2 Kurint 9
9
Wanaih balna dinina di walwi uduhnin
1Rahm kulnin niningkauh wanaih balna dinina uduhnin kidika laih, manna yakat wauhtaya manaulta atnik dini awas ki, 2kat yang uman amanglatayang manna laih kulnamna yamni kidika. Yang laih yang manah kapat kaldakik Macedonia muihni balna yakat diyultayang, kurih bayakna kaupak manna Acaya muihni balna mana laih ilp dianin kultamana, dawak Macedonia muihni balna mahni kauh kidika laih kulninna dulalauna manna kulnamna yamni kidika yulni. 3Kaput bik, adika wanaih balna disihtayang adika yulni yultik manna yayamnimana tik yulnayang kidika dauh kalnin awas yulni. Yuldarang kat, manna laih ridi atnamna yulni, 4Macedonia muihni balna yang karak kalpakwi uiwi tatalwakat manna laih ridi awas atnamna awas yulni. Kidika laih yangna nikingna yakat asalni as karang ki, yangna lawik manna yakat yamni manakulnayangna dai kidika; manna asalmana atnin awas yulni. 5Kidika yulni yang yamni talnayang adika wanaih balna akat diyultingkat uiwi manatalna atninna, dawak witingna yaklau ilp mananawakat manna di uduhnin pramis alahwanamana dai kidika saran laihna atnamna. Kaput laih, manna di uduhtanama kidika laih manna kulnamna yamni kidika lāih karang, dawak yangna lawik manataihtiningkat yamnamana dini kapat laih awas karang.
6Manna adika dini ismangnakattanauh: Angdika muihni di bulah dahwa kidika laih, di minik bulah yakwi; angdika muihni mahni dahwa kidika laih, di minik mahni yakwi. 7Muih bitik kidika witing isning yakat ampus kalanin kulna kidika kaput kalana karang, dawak kulnin dutni karuk laih awas kidik awaskat taihna lani munah bik awas, kat Papang laih angdika muihni witing kulnin alasna kalawa kidika yakat dalani kaltalwi. 8Papang yaklau manna yakat blisin satni balna bitik mananin sipki, kaput laih manna dukih manawa dini balna bitik kidika duta atnamna dawak kaput bik minit bayak duta atnamna wark satni yayamni balna bitik yakat ilp diana atnamna yulni. 9Ulna kidika yakat aput yulwi:
“Muih miniknakunni balna yakatminit bayak diana,
dawak witing kulnin yamni kidika laihban kaput ki.”#Sal 112:9.
10Papang witing di dahnin minik dawak kasnin#Is 55:10. dini bik mayawa kidika, manna di dahnamna dini balna bitik manana karang, dawak witing yaklau yamwakat bararakna karang, dawak bik witing yaklau yamwakat manna kulnamna yamni kidika minik mahni palni kalahna karang. 11Kaput laih manna rits satni balna bitik duta awanama dawak kulnamna yamni karuk kalatanama. Dawak manna lawa di uduhta yangna munah sihtanama kidika laih, wanaih balna kidika Papang yakat tingkih kalaninna yulni as karang. 12Kat adika ilpni lani wanaih balna yakat dutik yawanaki kidika,#9.12 Adika ilpni lani dutik yawanaki kidika: Y.y. adika wauhnitaya akat wark kalahna. Yulni yulwa kidika laih Papang yakat priniyas yamna yulni as ki. witingna dis dini kidika manah bik laih dutik yawasyangna, kaunah diyamtiningkat Papang yakat bik tingkih kalalawi. 13Dawak witingna laih Papang yakat ayangni nuhni yayamwarang, bahang adika ilpni lani munah witingna amanglalana karang manna laih Krais yulni wisamni yamni kidika yakat dakamana kidika. Witingna bik Papang yakat rispik yayamna karang manna kulnamna yamni karuk witingna dawak muih bitik dini yaknamana kidika yulni. 14Dawak baisa kidika minityakat witingna yaklau manna yulmana dalani lani karuk minitna yuyulna karang, Papang yaklau dalani lani nuhni manna yakat namangnakana kidika yulni. 15¡Papang yakat tingkih, kat witing yaklau dauh kalanin dini nuhni as maiyamna kat yul as bik yulnin sipawas mayang kidika yulni!
Currently Selected:
2 Kurint 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
