1 Tesalónica 4
4
Sangnika as Papang yamni talwa kidika
1Waralaih, wanaih balna, manna kalmana dinit buktayangna dawak adika dini Dawan ayangni usnit yakat yamnin manayultayangna: manna tamatna yakat di balna kidika yamta yawanauh (uman yamtamana kaput) yangna lawik manna yakat manasumalnayangna kaput Papang yamni talna atnin yulni.
2Manna yamni amanglatamana yangna lawik manasumalnayangna dini kidika Dawan Jisas parasni kau. 3Papang dukih kalawa kidika laih manna sangmanaka kidika holi atnin, dawak muih as bik la dis kaldunin awas 4dawak muih bitik kidika witingna silp yalnina#4.4 Yalnina: Y.y di punin dini, rabinos muihni balna duduwa dini kidika. Talah 1 Pi 3:7. kat kat amput atninna kidika kaput kawang holi lani kat dawak rispik lani karuk bik, 5dukih lani karak bik awas dawak kulnin dutni lani karak bik awas sihm Papang yakat amanglalawas balna yayamwa kapat. 6Muih as bik witing wanaihni yakat dutni kalyamnin awaski dawak bik alas kalyulnin awaski adika yulni,#4.6 Adika yulni: wirlana ūk yakat laih aput yulwi: wark balna yakat. kat Dawan yaklau wah parasni mayawi, uman ismangna paknayangna kaput. 7Bahang Papang laih maisihni karuk yalahnin maiyulwas ki, kaunah holi atnin. 8Kaput bahang, angdika muihni adika lani balna yakat dutni yamwarang kidika laih sau muihni as yakat bik dutni kalyamwas ki, kaunah Papang witing spiritni holi manana kidika yakat dutni kalyamwi.
9Wanaih balna pasyakat dalani lani kidika niningkauh laih, manna yakat wauhtaya manaulnikna dini bik awaski, kat Papang witing palni manasumalna biri biri dalani kaltalna atnin. 10Bahang manna kaput yamtamana Macedonia yakat wanaih balna yalalahwa kidika bitik yakat. Kaunah wanaih balna kalmana dinit buktayangna, dalani lani dutamana kidika baisa barakwang ma balna bitik yakat. 11Manna traitala alasna yalahtanauh dawak manna silp warkmana balna yakat yamtanauh, tingmana karak wark yamnin manayulnayangna kaput, 12ahni muihni balna kidika yaklau rispik manayamna atninna yulni dawak manna bik di as dis atnamna awas.
Dawan watwi kaiwarang kidika
13Wanaih balna, yangna dukih yanawas ki manna amanglatas atnamna muih dadauna balna karak ais kalahwa kidika, manna muih ūk balna kulninna bukwa kat tahanin lani dis kidika kapat atnamna awas yulni. 14Jisas dauwi watwi yaklauna kulda kidika, sihm kaput kuldi Papang dawak Jisas karak watwi dulalauwarang kidika witing yakat kulwīnah dadauna balna yakat.
15Kidika yulni manna yakat Dawan lani balna kidika manayuldi, yangna laih, Dawan watwi kaiwak kat sangka awanaki kidika, muih dadauna balna kidika tanitna yakat bayaktas awanaki ki. 16Kat yamnin yulni as, insal yulni as dawak Papang trumnipit yulni kidika bik kalahwarang ki, dawak Dawan witing palni kisang kaupak yaklakwarang ki. Dawak Krais yakat kulwīnah dadauna balna kidika laih, witingna tatuna yaklalauna karang ki; 17usnit kat, sangka watnamayang kidika laih maiduwi kiuna karang ki, witingna karak aslah, mukus balna yakat, wing yakat Dawan karak kalpakna atnin yulni; dawak kaput laih Dawan karak ban kaput mawarang ki.#Mt 24:30-31; Mk 13:26-27; 1 Kor 15:51-52. 18Bahang kulnamna dulautanauh, biri biri adika yulni balna karak.
Currently Selected:
1 Tesalónica 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
