2 Kurint 8
8
Minit dis kalanin dini balna yakatisning pihni atnin kidika
1Wirah balna, waralaih, yangna dikih yanawi Papang dalani lani duwa kidika Macedonia sutsni balna yakat amput niningnakana kidika. 2Witingna wauhnin balna munah bayayakna karang bik, alasna ki; dawak miniknakunni palni karang bik, minit dis kalanin dini balna isningna pihni karuk kalalana kidika laih sihm di duyang balna kapat. 3Yang laih witnis yang witingna ismangna pihni karuk minit dis kalanin dini balna ais sip kaput kalalana kidika, dawak baisa minit kau kalalana kidika bik. 4Uba palni kalkina dinit bubukna dai didatiningkat witingna bik Papang tawanni muihni balna dinina kidika kaupak duna atninna.#Rom 15:26. 5Dawak yangna kultas yangna dini dai kat bik yayamna dai, bahang witingna silp Dawan yakat minit dis kalanin dini balna kalalana dai dawak usnit kat yangna yakat yanana dai, Papang kulnin lani kaput. 6Kaput bahang Tito yakat kalni dinit buknayangna manna pasyakat di yulwi uduhna atnin muhnilau kau walwi uduhna dai kidika. 7Bahang manna laih, di balna bitik yakat yamni manah alahwamana kidika: rahm kulnin lani yakat, yulbaunin yakat, di amanglanin yakat, di yamnin sipmana kidika dawak dalani lani yangna kaupak lan alahwanamana kidika, adika yamni lani adika yakat bik sihm kaput yamni yamnamna ki.
8Adika laih sihm la as kapat manayultasyang; kaunah yang dukih yawi manna amanglana atnamna muih ūk balna di yamni yayamwa kidika, manna yakat sans manadakat yamta niningnakana atnamna manna dalani lani dutamana kidika laih rahm kidika. 9Kat manna laih uman amanglatamana Madakiwan Jisas Krais kidika, witing dalani lani duwa kidika kau, di duyang yakauna manna yulmana minikunni kalna kidika, witing minikunni lani karak manna laih di duyang kalnamna yulni.
10Manna yamni atnamna yulni yang lawik adika yulni sinski lani balna manatayang. Kurih bayakna kaupak, manna lawa adika dini di as yamnin manah laih yamta sarpaktasmana dai, kaunah kulnamna yamni karuk yamnamana dai. 11Bahang waralaih, manna ais sip mana kaput, tatuna kau yamkih manawakat yamta sarpaknamana dini kidika yamta saran laihtanauh. 12Kat muih as rahm witing Papang yakat di kalanin yamwa kidika, Papang yaklau duwi minit dis kalanin dini ampus kalawa kidika. Papang laih muih as di dis dini kidika kalanin yulwas ki.
13Muih ūk balna yakat ilp diata manna laih di dukih manawakat kulta kalbaunamna laih yuldas ki; nawatkauh laih aslah lani kidika dunin yuldi. 14Waralaih manna dutamana witingna dis dini kidika; ma ūk yakat witingna duduwa karang ki manna di dis awanama dini kidika, dawak kaput laih aslah lani kidika sak karang ki. 15Ulna yakat aput yulwa kaput: “Mahni anana muihni kidika laih di dis watna dai, dawak bulah anana muihni dai kidika laih di dis watwas dai.”#Ex 16:18.
Tito dawak kaltalyang yayamni duwa balna kidika karak
16Papang yakat tingkih witing yaklau Tito isning yakat kulwi kalbaunin as āna dai kidika sihm yang lawik manna yulmana kultik kalbautayang. 17Bahang yang lawik yul kalyultayang kidika dakana dawak, witing bik manna yulmana kulwa bahang, waralaih witing silp kulnin lani kiwi manatalwarang ki.
18Tito karak kalpaktik, wanaih as sihtayang witing yulni balna laih suts balna bitik yakat yamni yuyulwi, yul wisam yamni kidika yulni yamni wark kalahna kidika yulni. 19Baisa kidika minityakat, suts balna yaklau walwi yayakna dai yangna karak pa balna ūk yakat kiuna atnin dawak yangna Dawan risnipik yamnikna yulni wark yamni yamtayangna kidika yakat ilp yanana atnin dawak muih balna yakat niningnakana atnikna di balna yamtik muih balna yakat ilp diakih yanawa kidika. 20Yangna kaput yamtiningkat muih balna yaklau nikingna kauh yaklauwas atninna di yultik uduhtayangna adika yulni, 21dawak kaput bahang di yamni kidika yamnikna kultayangna, Dawan muhni yakat manah laih awas kaunah muih balna muhnina yakat bik.#Pro 3:4.
22Kidika muihni balna karak aslah wanaihkina ūk manasihtayang, witing laih warkni balna yamni yamwi nikingnakana, dawak waralaih baisa mahlaih, manna yakat yamni manakulwa kidika yulni. 23Tito kidika laih yang karak kaltalyang yamni dawak manna yamni atnamna yulni yang karak wark kalahwi atnik sipyang. Dawak wanaih balna ūk bu kidika laih, suts balna yaklau sisihna dawak witingna laih Krais yakat rispik yayamwi. 24Dawak suts balna amanglana atninna yulni, manna lawa niningnakatanauh rahm palni dalani manatatalwa kidika dawak yangna laih manna yulmana yangna manah kapat kaldakanikna kidika rahmkina dutayangna.
Currently Selected:
2 Kurint 8: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
