kalyulwi dakakana:
—¿Kaunah, king man ais yamtamahn? Muihbin kidika sangka dai mani yakat king di kastasman dai, dawak bik aidaman dai muihbin kidika yulni; dawak waradika laih muihbin kidika dau dawakat, ¡man kingman kidika lawaman, dawak di bik kastaman!
22Devid yaklau nangnitnalana:
—Muihbin kidika baisa sangka kat, yang di kastas aidayang dai, yang kulnayang Dawan yang akat mikun yatalwi dawak sangka karang. 23Kaunah waralaih dauna, ¿ais yulni di kastas awakiyah, wattik yang lawik sangnika kalanik sip-awas kidika? ¡Yang yawik witing karak kalpaktanaki, kaunah witing laih sip kaiwak kalpaktas awanaki ki, yang karak!
Salomón batahna
24Usnit kat Devid yaklauwi yalni Betsabé yakat walaniana. Kiwi kaltalna dawak payayahna bahang kaput laih yal kidika muihbin as yakna dai, bahang ayangni pakna Salomón. Dawan yaklau adika muihnibin yakat dalani talna, 25kaput laih Dawan yaklauiwi Natán munah kalyulwak dakana. Dawak Devid laih Dawan yulna yakat dakawi muihnibin kidika ayangni pakna Jedidías.#12.25 Hibru kau laih Jedidías tanka laih Dawan yaklau dalani talwa muihni.
Devid yaklauwi Rabá kidika dakyakwi duna
(1 Cr 20:1-3)
26Joab yaklauwi Amón muihni balna tawannina nuhni Rabá kidika niningyakat kalbauna, bahang witing kidika dahn tawanni nuhni palni kidika laihnin manah dawakat, 27Devid yakat adika yul sihna: “Rabá nining yakat kalbautayang, dawak kalbauyang balna ūnina parasni was duduwa pāni nanitdakwa kidika dakyaknayang. 28Kaput bahang king man lawa kalbauyang as balna kidika bitik uduhtah, dawak tawan nuhni niningyakat kalbauta dakyaktah, yang lawik kidika kaput yamtik ayangki paknik awas yulni.”
29Kaput laih Devid witing kalbauyang muihni balna duwa kidika bitik uduhwi duwi dawi Rabá niningyakat kiwi kalbauwi dakyakwi duna. 30Kidika usnit kat, kidika king tunan kau gol kraunni pakna kidika apakwi duna, bahang kidika kraunni laih kipala dahlwa satni balna duwa dai, dawak tikini laih duwa dai paun 70 minit yakat, dawak Devid tunan yakat papakna. Dawak bik Devid yaklauwi di minit nunuhni balna kidika mahni yakna, 31dawak muih baisa wawatna kidika balna tawan nuhni paskaupak yakwi dawi pakwak wark kalalahna sa kau, di minik bahnin dini kidika kau, dawak ayan kini kau bik wark kalalahna, kaput bik laih ū paknin dini sau rabutwi busnin warkni bik yayamna. Amón tawanni nunuhni balna bitik kau laih kaput yamna dai, dawak kidika usnit kat, kalbauyang ahalni balna duwa dai kidika balna bitik karak nawatwi Jerusalén yakat kiuna dai.
Currently Selected:
2 Samuel 12: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
