2 Kurint 7
7
1Kaput bahang, wirahki dalani balna, mayang adika pramis balna dudi. Kidika bahang mayang maisihni dis atnin ki maisihni mailaihnin kidika kaupak, mamuihki nuhni yakat dawak spirit niningyakat bik; dawak Papang yakat yamanidunin kidika laih traitaldanang holi kidika laihna atnin.
Kurint muihni balna wiryaklalana kidika
2¡Manna ismangna yakat pa as yamta mayatanauh! Muih as yakat bik yangna la kat awas kidika yamtasyangna; muih as yakat bik dutni kalyamtasyangna; muih as yakat bik dini dutasyangna. 3Yang adika dini karak manna namangnakauh laih yultasyang, bahang, muhnilau kau manayulnayang kaput, manna laih yang ising yakat mana, aslah yalahna atnin dawak bik aslah dauna atnin. 4Yang laih barangni manayultayang dawak bik yang manah kapat kaldakayang manna yulmana. Wauhtayangna bitik pasyakat, kulnik dulaunayang dawak bik alasna kaldakayang.
5Macedonia yakat yawik āwanayangna kaupak,#2 Kor 2:13. wat as bik urupdas yangna, kaunah pa balna bitik yakat trabil balna kalpakna yangna: yaihkitna yakat laih kalbaunin balna dawak muihkina pasyakat laih yamadunin kidika. 6Kaunah Papang laih, kulninna bukna balna yakat kulninna dulauwa kidika, Tito kiuna kidika karak kulnikna dulauna dai; 7dawak Tito kiuna kidika manah bik awaski, kaunah witing bik manna yulmana kulnin dulauna dai kidika yulni. Witing yaklau yulyanabauna dai manna lawa yangna yakat yanatalnin dukih manawa kidika, dawak kulnamna bukna kidika dawak yang yulki kulta kalbautamana kidika bik yayulna dai; dawak kidika dakik baisa alasna alahwanayang dai.
8Yang lawik wauhtaya manaulnayang kidika yaklau kulnamna lakna karang bik, waradika laih aidas yang. Dawak muhnilau kau aidanayang dai kat wauhtaya manaulnayang dai kidika yaklau ma parahni kulnamna lakna dai kidika yulni, 9waralaih alasna alahwayang; kulnamna bukna kidika yulni laih awas ki, kaunah kidika kulnin bukna karak Papang yakat wirlawanamana kidika yulni. Kidika laih kulnin bukna as dai Papang kulnin lani, kaput bahang yangna laih manna yakat dutni as bik manayamtasyangna; 10bahang kulnin buknin lani Papang kulnin lani kidika laih kulnin wirlanin tani yakat duwi kiwi dawak usnit kat laihwi laknin lani kaiwi, dawak kaidinin dini as bik diski. Kaunah kulnin lani sau dini kidika laih daunin kalahwi. 11Manna kulnamna bukna, Papang kulnin lani dai kidika, ¡talnauh ais kalahna kidika! Manayamwakat kidika yulni rahm kulta takit daknin kulnamana; kulnamna daukalnamana, dawak bik yamadunamana. Usnit kat dukih manadai yatalna atnamna, yang yulki mikit anna manadai dawak dutni yamna muihni yakat wah kalanamana dai. Kidika bitik karak lāih yamnamana dai manna laih adika yulni di as bik dismana kidika. 12Kaput bahang, wauhtaya as manaulnayang dai kidika, dutni yamwa muihni yakat dawak dutni kalahna muihni yakat bik kultik ultasyang dai, kaunah Papang muhni yakat lāih talna atnin manna kulta kalbautamana kidika yangna yulkina. 13Adika laih yangna nikingna yakat walaniānin lani as dai.
Kaunah yangna walaniānin dunayangna adika kapat bik awas, yangna alasna alahwanayangna Tito laih isninglak kidika yulni; bahang manna bitik lawa kulnin dulaunin wisasamni kalanamana. 14Tito yakat uman kalyulnayang dai yang laih yang manah kapat kaldakayang kidika manna yulmana, dawak bik dutni alahwasyang dai. Nawatkauh, manna yakat di rahm manayulnayangna kaput, Tito yakat kalyulnayangna dai kidika bik rahm kalahna: yangna bik sihm yangna manah kapat kaldakayangna manna yulmana. 15Dawak witing laih manna yakat baisa dalani manatalwi manna lawa witing yulni kat daka rispik nuhni kalyamnamana dai kidika kulyakwi. 16¡Yang alasna kaldakayang manna yakat lāih kulnik yamni manakultayang kidika yulni!
Currently Selected:
2 Kurint 7: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
